Qeqertarsuarmi napparsimmaviup ammasarfii toqqissisimanngissutaasut: - Qaatunniaritsi

Peqqinnissaqarfiup illoqarfinni nunaqarfinnilu 1600-t ataallugit inoqartuni napparsimmafiit nal. 16.00 matusalernissaat aalajangerpaa. Kommune Qeqertalimmi borgmesterip, Simigaq Heilmannip (D) tamanna akuersaarneqarsinnaannginnerarlugu Naalakkersuisut siulittaasuat kiisalu Peqqissutsimut inunnullu Innarluutilinnut Naalakkersuisoq, Anna Wangenheim sakkortuumik isornartorsiorpai.

- Qaatunniaritsi, uagut aamma nunatsinni najugaqarpugut, borgmesteri tusagassiuutinut nalunaarummi allappoq.

Taassuma peqqinnissaqarfinnut sipaarniartoqarnera nunatsinni isorliunerusuni inuuniarnermut ajornerulersitsisinnaanera ernumassutigai. Taassumalu tusagassiuutinut nalunaaruteqarnermini isorliuneruni innuttaasut allatulli naleqartut erseqqissaatigaa.

Qeqertarsuarmi innuttaasut 800-t missaanniipput. Borgmesterilu innuttaasut pillugit ernumassuteqarpoq.

- Illoqarfik angisoorsuunngikkaluarluni ukiorpassuarni aalajaatsunik toqqissisimaffigisatsinnik nunaqavissunik peqqissaasunik sullissisoqarpugut. Ernumavunga sulisut pikkorissut illoqarfipput qimattariaqalissappassuk, taanna oqarpoq.

Politikerinit arlalinnit taperserneqartoq

Inuit Ataqatigiit isorliunerusuni peqqinnissaqarnerup toqqissisimanarnissaa aamma piumasaraat. Taakku illoqarfinni nakorsatut atuuffinnik piiaasoqarnera innangavinnillu atorunnaarsitsineq tulluannginnerarpaat.

- Naligiimmik toqqissilluta nunatsinni sumiikkaluaruttaluunniit najugaqasinnaasariaqarpugut. Inuit illoqarfinni inukinnerusuni aamma najugallit tamaavimmik naleqarput, Paarma Lund Kreutzmann tusagassiuutinut nalunaarummi Inuit Ataqatigiit sinnerlugit nassiunneqartumi oqarpoq.

Politikeri alla – tassa kommunalbestyrelsimut ilaasortap, Aqqa Samuelsenip (S) borgmesterip nalunaarutaa taperserpaa.

Taassuma aalajangerneq inuup inuuneranik naleqarsinnaasoraa. Taassuma peqqinnissaqarfiup nalunaaqutaq 16.00 matusalernera quarsaarnartorujussuunerarpaa.

- Tamanna sullissinikkut kukkuneruinnanngilaq - aaliangerneq inuup inuuneranik naleqarsinnaasoq pineqarpoq illoqarfimmi innuttaasut inuunerannik toqqaannartumik navianartorsiortitsisoq, taanna tusagassiuutinut nalunaarummi allappoq.

Peqqinnissaqarfik qisuariartoq

KNR-ip Nunatsinni Peqqinnissaqarfik attaveqarfigaa, taakkuli apersorneqarusunngillat, apeqqutilli ilaat allakkatigut akissuteqarfigaat.

- Nunatsinni Peqqinnissaqarfiup isumalluutit pitsaanerpaamik atorneqarnissaasa qulakkeernissaat pissutigalugu sumiiffinni ataasiakkaani ingerlatsineq ingerlaavartumik naleqqussaaffigaa, peqqinnissaqarfik sinnerlugu attaveqaqatigiinnermut siunnersorti, Bodil Jensen allappoq.

- Pinasuartumik pisoqaraluarpat Aasianni napparsimmavimmit Qeqertarsuarmi peqqissaasoq pigaartuusoq attavigineqassaaq, taassumalu napparsimasoq aallaqqaammut isumagissallugu.

- Ilungersunarluinnartumik pisoqaraluarpat napparsimasoq qanoq passunneqarnissamik pisariaqartitsinera aallaavigalugu Aasiannut imaluunniit Nuummi Dronning Ingridip Napparsimmavianut aallarunneqassaaq, attaveqaqatigiinnermut siunnersorti allappoq.

Nunatsinni innuttaasut tamarmik peqqinnissaqarfik piffissaq qanorluunniit iligaluarpat attavigisinnaajuaannaraat Nunatsinni Peqqinnissaqarfiup erseqqissaatigaa.

Pinasuartumik sullissineq oqarasuaatikkut ulloq unnuarlu pisinnaavoq, tassanilu napparsimasoq peqqinnissaqarfimmi sulisumik takuneqartariaqarnersoq nalilerneqartassaaq, Bodil Jensen oqarpoq.