Nivi Olsenip nalunaaruteqarnerata Atassutillu naalakkersuisoqataajunnaarnerata kingorna: Politikerit killiffik pillugu ataatsimiipput
Partiit tamarmik KNR TV-mi marlunngornermi unnukkut najuupput.
Ulluni kingullerni najummassimanartorsiorneq tassani oqaluuserissavaat.
Ilinniartitaanermut, kultureqarnermut, timersornermut ilageeqarnermullu naalakkersuisumut Nivi Olsenimut (D) tatiginninnginnermik taasititsinissamik marloriarluni sisamanngormat siunnersuuteqartoqarpoq.
Atassut Nivi Olsenip atuuffimminiiginnarnissaa akisussaassuseqanngitsuliornerusorigamiuk naalakkersuisoqatigiinnit tunuarluni ataasinngormat nalunaarpoq.
Nivi Olsenilu naalakkersuisutut tunuarluni marlunngormat nalunaarpoq.
Nivi Olsenip partiineersullu sinneri suliaq pillugu qanoq oqarnersut maani malinnaaffigisinnaavat.
Nivi Olsen tunuarnini pillugu
Kattuffiup KNQK-p aningaasaliissutit allamut atorsimaneri pissutigalugit Nivi Olsen tatigineqarunnaarpoq.
Inatsisartut sisamanngornermi ataatsimiinneranni tamanna pivoq.
- Itisilernerulaassagukku politikkikkut suliaq Avannaata Qimussersua initusimavoq, Nivi Olsen KNR TV-mut oqarpoq:
- Aamma ukua tatiginnikkunnaarnermik taasisitsinerit sivikitsunnguup iluani pingasut illuatungiliuttunit tunniunneqartut tassunga tunngassuteqarput. Avannaata Qimussersua kulturerput assorujussuaq erligivara aamma attatiinnarnissaa nunatsinni pingaaruteqartutut isigivara.
- Inatsiseqarpugut inatsisillu ataani tamatta sulisussaalluta taamaattumik naatsorsuutai pisussaaffinga malillugu tigunikuuakka tassanilu takusinnaalerlugu eqqoqqissaanngitsumik siunertamut atorneqarsimasut aningaasat 500 tusindit sinnerlugit, Nivi Olsen oqarpoq.
Taanna suliap suliarinerani inatsimmik unioqqutitsisimannginnerarpoq.
- Aaqqipparput kisianni tassa illuatungiliuttut isumaqarput inatsimmik unioqqutitsisimasunga taannali uanga inatsimmik unioqqutitsineq paragraf tamaaviisa inatsisilerituut pingasut peqatigalugit suliarinikuuara, nalunnginnakku qanoq kinguneqarsinnaasoq uniuinguma, Nivi Olsen oqarpoq.
Illuatungiliuttut nutaat
Nivi Olsenip apersorneqareernerata kingorna illuatungiliuttut pingasut apersorneqarlutik aallartipput. Naleqqamit Pele Broberg, Siumumit Erik Jensen Aqqalu C. Jerimiassenilu.
- Uagut Atassummit ataatsimilluunniit siunertarinngilarput, naalakkersuisoqatigiinnik uppisitsiniarnissaq. Pisussaaffik uanga isiginngilara qinikkatut, taamannak akiniaanermik sumilluunniit peqarnissaq, Aqqalu C. Jerimiassen oqarpoq nangillunilu:
- Naapertuilluarnermik siunertaqarluta taama qisuariaateqarnikuunerput, patsiseqartoq pereernerani tunuarnikuuvugut naalakkersuisoqatigiinninngaanniit.
Illuatungiliuttut naalakkersuisunik maanna suliatut ittuni nakkutilliinissaq suliassarigaat Pele Brobergip erseqqissaatigaa.
- Uagut ajoqusersuiniarluta illuatungiliuttuunngilagut, uagut nakkutilliiniarluta illuatungiliuttuuvugut.
- Ajoraluartumik maannakkut nassuerutaasoq naalakkersuisoqatigiinnit akisussaaffik namminneq tigujumanagu allat anisittariaqarsimavaat naalakkersuisoqatigiinnit.
