Tasiilaq: Meeqqat atuarfillu illoqarfimmi qitiupput

Tasiilami Alivarpiup pisortartaavata meeqqat, angajoqqaat atuarfiullu akornanni attaveqatigiilluartoqarnerulernissaa anguniarpaa. Atuarfik illoqarfimmi qitiusutut isigaa.
Assi © : Markus Valentin / KNR
Allattoq Markus Valentin
novembarip 20-at 2026 07:27
Nutserisoq Medea Olsen

Tasiilami Alivarpimmi pisortaq nutaaq qungujulalluni paarlersuakkoorpoq.

Anna Uzelac Nørgaard Nuummi aqutsisutut misilittagaqareerpoq Misimullu 2022-miilli attuumassuteqarpoq, ukiumut marloriarluni Tunumut angalasarluni.

Tasiilaq, innuttaasut pingaartumillu meeqqat tamatuma kingorna nuannarinerulersimallugit  oqaluttuarpoq.

- Tasiilamut tikeraartarnerujartortillunga nuannarineruleraluttuinnarpara. Illoqarfiuvoq nuannerluinnartoq, Tasiilaq nuannarilluinnarpara. 

Anna Uzelac Nørgaardip ilinniartitsisut eqimattakkaarlutik issiaqatigiinnatik tamarmik oqaloqatigiittarniassammata, ilinniartitsisut inaanni nerriviit allanngortissimavai. Atuarfik qanoq ilillugu ukiuni tulliuttuni pingasuni ineriartortinneqarsinnaanersoq, matumani assersuutaalluarpoq: - Ileqqutoqqanik atuiunnaarneq peqqinnartuuvoq, taamaattumik imminut unammillerpugut. Meeqqat, atuartut inuusuttullu pillugit ataatsimoorluta iliuuseqartariaqarpugut, taanna oqarpoq.  Assi © : Markus Valentin / KNR

Taanna juunimiilli pisortaagallarpoq novembarillu ulluisa aallaqqaataanni atorfinilluni.

- Maaniinnera nuannareqaara, atuarfik, meeqqat sulisullu nuannareqaakka.

Tasiilaq pillugu nangeqattaartuliaq

Allaaserisaq una Tasiilami inuuneq pillugu KNR-ip allaaserisaasa ilagaat.

Tusagassiortugut Tasiilami inunnik assigiinngitsorpassuarnik sapaatip-akunnerata ataatsip ingerlanerani oqaloqateqarput.

Ilungersunartut inuiaqatigiinnilu ullutsinni pisimasut nuannersut allaaserisami matumani sammineqassapput.


Illoqarfimi qitiusoq

Atuarfik 336-nik atuartulik 50-inillu sulisulik illoqarfimmi sammisassarpassuarnut tunngaviuvoq.

Pisortaq Tasiilami Alivarpianut ilisarnaataasoq pillugu aperineqarami, tassaanerarpaa illoqarfimmi qitiunera. 

Atuarfiup igaffia ilaatigut pikkorissarnerni, katerisimaarnerni assigisaannillu aaqqissuussinermi atorneqarsinnaavoq.

Tasiilami Alivarpimmi atuartut sikuiuitsumut ilisimasassarsiortartuusimasoq Knud Rasmussen, sapaatip-akunnerani piorsarsimassutsimut tunngatillugu sammisaqartitsinermi kingullermi, sammivaat. Tasiilarmiut tamarmik meeqqat suliaannik alakkaaqqullugit aggersarpaat.  Assi © : Markus Valentin / KNR

Tasiilami sumi tamaani plakatit Knud Rasmussenimik assiliartallit nivingapput. Atuartut piorsarsimassuseq pillugu sapaatip-akunnerani ataatsimi sammisaqartitsinermi ilisimasassarsiortartuusimasoq pillugu qanoq suliaqarsimanertik Tasiilarmiunut takutinniarlugu atuarfimmut aggersaapput.

- Atuartuutitta pilersitsisinnaassuseqartorujussuunertik ilisarnaatigaat, Anna Uzelac Nørgaard oqaluttuarpoq.

Atuarfiup pisortaata pilersitsisinnaanerup saniatigut timersornerup pingaaruteqassusia erseqqissarpaa, tassanilu isikkamik arsaannermi futsalimilu pissartanngorniunnerni pokalerpassuit kuultit takutippai.

- Arsaanneq maani meeqqanut pingaaruteqaqaaq. Arsartartorpassuaqarpoq pikkorissunik.

Meeqqanut takorluukkat

Anna Uzelac Nørgaardip meeqqat angajoqqaallu tamaasa tikilluaqquniarlugit, atuarfiup isaariaani ukiaanerani atuanngiffeqareernerup kingorna nikorfavoq.

- Atuarfiuvoq eqqissisimanartoq nipaatsorlu, aammali uummaarissoq. Sunngiffimmi sammisartakkani meeqqat tusaaneqarsinnaajuarput, atuarnerullu nalaani eqqissisimasarput nipaallutillu.

