Pakatseqqasoq, isornartorsiuisoq iluatsitaarisorlu: Illuatungiliuttunngortut Ukiakkut ataatsimiinneq assigiinngitsumik nalileraat
Naalakkersuisut siulittaasuata Jens-Frederik Nielsenip(D) Inatsisartut ukiakkut ataatsimiinnerat ammarlugu septembarip 18-ianni oqalugiarmat arlallit pissangapput.
USA-mimmi isumaqatigiissusiortoqarsimaneranik tusatsiakkat nutaarsiassaqartitsivinni taamani siammarterneqarmata.
Jens Frederik Nielsenili oqalugiaatissamini allassimasut malippai, USA-lu pillugu oqaaseqarami nutaartaqarani.
Inuilli amerlanerit unnukkut eqqissisimaalereersut akunnerullu naanerani eqqissisimaarnialerlutik, USA-p præsidentiata Donald Trumpip Kalaallit Nunaata, Danmarkip USA-llu isumaqatigiissusiorsimanerat pillugu inoqatinut nammineq attaveqartarfimmini allaaserisaqarpoq.
Inatsisartut siulittaasoqarfiata ukiakkut ataatsimiinnissaq taamaalimmat kinguartippaa, isumaqatigiissutip atsiorneqarnissaanut New Yorkiliartoqarniassammat.
USA-mik isumaqatigiissut Inatsisartuni oqallisigineqalerpoq, pitsaanersoq pitsaannginnersorluunniit oqallisigineqarluni.
Allarluinnarmillu pisoqarpoq Inatsisartuni ilaasortat ilaat ataatsimiittarfimmit ukiakkut ataatsimiinnerup nalaani anillutik.
Inatsisartut ukiakkut ataatsimiinnerisa immikkoortuanni siullermi pingaarnertut qanoq pisoqarnersoq, KNR-ip partiinut illuatungiliuttunut Naleqqamut, Siumumut maannalu aamma Atassummut apeqqutigaa.
- Naalakkersuisoqatigiinni ilaasortaajunnaarpugut, illuatungiliuttunngoriasaarlutalu. Ilimagisatsinniit allaaneruvoq, Atassutip siulittaasua Aqqalu C. Jerimiassen qaammatini kingullerni pisut pillugit oqarpoq.
Naalakkersuisoqatigiinni aaqqiagiinnginneq
Siumut, Atassut, Inuit Ataqatigiit Demokraatillu aappaagumut aningaasanut inatsisissamik Inatsisartut ukiakkut ataatsimiinnerisa nalaanni saqqummiussimmata eqqissisimasoqarlunilu suleqatigiittoqarpoq.
Atassulli naalakkersuisoqatigiinni unnukkut taava aalassatsitseriasaarpoq.
Partii naalakkersuisoqatigiinnit anivoq, naalakkersuisoq Nivi Olsen(D) tatiginninnginnermik arlaleriarluni takutitsivigineqareernermi kingorna inatsisartut ataatsimiinnerat akunnernik marlungajanni unitsikkallarneqareersorlu anillutik.
Naallu Nivi Olsen qimussertartut kattuffiannut KNQK-mut aningaasaliissutit siunertamut allanut atorneqarsimanerinut atatillugu tatiginnikkunnaarnermik takutitsivigineqarluni inatsisartuni taasititsisoqarmat aallaqqaammut aniguigaluartoq, Atassutip naalakkersuisoqatigiinnit anereernerata aqaguani naalakkersuisutut tunuarpoq.
Atassutip Inatsisartut ukiakkut ataatsimiinnerisa immikkoortuani siullermi suna pakatsissutiginerpaaneraa Aqqalu C. Jerimiassen ersarissumik akissuteqarpoq:
- Tassa naalakkersuisoqatigiinni ilaasortaajunnaarnerput. Taamaappoq. Suleqatigiinnissamut isumalluaraluaqaagut, kisianni tassa politikki taamaappoq, siulittaasoq oqarpoq.
Atassutip naalakkersuisoqatigiinni qinigaaffimmi matumani ilaasortaaleqqinnissaa taassuma takorloorsinnaanngilaa. Atassut illuatungiliuttutut misilittagaqartoq taassuma tikkuarpaa.
