Kommune Qeqertalimmi ammaannartumik ikuallaasoqarsinnaalertoq

Kommune Qeqertallip illoqarfiini nunaqarfiinilu eqqagassanik ammaannartumi nakkutigisamik ikuallaasarnissamut qinnuteqaataa maanna Naalakkersuisunit akuerineqartoq.

Avatangiisinut Pinngortitamullu Naalakkersuisoqarfik tusagassiutinut nalunaarummi allappoq.

Kommune Qeqertalimmi eqqagassaqarnikkut killiffiup nukiginnarnera pissutigalugu immikkut akuersissuteqartoqarpoq.

- Nuummi Sisimiunilu nuna tamakkerlugu ikuallaaviit, marluullutik maanna ingerlasut sananerisigut siumut eqqortumik alloriarpugut. Kisiannili najukkani suli eqqagassalerinerup unammillernartoqartinneqarnera paasisinnaavarput, taamaattumillu Naalakkersuisut nakkutigisamik ammaannartumik ikuallaasarnissamut immikkut ittumik akuersissuteqarallarsinnaanermut periarfissaqarput, tamannalu maanna Kommune Qeqertalimmut nalunaarutigineqarpoq,

Avatangiisinut Naalakkersuisoq Bentiaraq Ottosen (A) tusagassiunut nalunaarummi oqarpoq.

Kommune Qeqertalimmi illoqarfinni nunaqarfinnilu ukunani ammaannartumik ikuallaasoqarsinnaaneranut immikkut ittumik akuersissuteqartoqarpoq: Qasigiannguit, Kangaatsiaq, Attu, Ikerasaarsuk, Iginniarfik, Niaqornaarsuk, Kitsissuarsuit, Ikamiut, Akunnaaq, Qeqertarsuarlu.

Eqqagassalerineq kommunit akisussaaffigaat, kommunalbestyrelsilli ammaannartumik ikuallaasarnissamut immikkut qinnuteqarneratigut, naalakkersuisut decembarip 31-ata 2025-ip tungaanut immikkut akuersissummik tunniussigallarsinnaasut, tusagassiutinut nalunaarummi allaqqavoq.

Ammaannartumi ikuallaasarnissamut immikkut akuersissut decembarip 31-iata tungaanut atuutsinneqarpoq.