Kangerlussuarmi paasissutissaasivilortoqaratarnissaa pillugu pissutsit arlallit tupaallaatigineqartut

Naalakkersuisut siulittaasoqarfianni pisortaasimasup Svend Hardenbergip, Amerikamiut aningaasaliisut soqutiginnittullu februaarip qulingiluaanni ataatsimeeqatigai.

Kangerlussuarmi nunarsuarmi anginerpaamik paasissutissaasiviliornissaq pillugu suleqatigiinniarlutik, aamma Tasersiami Tarsartuullu Tasersuani erngup nukinganik innaallagissiorfiliornissamut neqerooruteratarsinnaanermut, ataatsimut paaseqatigiinnermut allagartaq atsiorpaat. 

Tassani Trumpimi atorfiliusimasoq Drew Horn angullu alla Dan Whaleymik atilik pineqarput.

Taaneqartup kingullip suliffeqarfik AmForge Corporation pilersitaraa, Drew Horn, Dan Whaley angullu pingajuat Niel Cohnimik ateqartoq suliffeqarfimmut ilaasut,  nittartakkaminni allappaa.

KNR-ip Svend Hardenberg, sunik pilersaaruteqarnersut pillugit, apersornissaanut tallimanngornermi februaarip 13-ianni isumaqatigiissuteqarfigaa.

Ullorli sioqqullugu taamaatinneqarpoq. KNR-ip tusagassiuutinut nalunaarut allaatigereersimagaa patsisigineqarpoq.

Taamaaliornikuunngilagut.

Amerikamiu aningaasaliisoq sunniiniarluunniit

Svend Hardenbergip suliffeqarfiutaa Inuit Development Company, AmForgemik paaseqatigiinnermik isumaqatigiissuteqartoq pineqarpoq. 

- Kalaallit Nunaat immikkuullarissumik inissisimaffeqarpoq, Svend Hardenberg aamma Inuit Development Company peqatigalugit suleqatigiinnissamik isumaqatigiissuteqarnerput nuannaarutigaarput, Dan Whaley tusagassiuutinut nalunaarummi allappoq.

Svend Hardenbergip Amerikamiut suliffeqarfiutaat AmForge paaseqatigiinnermik isumaqatigiissuteqarfigaa. Gassi, immap naqqatigut kabeli erngullu nukinganik nukissiorfik iluaqusiullugit, nunatsinniittussamik nunarsuarmi anginerpaamik paasissutissaasiviliorniarput. Suliniulli immikkut ilisimasalinnit tusagassiuutiniillu tupaallaatigineqarpoq Assi © : KNR

Svend Hardenberg assingusumik allappoq, suliniutip erngup nukinganik nukissiorfittaameersoq ​​innaallagissap qanoq atorneqarnissaa qulakkeerneqassanersoq, taassuma aamma allaaseraa.

- Erngup nukinganik nukissiorfik ukiut hunnorujukkuutaat sinnerlugit atuutissasoq, sivisoorujussuarmillu Kalaallit Nunaannut naleqalersitsissasoq, Svend Hardenberg allappoq.

Svend Hardenberg suliffeqarfiutini Inuit Development Company aqqutigalugu, Tasersiami imermik atuisinnaatitaanissamut soqutiginnittoq Sermitsiami 2022-p aallartinnerani allaaserineqarpoq. 

USA-mit LNG-gassi atorlugu paasissutissaasiviup ammarneqarsinnaanissaa aappaagu naatsorsuutigigitsik, Drew Hornip Berlingske-mit apersorneqarnermini oqaatigereerpaa.

Amerikami attaveqaatit

Suliffeqarfiit marluullutik paasissutissaasiviup erngup nukinganik nukissiorfimmiit innaallagiaq 1,5 gigawatt atorlugu, tamakkiisumik ammarnissaa 2028-ip ingerlanerani naatsorsuutigaat.

Kalaallip suliffeqarfiutaa USA-mit aningaasaliisartumik suleqateqarnera namminermi tupaallaatissaanngilaq.

Drew Horn Donald Trumpimut atassuteqarnikuunera, KNR-ip soqutiginninneranut pissutaavoq.

Drew Hornip USA-mit Kalaallit Nunaanni uukapaatitsiniartuunerarneqarnini akerlilereernikuuaa. Assingusumik aamma Amerikamiut paasiniaasartuinut attaveqartoq sunniiniartuusorlu, danskit Amerikamiullu tusagassiorfiinut akerlilerpaa. Assi © : KNR / Markus Valentin

Taanna angutit pingasut nunatsinni sunniiniarnermik suliaqartutut DR-ip nassuiaatigisimasaata ilagigaat tusatsiakkatut oqaatigineqarnikuuvoq.

Drew Horn tusagassiorfimmit tusagassiorfimmit Frihedsbrevetimit apersorneqarnermini Amerikamiut isertortumik paasiniaasartuinut attaveqannginnerpoq. Taassumalu sunniiniartutut suliaqartuunini Wall Street Journalimut aamma itigartitsissutigaa.

Taannali Frihedsbrevetip apeqquteqarnerani akissuteqannginnermini sekundini arfinilinni nipangersimaqqaariarluni Amerikamiut isertortumik paasiniaasartuinit attaveqarfigineqarsimannginnerarpoq.