- Naalakkersuisoqatigiinni ilaasortaanikkut toqqaannartumik sunniuteqarfigisinnaasaqarpugut, maanna tamakkua pillugit isumaqatigiinniartalissaagut, tamannalu suliassaavoq alla, Aqqalu C. Jerimiassen oqarpoq.
Naak illuatungiliuttuugaluarlutik taama sunniuteqarsinnaatiginertik, Erik Jensenip, Siumumeersup, oqaatigaa.
Siumut oqaluuserisassanik assigiinngitsunik arfineq-marlunnik Inatsisartut ukiakkut ataatsimiinnerisa immikkoortuanni siullermi saqqummiussaqarsimasoq taassuma oqaluttuaraa.
- Naaperiaallaqqinnitsinnik tamanna takutitsivoq, inatsisissatut siunnersuutivut pillugit aaqqiissutissanik nassaarsinnaalluta, Erik Jensen oqarpoq:
- Siumut akerliuniaannarluni partiiunani partiitoqaasoq erseqqissaatigerusuppara.
Partiip piviusorsiortumik politikkeqarnera inuit maluginiartassagaat taassuma aamma neriuutigaa:
- Suleqatitut tatiginartuunerput, inerititaqarusunnerput piviusorsiortumillu tunngaveqarluta politikkeqarnerput takutereerparput, Erik Jensen oqarpoq.
Anna Wangenheim(D) Naaja H. Nathanielsenilu(IA) naalakkersuisuugaluarlutik Folketingimut qineqqusaarnerat iluarinagu, Siumut naalakkersuisoqatigiinni Inatsisartut upernaakkut ataatsimiinnissaat sioqqullugu naalakkersuisoqatigiinni ilaasortaajunnaarpoq.
Naalakkersuisoqatigiit sulinertik sooq nangeqqinneraat Naleqqap siulittaasuata Pele Brobergip paasisinnaanngilaa, naalakkersuisoqatigiinni allannguisoqarsimanngitsutut sulinerup ingerlaqqinnera apeqquserlugu:
- Partiini illuatungiliuttutuaariarluta illuatungiliuttuni maanna pingasunngorpugut, partiit illuatungiliuttut teknikkikkut suleqatigiilerlutik, Pele Broberg oqarpoq, nangillunilu:
- Politikkertik ingerlatiinnarpaat, nunatsinni partiini anginersaalluni pitsaanerusumik takutitsisussaagaluarluni, siunertani politikkikkullu sukataaruteqarsinnaagaluarluni, pakatsinaqaaq.
Naalakkersuisoqatigiinnissamut isumaqatigiissut suli nuannaralugu, tamannalu allannguiffigineqassanersoq naalakkersuisut nalunaarutigiumaaraat, Jens-Frederik Nielsenip Sermitsiamut oqaatigereerpaa.
Illorsuit, nalunaaquttap allanngortinneqarnissaa aappaagumullu aningaasanut inatsisissaq
Naleraq Inatsisartut ukiakkut ataatsimiinneranni immikkoortuanni siullermi sunniuteqarnerpaasimasoq Pele Broberg isumaqarpoq. Sunniuteqarnerpaasimanerminnulli assersuutit taassuma saqqummiutinngilai, inatsisissatut siunnersuutit ataasiakkaat immikkut tikkuarneqarsinnaannginnerat oqaatigalugu.
- Siunnersuutit ataasiakkaat immikkut tikkuarneq ajorpavut, aningaasanulli inatsit qiviarukku taava takusinnaavat Demokraatit kissaataat marluk ilanngunneqartut, Atassut ataaseq Siumullu marlussuit, allannguutissatullu siunnersuutit 80 procentii Naleqqameersuullutik, Pele Broberg oqarpoq.-
Aappaagumut aningaasanut inatsisissaq pillugu isumaqatigiinniarnerit qanoq ingerlasimanersut KNR-ip uppernarsarsinnaasimanngilai, isumaqatigiinniarnerit matoqqasumik ingerlanneqartarmata.
