Kangaatsiami innuttaasoq: Qimmima anai plastikkikoqartarput

Kangaatsiami innuttaasut naammagittaalliorput. Eqqagassammi amerliartuinnartut qatsuppaat. 

- Oqariartuutigisinnaavara eqqagassalerineq eqqarsaatigissagipput eqqagassallu iluamik isumagalugit. Eqqagassat Kangaatsiami innuttaasunut ajornartorsiutinik pilersitsigaluttuinnassanngippata, katersorneqassapput isumannaatsumillu assartorneqassallutik.

Pavia Nukaaraq Siegstad taama oqarpoq. Taanna Kangaatsiami aalisartuuvoq qimmiuteqarlunilu.  

Taanna KNR-imut oqarpoq, ikuallaaviup isaterneqarnerata kingorna taamatut inissisimaneq ajorsigaluttuinnarsimasoq.

Eqqagassat eqqaavissuarmiittussaagaluarput, eqqagassalli ima amerlisimatigaat qimmilivimmut, imeqarfimmut illunullu kiisa anngukkiartulersimallutik. 

Anori tukatsitsivoq

Pavia Nukaaraq Siegstad arlalippassuariarluni qimmimi anaani plastikkikunik nassaartarsimalluni oqarpoq.

- Qimmera ataaseq anarneq ajulersoq naammattoorpara.  Plastikkikoq kaanngarneq ajulersoq nusullugu peertariaqarnikuuara, taanna oqarpoq.

Anorlerpallaaleraangat eqqagassat eqqaavissuarmi teqqaasarput, taamaattoqartillugu eqqagassat ilai qimminut teqqakaasarput, taanna oqarpoq. 

Taanna KNR-imut aamma oqarpoq, eqqagassat anorimiit teqqakaatinneqarsimatillugit torersaasarlutik, ukiassaraangalli ukiukkullu anorlertillugu, torersaaginnaavinnissaq ajornarsisartoq. 

Erngup eqqiluitsuutinnissaa suliarujussuusoq

Naalakkersuisut ukioq manna juli 25-ani Kangaatsiami innuttaasunut innersuutigaat imeq qalaateqqaartassagaat. 

- Imeq iganermut kingutigissarnermullu atorneqartinnagu minnerpaamik minutsimik ataatsimik qalatinneqaqqaarneqassaq innersuutaavoq. (Assersuutigalugu iganermut kigutigissarnermiluunniit).

- Misissuinerit nutaat erngup ajoquteqarunnaarneranik takutitsippata, qalatitsinissamut innersuut unitsinneqarumaarpoq.

Pavia Nukaaraq Siegstad aalisartuuvoq, pisanilu illoqarfiup aalisakkerivianut tunisarpai. Tassanili erngup minguitsuutinniarnera aamma ajornartorsiutaavoq, taamaattumillu inussutissarsiorniarnera tassuuna aamma sunnerneqarpoq.

Pavia Nukaaraq Siegstad naapertorlugu, Kangaatsiami innuttaasut imeq atunnginnerani qalateqqaarnissaanut piffissarujussuaq nukippassuillu atortarpaat. Eqqagassallu ajornartorsiummut peqqutaanerarpai. 

- Ukiut tamaasa bakteerianippallaakulavoq, imeqarfik eqqaavissuarmut qanippallaarami. Taakku 500 meterit inorlugit imminnut ungasissuseqarsoraakka, taanna oqarpoq. 

- Qimmiutikka  illersorusukkakkit, soorunami aamma innuttaaqatikka illersorusukkakkit filmiliaq taanna Facebookkimut ikkunnikuuara, Pavia Nukaaraq Siegstad naggasiivoq.

Esani A/S KNR-imiit attavigineqarpoq, taakkulu Kangaatsiami ajornartorsiut pillugu oqaaseqarput. Taamaammat KNR nutaarsiassamut tuungasumik saqqummeeqqissaaq.