Svend Hardenbergillu suleqatigisami politikkikkut qanoq inissisimanerat naalakkersuisut aalajangiiffigissallugu suliassarimmassuk nammineq isummerfigineq ajorlugit DR-imut paasissutissiissutigaa.

Amerikamiut isertortumik paasiniaasartuinut atassuteqarnersoq pillugu isumaliutersuuteqarneq suliami taamaallaat uitsatigineqanngilaq.

Borgmesterip Kangerlussuarmi ataatsimiinneq uppernarsaraa

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup Amerikamiut pilersaarutai ilisimasaqarfiginagit KNR-imut siusinnerusukkut paasissutissiissutigaa.

Qeqqata Kommuniani borgmesterip, Malik Berthelsenilli (S) suliniut pillugu taakku oqaloqatigisimallugit allakkatigut akissuteqarnermini oqaatigaa.

Qeqqata Kommuniani borgmesterip, Malik Berthelsenip (S) Amerikamiut aamma Svend Hardenberg Kangerlussuarmi atorfilittatigut ataatsimeeqatigineqarsimasoq oqaatigaa. Pisortatigoortumilli suli qinnuteqaateqartoqanngilaq. Qinnuteqaateqartoqassappalli tamanna allatulli suliarineqarumaartoq oqaatigaa. Assi © : KNR

- Uppernarsarsinnaavara Kangerlussuarmi pilersaarut (tusagassiuutitigut saqqummiunneqartoq) pillugu Svend Hardenberg oqaloqatigigatsigu, pilersaarutaallu pillugu atorfilittatigut Kangerlussuarmi naapinneqaqqammerluni, taanna oqarpoq, nangillunilu:

- Kommunitsinni ineriartornermut peqataanissarput pingaartitaraarput, taamaattumik aningaasarsiorfiusinnaasunik pilersitsiniartut piumasaqaatinik naammassinnissimatillugit tamatigut tapersersortarpagut. Uanilu Svend Hardenbergikkut pilersaarutaat piviusunngussappat soorunami qularinngilara Kangerlussuarmut iluaqutaajumaartoq.

Ingerlatsivimmiillu suliniummut atatillugu kommunimut qinnuteqaateqartoqassappat tamanna 'allatuulli nalinginnaasumik suliarineqarumaartoq' naggasiutigalugu paasissutissiissutigaa.

Piffissaliussaq piviusorsiornerunngitsoq

KNR-ip Ilisimatusarfimmi Ph.d aamma Tænketanken Digital Infrastrukturimi pisortaq, Signe Ravn-Højgaard aamma attaveqarfigaa.

Taassuma Issittumi paasissutissaasivinnik akuersissutinilluunniit pisariaqartunik inissiineqarnani taama siusitsigisumi nalunaarutigineqartunik allanik ilisimasaqarnani oqaatigaa.

- Paasisakka naapertorlugu – paasissutissaasivinngooq nunarsuarmi anginerpaalissasoq – akuersissutinik isumaqatigiissutinilluunniit suliluunniit inissiisoqanngitsoq nalunaarutigineqarpoq. Taamaalilluni taanna isumassarsiaannaavoq, taanna oqarpoq.

Signe Ravn-Højgaard Ilisimatusarfimmi Ph.d-qarpoq, Tænketankenimilu Digital Infrastrukturimi pisortaalluni. Suliniummullu paasissutissat maannamut saqqummiutigineqareersut atorlugit taassuma suliffeqarfiit suliassarpassuaqartut takusinnaavaa. Assi © : Tænketanken Digital Infrastruktur

Signe Ravn-Højgaardip akuersissuterpassuit inissinneqaqqaartussaasut oqaatigaa. Taamaammat nalunaarutiginninnermut piffissaliussaq piviusorsiunngitsutut isigaa.

- Akuersissuterpassuit pissarsiarineqaqqaarlutik paasissutissaasivik taama ittoq aatsaat sanaartorneqarsinnaavoq. Taamaammat aningaasaliisartut nalunaaruteqarneratulli paasissutissaasiviup ukiup aappaata affaata ingerlanerani atuutilersimanissaa ukiullu pingasut qaangiuppata naammassillugu sanaartorneqareersimanissaa qularutigilluinnarpara.

Taassuma suliniut paasissutissaataasiviuinnarani erngup nukinganik nukissiorfimmut tunnganerunnginnersoq alapernaanneqartariaqarsoraa.

- Suliniut misissoraanni paasissutissaasiviliornissamut suliniut kisimi qitiunngilaq, erngulli nukinganik nukissiorfissuarmik atorluaanissamut aamma anguniagaqarfiulluni.

Ilisimatusartup suliniutip aningaasalerneqarnera apeqquserpaa, aamma naak akuersissutit inissikkaluarpata.

- Aningaasaliisartut gassitut imerpalasutut ittumik nukissiornermik pilersuinermik aallarniuteqassallutik nalunaarutigaat, taanna oqarpoq, nangillunilu:

- Akisorpaluttorujussuullunilu ajornakusoorpaluppoq, aamma paasissutissaasivimmik taassumalu eqqaani attaveqaasersuinermik sanaartorneq sivisussaaq. Aamma misissueqqaarnerit aamma imaatigut kabelilersuineq sivisussaaq, Tusassimmi attaveqaatigut atassusersuinerit immikkut ittumik akuersissuteqarfigeqqaartussaavai.