Sulisitsisut: Sulisut nunanit allaneersut pillugit oqallinneq inuussutissarsiortorpassuarnut ernumalersitsivoq.
Naleqqap siulittaasuata, Pele Brobergip nunani allamiut nunatsinnut suliartortut pillugit oqallinneq oktobarimi aallartippaa.
Taanna nunani allamiut nunatsinni sulisinnaanerat ukiunik sisamanik sivisunerpaaffissaqalernissaa apeqquteqaat aallaavigalugu oqallinnissamik siunnersuuteqarluni siunnersuutigaa.
Ilinniartitaanermut, kultureqarnermut, timersornermut ilageeqarnermullu maanna naalakkersuisuusimasup, Nivi Olsenip (D) naalakkersuisut nunanit allanit suliartortunik nakkutiginninnerulerusuttut kingorna oqaatigaa.
Qeqqata Kommuniani borgmesterip, Malik Berthelsenip (S) nunanit allanit suliartortut kommunimut naleqarluinnartut amerlanerusunillu tikisitsinissartik misissorlugu KNR-imut oqaatigaa.
Taannali tassunga atatillugu Sulisitsisunit taperserneqarpoq, taakku nunatsinni suliffeqarfinni sulisussaaleqisoqarnera oqaatigaat.
- Sulisut nunani allaneersut pillugit isummat borgmesterip Malik Berthelsenip oqaatigisai ilisarilluarpagut, Inuussutissarsiutit Immikkoortuannut Akunnittarfiit Neriarniartarfiillu Ataatsimiititaliami siulittaasoq, Lisbeth Hansen tusagassiuutinut nalunaarummi oqarpoq:
- Inuussutissarsiutit immikkoortuini akunnittarfinni neriniartarfinnilu, nioqqutissanik amerlasuunngorlugit tuniniaasartuni pisiniarfinnilu sulisut nunatsinneersut kisimik sulisussarsiarineqarsinnaannginnerat aamma misilittagaraarput.
Nunaqavissut sulisut isornartorsiorneqanngitsut
Sulisitsisut oqarnerat naapertorlugu nunanit allanit suliartortut nunaqavissunut suliffimmik annaasaqartitsissanngillat.
Tamanna Pele Brobergip aamma Nivi Olsenip ajornartorsiutitut oqaatigigaluarpaat.
- Nakkutiginerusariaqarpagut, uagut maani nunaqartut aamma inuusuttagut suliffinnut appakaannissaannut aamma aporfiussanngitsut aamma taakkua nakkutigisariaqaratsigit pingaaruteqartorujussuuvoq inatsisinik nutarsaanissaq, Nivi Olsen KNR-imut oqarpoq.
Sulisitsisulli nunanit allanit suliartortut pillugit oqallinnermi suliffeqarfiit atugaat tunngavigineqartariaqarsoraat.
- Suliffeqarfippassuit nunatsinneersunik sulisussarsiornermik annertuumik suliniuteqartareerput, peqatigitilluguli sulisut naammattut pisariaqartinneqartut pissarsiarineqarsinnaanngitsut misigisarparput, Lisbeth Hansen oqarpoq.
Sulisitsisut nunanit allanit suliartortut killilersorneqarnerat inuiaqatigiinnut tamanut kingunerluuteqarsinnaanerarpaat.
Tamatuma saniatigut nunarput ineriartungaatsiarnissamut periarfissaqarpoq. Tamannalu suliffeqarfinni naammattunik sulisussaqarneratigut taamaallaat piviusunngortinneqarsinnaavoq.
- Sulisut nunanit allaneersut pillugit kingullertigut oqallinneq inuussutissarsiortut akornanni amerlasuuni ernumalersitsivoq, Sulisitsisut tusagassiuutinut nalunaarummi allappoq.