Siumup inatsisissatut siunnersuutit allallu tulluusimaarutigalugu akuersitissimallugit Erik Jensenip oqaatigaa. Assersuutitut taavai aningaasanut inatsisissaq, Isumannaatsuunissaq pillugu USA-mik isumaqatigiissusiaq, inuit innarluutillit pillugit inatsisissaq, inissiamillu attartuisarnermut inatsisissaq.
Nalunaaquttap UTC -3-mut uterteqqinneqarnissaanut partiip siunnersuutaata qaammatip massuma ingerlanerani akuersissutigineqarnera taassuma aamma tikkuarpaa.
- Nalunaaquttap allanngortinneqarnissaa partiitsinnit pingaartinneqarpoq, qangalilu allanngortinniarneqarsimalluni, Erik Jensen oqarpoq, nangillunilu:
- Ulluinnatsinnut sunniuteqarsimaqaaq. Kalaallit Nunaat isorartoqaaq, nalunaaquttap 2023-mi allanngortinneqarnera pingaartumik Avannaani malugineqarpoq. Soorlu aamma aalisartut piniartullu malugisinnaasimagaat.
Aningaasanik qanoq atuisoqassanersoq inatsisit nutaat Inatsisartut ukiakkut ataatsimiinnerisa immikkoortua siullermi oqaluuserineqarsimasut Erik Jensen isumaqarpoq.
- Pisuussutivut qanorlu isertitaqarnerusinnaanerluta oqaluuserinngilavut, Erik Jensen oqarpoq.
Illorsuarmiut nunaqarfimminnut uteqqissinnaanissaannut misissuisoqalernissaata akuersissutigineqarnera Atassutip siulittaasuanut Aqqalu C. Jerimiassenimut immikkut nuannaarutaavoq.
- Oqaluuserisassaavoq pingaarutilik misigissutsikkullu aamma attuisorujussuugami, Aqqalu C. Jerimiassen oqarpoq:
- Qineqqusaarnitsinni tamanna inituvoq, taamaammat akuersissutigineqarnissaa pingaaruteqarpoq.
‘Siulittaasoqarfik politikkertoq’
Innuttaasut naammatsissimasut 100-t sinnerlugit Inatsisartut ataatsimiittarfiata saavani novembarip ingerlanerani katersuussimapput. Taakku Inatsisartunut qinerseqqittoqarnissaa kissaatigaat.
Innuttaasut Inatsisartuni sulineq pillugu erloqisinnaanerat Erik Jensenip paasisinnaavaa.
- Inatsisartut suleriaasiata allanngortinneqarsinnaanissaa takorloorneqarsinnaavoq. Qanganitsersimavoq allanngortinneqartariaqarlunilu, Erik Jensen oqarpoq.
Naalakkersuisut arlallit Inatsisartut ataatsimiinnerisa nalaanni angalanerat, inatsisartunullu ilaasortat arlallit taasisarnermut isumaqatigiissusiorsimanatik najuutinnginnerat pissutigalugu Inatsisartut ukiakkut ataatsimiinnerisa unitsikkallarneqartariaqarnera taassuma assersuutigaa.
- Naalakkersuisut Inatsisartuniinnatik piffissap ilarujussuani angalasarnerat ilungersunarpoq, Erik Jensen oqarpoq.
Naalakkersuisunut tatiginninnginnermik taasititsinerit sisamat saniatigut, partii Naleraq paasissutissanik isertuussanik saqqummiisimasutut pasineqarlutik Inatsisartut ukiakkut ataatsimiinnerisa immikkoortuani siullermi politiinut tunniunneqarput.
- Politiinut tunniussinermuinnaq tunnganngilaq. Inatsisartut suleriaasiannik unioqqutitsisimanitsinnut allanullu aamma tunngavoq. Siulittaasoqarfik politikkertoq illuatungilertariaqarsimavarput, Pele Broberg oqarpoq.
Politiinut tunniussinermut suliaq suli naammassineqanngilaq.
Inatsisartut ukiakkut ataatsimiinnerisa immikkoortuata aappaa aappaagu januaarip 29-anni aallartissaaq, pilersaarutillu naapertorlugit februaarip aqqarnata tungaanut ingerlassalluni.