Inatsisartunut akerliussutsimik takutitsiartortorpassuusut
Inuppassuit Inatsisartunut akerliussutsimik arfininngornermi takutitsiartorput.
Taakku Inatsisartunut qinersisoqarnissaanut piffissanngorsoraat.
Aaqqissuisup, Juulut Jeremiassenip akerliussutsimik takutitsiartortunut oqaaseqartuusup oqarnera naapertorlugu innuttaasut tusaaneqartutut misigisimajunnaarput.
Taassuma inuuniarnermi aningaasartuutit amerliartuinnarneri ineqarnermullu akisuallaamik akiuteqartarneq ilaatigut oqaatigai.
Politikerit arlallit akerliussutsimik takutitsisunut tusarnaariartorput, taakkununnga Bo Martinsen (D) aamma ilinniartitaanermut naalakkersuisoq, Nivi Olsen (D) ilaapput.
Juulut Jeremiassenip akerliussutsimik takutitsineq Inatsisartuni sisamanngornermi oqallinnermik ilaatigut pissuteqarnerarpaa, tassani naalakkersuisumut, Nivi Olsenimut tatiginnikkunnaarnermik nalunaaruteqartoqarpoq.
- Kingullertigut Inatsisartuni ataatsimiinnerit torinngitsumik pisuutitsisaqattaarnerit ingerlanneqarnerat avaanngunartutut uanga nammineerlunga isigigakkit, taanna oqarpoq.
Nivi Olsen akerliussutsimik takutitsisunut arfininngornermi aamma oqaaseqarpoq. Taassuma akerliussutsimik takutitsisut Jens-Frederik Nielsenip (D) takkutinnginneranut isornartorsiuinerat akissuteqarfigaa.
Kommune Kujallermut tikeraarnini pissutigalugu takkutinngilaq, taanna oqarpoq.
Oqaaseqarneranilu inuit 'naammaleqaaq'-mik nutaamillu qinersisoqarnissaanik suaartarput.