Erik Jensenip oqarnera naapertorlugu, Nivi Olsenimut suliaq ilungersunartuuvoq.
- Ilungersunartutut isumaqarfigivara, naalakkersuisuusimasuminngaanniit imatut nipeqartinneqarmat, Inatsisartuni ataatsimiititaliat marluk, tassa Inatsisartunut ilaasortat qulit, isumaliutissiissutaat.
Taanna Nivi Olsenimut tatiginninnginnermik taasititsinissamik siullermik siunnersuuteqartuuvoq.
- Ilungersunartutullu isigisaat, eqqunngitsumik tunngaveqarluni suliaasimasoq. Inatsisilerituut Inatsisartunilu atorfilittat suliarisimasaat atorsinnaanngitsutut nipeqartinniarneqarnera ilungersunartuuvoq, Erik Jensen oqarpoq, nangillunilu.
- Takusinnaanngikkaanni ilungersunartoqartoq, inatsisillu sorliit toqqammavigalugit tatiginninnginnermik taasititsisoqartoq, taava ajornartorsiut allamiissimassaaq.
Naalakkersuisoqatigiinni partiit marluk
Inatsisartuni qinigaasuni 31-ni 18-it Demokraatineersuullutillu Inuit Ataqatigiinneersuupput.
Pissutsit ulluni kingullerni ineriartorneri uggornartut Demokraatit naalakkersuisullu siulittaasuat oqarpoq. Atassutilli aalajangernera ataqqillugu taanna nangilluni oqarpoq.
- Maannakkut kingorna oqariartuutaat aamma tunngavilersuutaat tusaavakka aamma taama misigisimassappata paasisinnaavakka, kisianni uannut sioqqutsisumik apuussisoqarnikuunngilaq taannalu uggoraara, Jens-Frederik Nielsen oqarpoq.
Naalakkersuisoqatigiilli partiinit maanna marlunnit peqataaffigineqartut ingerlariaqqissinnaanerat aamma nuannaarutigaa.
- Politikkip ullumi nunatsinni ineriartornera qiviarutsigu ullumikkut ullut kingulliillu tassa taamaapput. Tassa atugassarititaasut.
- Uagut aaqqiissutissanik siumullu isigisunik inuiaqatigiit qanoq pittaanerpaamik sullissinnaaneringut taanna ujartortariaqarparput taannalu qujamasuutigivara naalakkersuisoqatigiinni toqqarneqarmat, Jens-Frederik Nielsen oqarpoq.
Inatsisartuni akerleriinnerit qitiutinneqarnerunerat uggornartoq, Múte B. Egede isumaqarpoq.
- Siullertut soorunami oqaatigisariaqarpoq pissutsit imatut ingerlalillaraangata uggornartuaannarpoq suliassat naammassisassallu qitiujunnaarlutik akerleriinnerit qitiulillaraangata tamaavitta pisussaaffilernikuuvugut, Múte B. Egede oqarpoq.
Taassuma neriuutigaa naalakkersuisoqatigiit nutaaq taassumap partiia Demokraatillu sulinerat ingerlaqqissasoq:
- Uungali ingerlariaqqittariaqarnerput isumaqarpugut massakkut toqqammaviusariaqartoq aamma naalakkersuisoqatigiinni ingerlavigiumasarput inuiaqatigiit pillugit qineqqusaarnikuuvugut, nunarput pillugu qineqqusaarnikuuvugut kiffartuussiumalluta aqqutissat inuiaqatigiinni eqqortut suliarissallugit tamatigut, Múte B. Egede oqarpoq.
Taassumali partiit allat suleqatigisinnaanissaanut assani isaappai:
- Inunnit tamanit isumaqaatigineqanngikkaluartut ingerlaviginiassallugit suleqatigiittussaavugut.
Jens-Frederik Nielsen Múte B. Egedellu oqaatigaat naalakkersuisoqatigiit suli nukittuumik inissisimasut.
- Inuiaqatigiinnut oqarusuppunga naalakkersuisuni soorunami nukittuumik inissisimalluta suli pisussaaffigut naammasserusuppagut, Jens-Frederik Nielsen toqqaannartumik inuiaqatigiinnut taama oqarpoq.
