Kommune Qeqertalik: Eqqakkat ajornartorsiutaasut utaqqiisaagallartumik akuerisariaqassavagut
Kangaatsiami innuttaasunit isornartorsiutigineqangaatsiarnerata kingorna ajornartorsiut namminneerlutik kivissinnaanngikkitsik, Kommune Qeqertalimmi teknikkimut ataatsimiititaliami siulittaasup Kristian Jeremiassenip KNR-imut miserratiginagu oqaatigaa.
KNR-ip Kommune Qeqertalimmi borgmesteri oqaaseqaatinniarsimagaluarpaat, maannali bestyrelsimi ilaasortaq Kristian Jeremiassen oqaaseqarpoq.
- Eqqakkat maanna ajornartorsiutaasut utaqqiisaagallartumik akueriinnartariaqassavagut.
Kommunip illoqarfiini nunaqarfiinilu eqqakkanik ikuallaasalertoqarnissaanut Namminersorlutik Oqartussat akuersissummik tunniussinissaat kissaatigigini, taassuma oqaatigaa.
Kisimiilluni ajornartorsiut kivissinnaanngikkaa
Eqqakkat amerliartuinnarnerat Kangaatsiami innuttaasunit isornartorsiorneqarlunilu qatsunneqartoq pillugu nutaarsiassaq KNR-ip qaammat kingulleq saqqummiuppaa. Innuttaasoq ilaatigut oqaluttuarpoq qimmimi anaani plastikkikumik nassaarsimalluni oqaluttuaraa.
Kristian Jeremiassenip ajornartorsiut imaannaanngeqisoq ilisimavaa. Ajornartorsiut kommunip kisimiilluni kivissinnaanngikkaa, taanna oqarpoq.
Teknikkimut ataatsimiititaliami siulittaasoq naapertorlugu, sumiiffimmi eqqakkanik ikuallaanissamut inerteqquteqarnerup, pinngortitami imaanilu malunnaatilimmik mingutsitsisoqarneranik kinguneqartoq.
Poortuinerup sulisullu akornanni oqimaaqatigiissaarineq
Eqqakkanik Kangaatsiameersunik aallerlutillu ikuallaasarnissaq eqqagassalerisut suliassarigaat, KNR-ittaaq ESANI a/s-imiit oqaaseqaat siornatigut saqqummiunnikuuaa.
Eqqakkat ikuallanneqarsinnaasut poortoriikkallu kisiisa aasinnaagaat, ESANI-mi pisortaq KNR-imut tassani oqarpoq.
Sooq eqqakkat taamak annertutigisut poortorneqarsimannginnersut pillugit KNR-ip Kommune Qeqertalimmiit paaserusuppaa.
Kangaatsiami eqqakkanut poortuisussanik imaluunniit eqqagalerisussanik qassinik sulisoqarpisi? KNR-i aperivoq
- amerlanerusunik sulilersitsinissaq maanna isumaliutersuutaavoq. Kangaatsiami sulisussanik allanik ujartuineq aallartereersimalersoq paasitinneqarpunga, Kristian Jeremiassen oqarpoq.
Kommunip allaffiani maanna sukannernerusumik nakkutilliisoqalernikuusoq, kisianni qaqugu ajornartorsiummut aaqqiissutissaqalerumaarnersoq iluamik oqaatigisinnaanngikkini, taassuma aamma oqaatigaa.
