Atassut naalakkersuisoqatigiinnit tunuartoq

Naalakkersuisoqatigiinni naalakkersuisut Atassummit peqataaffigineqarunnaassapput.

Partii naalakkersuisoqatigiinnit tunuarniarluni aalajangertoq tusagassiuutinut nalunaarummi allappoq.

Tusagassiuutinut nalunaarut naapertorlugu siulersuisuunerit novembarip arfineq-pingajuanni ataatsimiinneranni taama aalajangertoqarpoq.

- Aalajangernerup tunuliaqutaraa Inatsisartut Naalakkersuisullu akornanni pisut kingulliit. Atassut isumaqarpoq Nivi Olseni pisumut akisussaaffik tigullugu Naalakkersuisutut tunuartariaqartoq. Naalakkersuisooqatigiilli Nivi Olsenip ingerlaannarnissaa aalajangiuppaat, Atassutillu isummersuutaat tusaanngilaat, partii tusagassiuutinut nalunaarummi allappoq: 

- Atassut isumaqarpoq maanna naalakkersuisooqatigiinnermi naapertuilluartumik akisussaassuseqartumillu ingerlatsisoqanngitsoq. Taamaattumik Atassut naalakkersuisooqatigiinnit tunuarpoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen, Inatsisartut sisamanngormat ataatsimiinneranni tatiginnikkunnarnermik peqquteqartumik marloriarluni taasissutigineqarpoq.

Taama pisoqarpoq, taassuma KNQK-mut tapiissutit naalakkersuisutut akisussaasuunerminut naapertuutinngitsumik suliarisimagai, Siumut isumaqarmat

Naallu peqatigiiffiup nammineerluni tapiissutit siunertarineqartumit allaanerusumut atorsimallugit nammineerluni nassuerutigereeraluarai, Nivi Olsen inatsimmik unioqqutitsinani isumaqarpoq.

- Inatsit qanoq ilillunga unioqqutitsisimassanerlunga takusinnaanngilara, Nivi Olsen sisamanngornermi oqallinnermi oqarpoq.

Naak Atassut naalakkersuisoqatigiinniikkunnaaraluartoq, Demokraatit Inuit Ataqatigiillu inatsisartuni amerlanerussuteqarput, ilaasortat 31-nit tamarmiusunit taakkunanngaanneersut 18-iullutik.

Ataqqeqatigiinneq aamma naapertuilluarneq naammassineqarsimanngilaq, AtassutIp siulittaasuata tullia, Bentiaraq Ottosen, Facebookimi allappoq.

- Akisussaaffimmik tigusisoqanngilaq aamma naliliinerput najoqqutaralugu naalakkersuinikkut peqataasinnaajunnaarnerput nalunaarutigaarput, Bentiaraq Ottosen allappoq.

Nivi Olsen tusagassiuutinut tallimanngormat allagaqarpoq,tassanilu sooq inatsimmik unioqqutitsisimanngitsutut imminut isiginini nassuiarpaa:

- Tamanna tunngavigalugu kulturikkut sunngiffimmilu ingerlatsineq pillugu Inatsisartut inatsisaanni aalajangersakkat taaneqartut arlaat sorleq unioqqutissimaneriga takujuminaappoq, taanna allappoq. 

Atassutip siulittaasua, Aqqalu C. Jerimiassen, 2027-mi aningaasanut inatsisissaq pillugu isumaqatigiissummut ataasinngornermi atsioqataavoq. Tassani partiip naalakkersuisoqatigiinniikkunnaalerneranik oqaaseqanngilaq. Assi © : KNR / Henriette Simonsen

Bentiaraq Ottosenili allappoq. Partiimik  akisussaaffimmik qimarratiginninneq akuerisinnaanngikkaa.

- Atassut naapertuilluartuummat ileqqorissaarnissarlu ileqqorimmagu, naalakkersuisooqatigiinnit anivugut. Pisut kingulliit inooqataaffigineqarsinnaanngillat, akisussaaffilli pineqartumut sapanginneqarpoq. Tamanna nalilersorluareerlugu aaliangiivugut.

Atassut maanna naalakkersuisuutitaqarpoq. Tassa Maritha Broberg, Isumaginninnermut, Suliffeqarnermut Ilaqutariinnut Nunamullu Namminermut Naalakkersuisuusoq.

Atassut naalakkersuisoqatigiinniikkunnaarmat, inissisimaffik taanna nutaamik inuttalerneqassaaq.

KNR TV-p naalakkersuisut siulittaasuat, Jens-Frederik Nielsen (D), aamma Inuit Ataqatigiit siulittaasuat, Múte B. Egede, apersorniaraluarpai. Taakkuali pisinnaanatik nalunaarsimapput.

Atassutip siulitaasua, Aqqalu C. Jerimiassen, siulittaasullu tullia, Bentiaraq Ottosen, marluullutik KNR TV-mi nalunaaqutaq  20.05 apersorneqassallutik takkutissapput.

Jens-Frederik Nielsen Facebookikkut allappoq, Atasssutip aalajangerneranut qanoq pakatsitiginini oqaluttuaralugu:

- Atassut ullumikkut nalunaaruteqarpoq partiip Naalakkersuisut naalakkersuisoqatigiillu qimallugit tunuarluni. Tamanna uggornarpoq, aamma nassuerutigissavara tamanna qanoq ingerlanneqarnera pakatsissutigalugu, Jens-Frederik Nielsen allappoq.

Naalakkersuisulli siulittasuat suleqatihgiinermut aamma qujaniarpoq:

- Atassut suleqatigiinnitsinnut aammalu akisussaaffeqarnermut peqataasimaneranut qujassuteqarfigerusuppara. Sutigut tamatigut isumaqatigiittarsimanngilagut, kisianni nunatsinnut pingaarutilinnik aalajangiinernut ataatsimoorluta peqataasimavugut.

Aqqalu C. Jeremiassen KNR TV-mut oqaluttuarpoq, partiip naalakkersuisoqatigiinniit tunuarnera siulersuisut piumasaqarnerannik tunngaveqartoq:

- Siulersuisut ataatsimoortut pisussaaffigaannga, Nivi Olsen tunuartariaqartoq, Atassut naalakkersuisooqataaginnassappat. Taamaattoqanngilaq.