Nersorniarneqartoq: Suliniaqatigiiffik Kalaallit Meerartaat nersornaaserneqartoq

Suliniaqatigiiffik Grønlandske Børn - Kalaallit Meerartaat - UNICEF-ip meeqqat pillugit nersornaasiuttagaanik 2026-mi tunineqarpoq. Kalaallit meerartaasa inuusuttullu atugarissaarnerannik, pisinnaatitaaffiinik periarfissaannillu nukittorsaanissamut ukiorpassuarni suliniuteqarsimanera pillugu nersorniarneqarluni.
Evi Kreutzmann, Radiomi pisortartaaq
Evi Kreutzmann, Kalaallit Meerartaanni Nuummi allattoqarfimmi pisortaq. Assi © : Christian Klindt Sølbeck / Pinngortitaleriffik
novembarip 20-at 2026 16:39
Nutserisoq Mads Lynge

Meeqqat inuusuttullu amerlanerusut pitsaasumik peroriartornissamut siunissamilu periarfissinneqarnissaannik pisinnaatitaaffeqartariaqarput.

Tassa suliniaqatigiiffiup Grønlandske Børn - Kalaallit Meerartaasa suliniutigisaasa ilaat.

Meeqqanut inuusuttunullu 0-imiit 23-t tungaannut ukiullit pillugit suliniuteqarsimanertik pillugu UNICEF-ip meeqqat pillugit nersornaasiuttagaanik 2026-mi tunineqarput.

Puk Draibyp, Kalaallit Meerartaanni - Grønlandske Børnimi qullersap, nersornaammik tunineqarnertik qujamasuutigaa:

- Meeqqat, inuusuttut, ilaqutariit, kajumissutsiminnik sulisut aammalu sulisutta ataatsimoornerit nukittunerusut kalaallillu meerartaasa inuusuttullu periarfissaqarluarnerulernissaannut pisinnaatitaaffiisalu nukittorsarnissaannut peqatigiillutik sulinerannik nersorinnissutaavoq pingaarutilik, taanna oqaluttuarpoq, erseqqissaassuteqarlunilu:

- Pingaarnerpaamilli meeqqanut inuusuttunullu nersornaataavoq, taakkumi sapiissuseqarnermikkut, nukittussutsimikkut siunissamullu takorluukkamikkut sulinerup qanoq pingaaruteqartigineranik eqqaasittuartarpaatigut.

Kalaallit Meerartaat suliniutit qulingiluat ingerlatileruttorpai, illoqarfinnilu nunaqarfinnilu tamani najuulluni, nammineq kajumissutsiminnik sulisut 100-ngajaat sulillutik. Suliniaqatigiiffik taassuma saniatigut Københavnimi, Aarhusimi, Aalborgimi, Odensmi Vejlemilu aamma najuuppoq.

Allattoqarfimmi pisortap Evi Kreutzmannip nersornaaserneqarneq aamma nuannaarutigaa, suliniaqatigiiffiup sulilluarneranik nersorinninnertut isigalugu, isumaqaqisorlu:

- Kalaallit Nunaanni suliniaqatigiiffik nukittooq sivisuumik sulissutigalugu pilersipparput, meeqqallu najugarisaanni meeqqat qanillugit suliniuteqartarnissap qanoq pingaaruteqartiginera UNICEF-ip Meeqqat pillugit nersornaasiuttagaanik tunineqarnitsigut naqissuserneqarpoq. Qaanaamiit angerlaqqammerpunga, tassanilu meeqqanik illersuisartussanik nutaanik sisamanik ilinniartitsivugut, Qaanaami meeqqanik tapersersuisussanik.

Immikkut suliniuteqarsimasut nersorniarneqartut

UNICEF-illu meeqqanut nersornaasiuttagaanik siornatigut tunineqarsimasut aamma imaannaanngillat.

Ikiuiniaqatigiiffiit assigiinngitsut nunani tamalaani aaqqiagiinngissuteqarfiusuni ajunaarnersuaqarfiusunilu meeqqat pillugit suliniuteqartut siorna nersornaaserneqarput.

Nersornaaserneqartoq ataatsimiititaliamit arlaannaannulluunniit attuumassuteqanngitsumit, innuttaasut ilaannit, inuussutissarsiuteqartunit, meeqqat inuusuttullu pillugit sulisunut aamma UNICEF Danmarkimit ilaasortaaffigineqartumit tunniunneqartarpoq. Inummut, suliniaqatigiiffimmut ataatsimulluunniit suliniuteqartunut nersornaasiisoqartarpoq, meeqqat inuusuttullu pisinnaatitaaffii periarfissaalluunniit pillugit immikkut suliniuteqarsimasumut tunniunneqartarluni.

Taamaammat Kalaallit Meerartaasa nersornaaserneqarnerat nuannaarutissaavoq, suliniaqatigiiffik meeqqat inuusuttullu pillugit tamanna pillugu suliniuteqartuassalluni. Evi Kreutzmanna taama oqaluttuarpoq:

- Meeqqat inuusuttullu tamarmik aalajangiinerni inuunerminnut tunngasuni tusaaniarneqarnissaminnut peqataatinneqarnissaminnullu pisinnaatitaaffeqarput, tamannalu meeqqat namminneq pisariaqartitaat aallaavigalugit toqqissimanartumik ingerlattariaqarparput, meeqqat naligalugit naapillugit oqaloqatiginerisigut, meeqqallu namminneq oqaasii sumiorpaluutaallu atorlugit. 

Suliniaqatigiiffiup Kullorsuarmi, Nanortalimmi, Qeqertarsuarmi Narsamilu suliniuteqarneranut tamanna aamma atuuttoq, taanna itisiliilluni oqarpoq:

- Illoqarfinni nunaqarfinniluunniit taakkunani ilaqutariit, meeqqat inuusuttullu toqqissisimanartumik, pitsaasumik ineriartorfissaqarluartumillu inuunissaat sulissutigaarput. Suliniutit najukkani ataasiakkaani pisariaqartitat aallaavigalugit ineriartortarput. Kalaallit Nunaanni taamatut suleriaaseqarpugut, Evi Kreutzmann oqarpoq.
UNICEF-ip meeqqanut nersornaasiuttagaa meeqqat ulluanni novembarip 20-anni 2015-imili tunniunneqartarsimavoq.