Atuarfimmi sulisut ukiup ataatsip ingerlanerani nikerangaatsiarput, taamaattumik Annap aalajangersimasunik atuartitsisoqarnissaa anguniagaraa.

Atuarfiup ukiunut pingasunut tulliuttunut anguniagai sisamaapput: Atuarfiup angerlarsimaffiullu akornanni suleqatiginneq; allanngujuissuseq eqqissisimanerlu; peqataatitsineq, ataatsimoorneq, tamanut inissaqartitsineq; akisussaassueqarnerulernissaq.  Assi © : Markus Valentin / KNR

Aammattaaq siulersuisuusimasut sulisullu atuarfiup ingerlaqqinnissaanut anguniagassanik sisamanik aalajangersaapput.

Anguniakkat assigiinngitsut Anna Uzelac Nørgaardip oqarneratut, 'oqaatsit inersimasunit atorneqartartutut' maannakkut allaqqapput.

Meeqqat anguniakkanik, namminneq paasinnittaasaat aallaavigalugu, allattueqataassapput. Ilinniartitsisut taava meeqqat paasinnittaasaat aallaavigalugu sulissapput. 

- Atuartoq ukioq ataaseq qaangiutsinnagu aperigukku: ’Atuarfiup suna siunertaraa suullu anguniarpai?’, atuarfiup suut anguniagarinerai akisinnaassavaa.

Tasiilami Alivarpimmut takorluukkat suliniutillu

Atuarfiup anguniakkat pingaarnerit sisamat meeqqat, angajoqqaat atuartullu 2026-miit 2029-mut suleqatigiinnissaannut tunngaviusussanngortippai.

1. Atuarfiup angerlarsimaffiullu akornanni suleqatigiinneq

  • Angajoqqaat siunnersuisoqatigiit ataatsimiittarneri, katerisimaarnerit attaveqaqatigiilluartuarnerlu.
  • Angajoqqaat atuarfimmi siulersuisut klassimilu ilinniartitsisup suliaat pillugit paasissutissinneqartuarnissaat.
  • Atuartut atuarfimmi piareersimanissannut sulissuteqarneq.

2. Allanngujaassuseq eqqissisimanerlu

  • Paasissutissat erseqqissut tamanut.
  • Atuartut inersimasut piareersarluaqqasut nukissaqarluarlutillu nuannaarlutik sulisinnaasut naapissavaat.
  • Naasunnguaq sapinngisamik atorluarneqassaaq.
  • Ilinniartitsisut tamarmik atuartitsinissaminnut atuarfimmilu sammisaqartitsinissaminnut piareersimasariaqarput.

3. Tamanut peqataatitsineq, ataatsimoorneq tamanullu inissaqartitsineq

  • Kikkut tamarmik pisinnaasartik aallaavigalugu ataatsimoorfimmeeqataassapput 
  • Kikkut tamarmik oqaloqatigiinnikkut nalilersuinikkullu "inissisimaffissaminnut inissinneqassapput".
  • Kikkut tamarmik akuerineqarlutik assigiinngiffeqarnissamullu pisinnaatitaaffilittut naapinneqassapput.

4. Akisussaaffeqarnerulerneq

  • Angajoqqaat, atuartut sulisullu suliassatik akisussaaffigalugit suliarissavaat.
  • Kikkut tamarmik sapinngisatik aallaavigalugit ikiuutaassapput.
  • Ataatsimoorfiup iluatsilluarnissaanut kikkut tamarmik ikiutaanissaminnut akisussaaffeqarput.

Atuarfik ammasoq

Atuarfiup angajoqqaat atuarfiullu suleqatigiinnerat aallaqqaasiutitut sulissutigaa.

- Atuarfimmi angajoqqaanik oqaloqateqartarneq pingaaruteqarpoq, sapinngisatsinnik suleqatigiilluartariaqarpugut.

Anna Uzelac Nørgaardip ammasuunissaq tassani pingaartippaa. Angajoqqaat tamarmik atuarfimmut tikilluaqqusaajuassapput.

- Angajoqqaat meeqqap ilungersuutai, angusakkai allalluunniit pingaarutillit pillugit ataatsimiigiaqquneqarpata ammavugut. Pulaaritsi.

Assi © : Markus Valentin / KNR

Atuarfiup pisortaata aggustimi pisumit assersuusiorpoq. Ilinniartitsisup atuartut marluk klassimut iserusunngitsut taamani ajornartorsiutigisarsimavai. 

- Ilinniartitsisup angajoqqaat sianerfigai. Angajoqqaat meeqqat qanoq atuarnerat innersoq paasiniassammassuk, kaffisoriaqqullugillu tiitoriaqquai.

- Angajoqqaat atuartitsinermut malinnaarusukkunik aamma ajunngilaq. Tamanna iluatsilluarpoq, taanna oqarpoq. Tamanna iluatsilluarneq pillugu immini oqaluttuaavoq.