Trumpimi atorfiliusimasoq: Kangerlussuarmi paasissutissaasiverujussualiorniartut

Amerikamiut pilersaarutaannut Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik sumilluunniit ilisimasaqannginnerarpoq.

Allattoq Markus Valentin

februaarip 03-at 2026 07:30

Nutserisoq Karla Heilmann

Drew Horn Kalaallit Nunaanni angalasoq siorna takuneqaqattaarpoq.

Taanna aningaasaliinermi suliffeqarfimmi GreenMetimi ulluinnarni pisortaavoq, Donald Trumpillu præsidentinngoqqaarnerata nalaani atorfiliuvoq.

Aningaasaatilissuaq aalisarnermut, nukissiuutinut, aatsitassarsiornermut; milliardilikkuutaanik aningaasaliinissamut utaqqisikkallakkaminilli neriorsuuteqareerpoq.

Aamma atuarukTrumpip siunnersortigisimasaa Kalaallit Nunaanni 66 milliardit koruuninik aningaasaliiniarpoq

Nutaanik maanna pilersaaruteqarpoq.

Kangerlussuarmi paasissutissaasiverujussualiorniarluni – Tasersiami Tarsartuullu Tasersuani suliniutaagunartunut, nutaanik erngup nukinganik nukissiorfiliorniarluni Drew Horn CNBC-mut oqaluttuarpoq.

Kangerlussuarmi paasissutissaasivik erngullu nukinga

Drew Horn CNBC-mit apersorneqarnermini, Kalaallit Nunaanni sunik suliniuteqarluni arlalinnik oqaaseqarpoq.

Kangerlussuarmi paasissutissaasivimmik sanarusuppoq, aappaagu innaallagissamik 300 megawattimik 1,5 gigawattimillu 2028-mi atuilereertussamik.

Aamma atuaruk Naaja Nathanielsen: Naalakkersuisut erngup nukinganik nukissiorfiliornissamik suliniummut iluanaaruteqarsinnaanissaq qulakkeeraat

Taamaattoqassappat paasissutissaasivik nunarsuarmi anginerpaassaaq.

Drew Hornip suleqataasalu sanaartussallugu oqaatigisaanniit, paasissutissaasivimmi innaallagiaq, erngup nukinganik nukissiorfittaameersuussaaq.

This is the kind of vision by @DrewHornUSA that could put Greenland on the map for the next era: AI compute powered by Arctic scale energy. Big claim, big opportunity and huge upside for infrastructure and local economic growth. Greenland Energy 🔥💪https://t.co/vmFNERZAgG
— Greenland Energy (@GreenlandEnergy) January 24, 2026

Kangerlussuarmi paasissutissaasivimmut nukissiuusersuisussamik, ingerlatsisussanik sanaartoqatissaminik ukiup ataatsip iluani nassaartorsimalluni, Drew Horn CNBC-mut oqarpoq.

Kalaallit Nunaanni suliffeqarfik suleqatigalugu, Amerikamiu aningaasaliisartoq aamma oqarpoq. Kinali suleqatiginerlugu paasitikkusunngilaa.

Paasissutissaasivik erngullu nukinganik innaallagissiorfik pineqartillugit, Naalakkersuisunit akuersissut utaqqimaarneqaannartoq Drew Horn oqarpoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfilli aperigaanni, Drew Hornip ilungersuutaa kusanartorsuaq pillugu oqaluttuaq allarluinnaavoq.

DREW HORN ISORNARTORSIUINERMUT AKISSUTEQARPOQ

Drew Hornip isornartorsiuinermut akissuteqartikkumallugu KNR-imit attavigineqarpoq.

Naalakkersuisoqarfik taannalu sooq taamak assigiinngitsigisunik nassuiaateqarnersut KNR-imit tassani aperineqarpoq. Aamma KNR-ip apeqqutigaa, kikkut suleqatiginerai, kiisalu tusagassiorfinnut oqaaseqareerluni Naalakkersuisoqarfimmiit oqaatigisai akerlilerneqarneri qanoq isumaqarfigineraa.

Drew Horn allakkatigut akissutaa aana:

- Oqaatsikka eqqortumik oqaluttuarineqanngillat aamma/imaluunniit nutserneqanngillat. Paasissutissaasivimmik anginerusumik suliniut pillugu kalaallimik suleqateqarnerput oqaatigaara, paasissutissat mianernarsinnaasut pillugit oqallisiginissai allanut piffissami matumani oqaatigisinnaanngilagut. Paasissutissat uku eqqortuupput, aamma suliassamut pilersaarut pillugu, akuersissutinik akuersineq kiisalu Tasersiami Tarsartuup Tasersuanilu erngup nukinganik nukissiorfittaassanut, Naalakkersuisup Naaja Nathanielsenip aningaasaliiniarluni atuisussanut pilersaaruteqarneranut tapersersuineq pillugit, suleqatitta kalaallip ministeriaqarfik oqaloqatiginikuuaa. Inatsisitigut periarfissanngoriarpata paasissutissat mianernarsinnaasut tamanut saqqummiunneqarumaarput, pisortanilli ilisimaneqareersoq tassaavoq, kalaallit suleriaasiannut inatsisaannullu naapertuuttumik – ineriartornerlu malitsigisassaa, kalaallit Naalakkersuisuisa inuiaqatigiillu kissaatigippassuk, naalagaaffiit amerlasuut paasissutissaasivimmik 1,5 GW-imik, aningaasaliillutillu pilersitsinissartik kissaatigaat.

Allisiguk

Namminersorlutik Oqartussat akissuteqaqqittut

Drew Hornip oqaatigisarpassuinut tunngatillugu, KNR-ip Naalakkersuisoqarfik saaffigaa.

Tassani paasissutissaasivik erngullu nukinganik nukissiorfiit pillugit innersuussutit, qinnuteqaatit, apeqquteqaatit allalluunniit Drew Hornip sorliit peqataaffiginerai akissuteqarfigineqartikkusullugit qinnuiginnippugut.

Amerikamiu aningaasaliisoq kikkunnik suleqateqarnersoq, Naalakkersuisoqarfiup paasissutissiinissaanik KNR-imit aamma qinnuigineqarpoq.

Drew Hornilli oqaatigisai Naalakkersuisoqarfiup ilisimasaqarfiginngilluinnarnerarpai.

- Oqaatigisai pillugit sulianik peqanngiivippugut. Toqqaannartumik tusarfiginikuunngilarput (tusagassiuutitigulli), tamatuminngalu qinnuteqaammik sumiluunniit peqanngilagut, Naalakkersuisoqarfimmi pisortaq Jørgen T. Hammeken-Holm allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.