Politiit ullormut nalunaarutaat: Ilulissat mittarfianni hashimik nassataqartoq unitsinneqartoq

Angut 54-inik ukiulik hashimik kiilup affaata missaanik oqimaassusilimmik Ilulissat mittarfiatigoorluni sapaatip-akunneri marluk matuma siuliani eqqussiniarsimagaluarpoq.

Aamma inuk alla pingasunngornermi taama iliorsimasoq, Kalaallit Nunaanni Politiini sillimasut pisortaat Jeppe Andsager oqaluttuarpoq: 

-Ilulissat mittarfianni inummik hashimik annikitsumik nassaartoqarsimasoq nalunaaqutaq 12.25 nalunaarfigineqarpugut, nakkutilliisoq oqaluttuarpoq.

Hashi annikitsoq pineqarmat, suliaq akiliisitsinermik kinguneqassaaq.

Tamatuma saniatigut Nuussuarmi Grab & Go-mut iserniarluni sisamanngornermi nalunaaqutaq 03.54  tillinniariartoqarsimavoq.

-Isaariaq ammarniarlugu sequminneqarsimavoq, taavalu matu ilorleq ammarniarneqarsimavoq, iluatsinneqarsimanngilarli, Jeppe Andsager oqarpoq. 

Politiit videokkut immiussat ilanngullugit suliaq pillugu misissuileruttorput, inuit pingasut taartunik atisalersorsimasut, pisimasup nalaaniit qimaasut takuneqarsimapput.

Kinaluunniit pisumut atatillugu takusaqarsimaguni tusagaqarsimaguniluunniit, oqarasuaammut 70 14 48-mut politiit attaveqaqqusipput.