Trumpip sulisorisimasaata suleqatigisaa kalaaleq aajuna

KNR Amerikami aningaasaliisartoq Trumpillu sulisorisimasaa Drew Horn pillugu arlalinnik sapaatip-akunnerata siuliani allaaserinnippoq.

Kangerlussuarmi qarasaasianut paasissutissaasivimmik sanaartorniarpoq, innaallagiamik 300 megawattinik aappaagumiit atuisussamik. Taassuma qarasaasianut paasissutissaasivik innaallagiamik 1,5 gigawattimik 2028-mi atuilernissaa naatsorsuutigaa.

Aammattaaq erngup nukinganik nukissiorfik Tasersiap Tarsartuup Tasersuatalu eqqaaniittussaq pisiariumallugu neqeroorniarpoq.

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfiup Amerikamiut pilersaarutaat ilisimasaqarfiginnginnerarluinnarpai.

Drew Horn arlaleriarluni nunatsinniittareerpoq. Erngup nukinganik nukissiorneq qarasaasianullu paasissutissaasiviup saniatigut, aatsitassarsiornermik suliallit Tanbreez kujataani suleqatigai.  Assi © : KNR / Markus Valentin

Naalakkersuisoqarfiup Drew Hornip suleqataa kalaaleq, naalakkersuisumik Naaja Nathanielsenimik (IA) maajimi 2025-mi ataatsimeeqateqarpoq, KNR-ip allaaserisaa tunngavigalugu nassaarisimavaa.

Naalakkersuisut siulittaasoqarfianni pisortaasimasup, Svend Hardenbergip, Drew Horn peqatigalugu Nuummut tallimanngornermi tikissimanera, KNR-ip maanna oqaluttuarisinnaanngorpaa. Taakkua Kangerlussuarmut angalaqatigiissapput.

Tusagassiuutit allat, Svend Hardenberg Amerikamiup Kalaallit Nunaanni niuernermi suleqatigigaa, maanna uppernarsarpaat.

USA Danmark aamma Kalaallit Nunaat akerleralugit

Drew Horn Berlingske-mit apersorneqarami, Hardenbergilu imminnut ukiorpassuarni ilisarisimasariissimallutik oqaluttuarpoq.

Svend Hardenbergip erngup nukinganik nukissiorfik pillugu soqutiginninnini Sermitsiamut siornatigut oqaatigisarpaa.

- Taassuma Kalaallit Nunaannut Danmarkimullu tunngasut tamaasa isumagai, uangalu USA-mut tunngasut tamaasa isumagalugit, Drew Horn Berlingskemut oqarpoq.

Svend Hardenbergili kisiat suleqatiginagu ilassutigalugu oqaatigaa.

Drew Hornip kikkut aamma suleqatigisimanerai ilisimaneqanngilaq.

Niueqatigiinneq politikernertaqanngitsoq

Drew Horn Amerikami tusagassiuutinit januaarimi pulaartorineqarpoq, tassanilu akerliussutsimik takutitsinerit pillugit salluliornera KNR-ip aamma allaaseraa.

Tassani Nuummi akerliussutsimik takutitsisut danskiinnarnik ilaatigut peqataasoqarnerarpaa. Oqaatigisaq ilumuunngitsoq.

Svend Hardenberg DR-imut allakkatigut akissummini politikimut akuliunneq ajornerarpoq.

- Politikikkut pisut nalinginnaasumik akuliuffigineq ajorpakka, politikikkullu pissutsit maannakkut atuuttut oqaaseqarfigerusunngilakka – naalakkersuisutta tamanna isumagivaat. Niuertuuvunga Kalaallit Nunaannilu ineriartortitsinissaq periarfissanillu pilersitsinissaq pingaartippara, allappoq.

Svend Hardenberg DR-imut aamma allappoq, Amerikamiut aningaasaliinermik ingerlatsiviat GreenMet 'tulluartumik ujaasissussisinnaasoq'.

- GreenMet-imut tunngatillugu, taakkua suliniummut aalajangersimasumut tunngatillugu, kalaallit suliffeqarfiutaattut kissaatigisatsinnut naapertuuttumik, suliarinninnermut aaqqissuussaanermullu suleqataasinnaasumik tulluartumik nassaaqqullugit, Hardenberg allappoq.