ESANI-mi pisortaaneq: Eqqakkat poortorneqarsimasuuppata aasimassagaluarpavut
Kangaatsiami eqqakkat annertuumik ajornartorsiutaanerat eqqagassalerisunut ESANI A/S-imut ilisimatitsissutigineqakkajuttarpoq.
Eqqakkat amerliartuinnarnerat illoqarfiullu ernganik mingutsitinerat KNR-imiit sapaatip-akunnerata siuliani allaaserineqarpoq. Innuttaasoq immiussisimavoq illoqarfimmilu eqqakkat qanoq initutiginerat immiussamini takutippaa.
ESANI-mi pisortaaneq, Frank Rasmussen, naapertorlugu, eqqakkat ikuallajasut poortornikuinnaat ESANI-miit aaneqaqqusaasut, ESANI-p kommunillu akornanni isumaqatigiissutaavoq.
- Eqqakkat immikkoortiterneqarnissaat eqqakkallu ikuallajasut poortorneqarnissaat kommunemi ingerlatsisut suliassarivaat, aasinnaaniassagatsigit, Frank Rasmussen oqarpoq erseqqissaallunilu:
- Eqqakkalli ikuallajasuunngitsut kommunep allatut isumagisassaraat.
ESANI A/S-ip siulersuisuni, nunami kommuninit tamanit sinniisullit, eqqakkat ikuallajasuunngitsut isumaginissaannut ikiuussinnaanersut aperiniarlugit saaffigisimagai, Frank Rasmussenip aamma KNR-imut oqaluttuaraa. Frank Rasmusenili naapertorlugu eqqakkat ikuallajasut kisimik isumagineqarsinnaasut, ESANI ilisimatinneqarsimavoq.
Tamakkiisumik atorsinnaalersut
Qanoq akulikitsigisumik Kangaatsialiartarpisi? KNR aperaaq.
- A tassami, qaammatit tamaasa taamaaliortalerniarpugut, Frank Rasmussen akivoq.
Siornatigut qaammatit pingasukkaarlugit Kangaatsiamut eqqakkanik aallertoqartartoq, ESANI-mi pisortaaneq oqaluttuarpoq. Kingullermik juunip 21-ani illoqarfimmiipput.
ESANI-p Nuummi Sisimiunilu ikuallaaviit nutaat qanittukkut pilersippai. Pisortaaneq Frank Rasmussen naapertorlugu ikuallaaviit maanna tamakkiisumik atorsinnaalerlutillu ulluinnarni ingerlatsineq aallartilluinnalersimavoq.
ESANI-p Kangaatsiami ingerlatsisunik oqaloqateqarneranit sapaatit-akunneri marluk qaangiupput. Frank Rasmussen naapertorlugu eqqakkat poortorsimasut 200-t aaneqarnissaminnut piareeqqasut tassani paasissutissiissutigineqarsimavoq.
ESANI tulliani sapaatip-akunnerani 38-mi illoqarfimmut tikissasoq, pisortaaneq oqarpoq.
Eqqakkat aaneqarniassammata sooq poortorneqartannginnersut kiisalu eqqakkat ikuallajasuunngitsut qanoq pineqartarnersut paaserusullugu KNR-ip Kommune Qeqertalik attaveqarfigisimavaa. KNR-ip Kommune Qeqertalimmi borgmesteri aamma attaveqarfigaa akissuteqarnissaalu utaqqillugu.
