Tusass immikkut ittumik ataatsimeersualersoq
Namminersorlutik Oqartussat pigisaa Tusass aqagu immikkut ittumik ataatsimeersuassaaq.
Ataasimeersuarnermi siulersuisunik siulittaasumillu taasisoqassaaq.
Naalakkersuisut nutaat Namminersorlutik Oqartussat suliffeqarfiutaanni ataatsimeersuarnerit allaffissornerinnakkut ataatsimeersuarnerusalissasut ukioq manna siusinnerusukkut aalajangernerat tunngavigalugu ataatsimeersuartoqalerpoq.
Pisortat nikinneri
Tusassip pisortaata Toke Binzerip atorfini qimallugu Royal Greenlandimi pisortanngulernera qaammammi matumani siusinnerusukkut saqqummiunneqarpoq.
Taanna Tusassimi 2024-mi marsimili pisortaareerluni nutaami decembarip aallaqqaataaniit pisortanngussaaq.
Taassumali attaveqaasersuinermi suliffeqarfiup septembarimi ukiuni 100-nngortorsiornera 2025-mullu ukiup affaanut nalunaarutip nassiunnissaa angumerai.
Aningaasaqarneq aalakkaasoq
Nalunaarusiap qaammammi matumani siusinnerusukkut saqqummersup aningaasaqarnerup ineriartornera pitsaasuusoq takutippaa.
Nalunaarusiamimi 74,4 millionit koruuninik sinneqartooruteqarnissaq ukiumullu angusat akileraarusinnginneranni 160-it 170 millionillu akornanniittussatut naatsorsuutigineqartut allassimavoq.
Tamatumali saniatigut Tusassip illoqarfinni pingasuni tassa Aasianni, Qaqortumi Maniitsumilu pisiniarfitik matuai, tamanna allakkat nassiunneqartartut ikilernerat ilaatigut pissutaavoq.
Ukiup affaanut nalunaarusiami suliffeqarfiup allakkanit nassiussanillu kaaviiaartitai 6 procentimik tassa 2,4 millionit koruuninik appariarsimasut aamma atuarneqarsinnaavoq.
Periusissiaq nutaaq
Suliffeqarfiup 2028-p tungaanut periusissiaq nutaaq ukiup aallartinnerani aamma saqqummiuppaa, tassani digitalikkut sillimaniarneq, teknologiinik nutaanik atuutsitsilerneq, internettikkut attavinnik sukkanerusunik akikinnerusunik tunniussaqarsinnaaneq sullitanillu kiffartuussineq pitsaanerusoq ilaapput.
Ukiup affaanut nalunaarusiami pisortap Toke Binzerip periusissiami nutaami illoqarfinni annerusuni nunaqarfinnilu attavinnik sukkanerusunik neqerooruteqarnikkut alloriarnerit siulliit aallartinneqareersut erseqqissaatigaa.
Tusassip periusissiami nutaami anguniakkat piviusunngortinniarlugit 1,9 milliardit koruunit suliffeqarfiup oqaluttuarisaanermi qaffasinnerpaamik aningaasaliinissaanut pilersaarutigaa, aningaasanit taakkunannga 350 millionit EU-mit tapiissutigineqartussatut naatsorsuutineersuupput.
