Tasiilaq: Skotlandimiut suliniutaata pinngortitaq atuartitsivinngortippaa
Inuit assigiinnik atisallit Tasiilap avataani ukiumi sikukkut ingerlaarput.
Aappaaguani aamma taama pisoqaqqippoq.
Anguteerannguaq nunap immikkoortuani pisortap Hjørdis Vibergip matuatigut ullut ilaanni kasuttorpoq. Taanna ateqarpoq Craig Mathieson, Issittumilu ilisimatusartuulluni Skotlandimeersoq.
Taassuma oqaluttuaraa Skotlandimi illoqarfinni aatsitassarsiorfiusuni inuusuttut amerlasuut ajornartorsiuteqartut. Atuarfimmi ajornartorsiuteqartarput, suliffissaaleqisut amerlapput, inuunerminnilu anguniagassaminnik takorluugaqartanngillat.
Taamaammat Tasiilaliaqatigai pinngortitamut ilagalugit tarnikkut nukittorsarnissaat siunertaralugu.
Hjørdis Viberg eqqarsaleriataarpoq: - ’Taakkua ajornartorsiutaat inuusuttatta ajornartorsiutaannut assingorpasipput.’
Kommuneqarfik Sermersooq aamma Tasiilami Alivarpi peqatigalugit Polar Academy Greenland pilersinneqarpoq.
Ukiumi atuarfiusumi matumani immikkut atuartinneqartartut klassinit assigiinngitsuneersut klassimut nutaamut ataatsimoortinneqarput.
Tassani meeqqat atuarfianni atuarnertik naammassissavaat, pinngortitami atuartinneqassallutik, namminnerlu kulturiminnut attuumassuteqarnerulissallutik.
Meeqqat tulluusimaartut, angajoqqaat tulluusimaartut
Søren Skov ilinniartitaanermut suliniummik aqutsisuuvoq. Taanna oqaluttuarpoq Skotlandimi misilittakkat qanoq atorluarneqarsinnaanersut pillugit annerusumik piareersaataasumik suliaqartoqarsimasoq.
- Skotlandimi inuusuttut angajoqqaavilu apersorpavut, suliniutip inuunerminnut qanoq sunniuteqarnera pillugu oqaluttuaat killitsinnartorujussuit tusarnaarlutigit.
- Qularunnaarpugut Tasiilami aamma taamaaliorsinnaalluta, Tunumi pissutsinut naleqqussarlugu.
Angajoqqaat suliniummi pingaarutilimmik inissisimapput. Meeqqaminnik tulluusimaarinninnissaq ilinniassavaat, meeqqallu aamma angajoqqaaminnik tulluusimaarinninnissartik ilinniassallugu.
- Skotlandimi misilittakkat takutippaat angajoqqaat meeqqamik ineriartornerat misigigaangamikku, tamanna aamma inuunermi allanik toqqaanissaminnut isumassarsisitsisinnaasartoq, Søren Skov oqarpoq.
- Tamanna sunneqatigiiffiuvoq; inersimasunut aammattaarli inuiaqatigiinnut sunniuteqarluni.
Hjørdis Viberg oqaluttuarpoq meeqqat immikkut atuartinneqartartut angajoqqaavisa ilarpassui ajortoqartillugu atuarfimmut aatsaat attaveqartartut.
Erseqqissarpaa meeqqat immikkut klassini atuartut ajoquteqanngitsut. Immaqa taamaallaat allaanerusumik eqqarsariaaseqarsinnaapput. Tamannalu ilinniartitsinerup ilanngullugu piareersimaffigisinnaavaa.
- Inuusuttut arlaannaalluunniit silappaarissutsimik amigaateqanngillat. Ajoquteqanngillat. Aaqqissugaanermununa inissinniapiluuginnartut.
Skotlandimi pisuttuarnissaq
Atuartut Skotlandip qaqqaqarfiini sivisuumik maajimi pisuttuariassapput. Taamatuttaaq inuusuttut Skotlandimiut Tasiilaliassapput, inuusuttoqatiminnit Tasiilameersunit pinngortitami takornariartinneqarlutik.
Søren Skovip nangilluni oqaatigaa Skotlandimi Polar Academymi inuusuttut 60–70 procentii ingerlaqqiffiusumik ilinniagaqalersartut.
- Taama pisoqarnissaa neriuutigaarput, tassalu Tasiilami inuusuttut inuunerminni suniarnerminnik paasiniaanissamut sapiissuseqalernissaat inuunerminnilu peqqinnartunik toqqaallutik. Paasillugu inuunermik pitsaasumik pilersitsinissaminnut nukissaqarluarlutik.
Hjørdis Viberg oqaluttuarpoq Tasiilami inuusuttut amerlasuut meeqqat atuarfianni inaarutaasumik misilitsittanngitsut.
- Isumaqarpunga tamanna attuumassuteqartoq, amerlasuut immikkut klassimi atuarnerannut. - Taamaattumik Polar Academy isumalluutigaarput, Hjørdis Viberg oqarpoq.
Ulloq naallugu aamma anitsiarsinnaagaluarpugut. Soormi atuakkat atorlugit issialluni ilinniartoqanngila, matematikkimik ilinniarluta pikkorinneruleriartorlutalu?
- Matematikkimik ilinniartarput, Søren Skov oqarpoq.
- Nunat tamalaat akornanni piumasaqaatit naapertorlugit sumiissusersiornermik allagartartaassapput. Tassani ilinniartarput ilikkagassatik atuutigalugit ilinniartarlugit.
- Atuarfimmi aamma Skotlandimeersumik ilinniartitsisoqarpoq, meeqqanik tuluttut ilinniartitsisumik. Taamaalillutik meeqqat tuluttut ilinniarlutik aallartereerpaat.