Mikkel Jeremiassen KNQK-mi siulittaasutut tunuartoq
Mikkel Jeremiassen KNQK-mi siulittaasutut tunuartoq, siulersuisut pingasunngornermi unnukkut facebookikkut nalunaarutigaat.
Kattuffimmi aningaasat tapiissutit siunertamut aalajangersimasumut atorneqartussatut akuerisaagaluartut, siunertamut allamut atorneqarsimammata kattuffik ulluni kingullerni sammineqangaatsiarpoq. Aamma Nivi Olsenip (D) Ilinniartitaanermut, Kultureqarnermut, Timersornermut Ilageeqarnermullu naalakkersuisoq marlunngornermi tunuartariaqalerpoq.
Tamanna ilutigalugu KNQK-mi immikkoortortaqarfiit arlallit immikkut ittumik ataatsimeersuarnissamik piumasaqarput, kattuffiullu aningaasat eqqunngitsumik atorsimasani utertillugit akilissavai.
Aamma 2025-p aallartinnerani, USA-p præsidentip tullersortaa J.D. Vance nuliilu Avannaata Qimussersuanut isiginnaariartussaasimanerannik kattuffik USA-p konsulatianit aningaasaliiffigineqareersoq kattuffik sammineqangaatsiarpoq.
Tikeraarnissarli naggataatigut taamaatiinnarneqarpoq, præsidentillu tullersortaa taarsiullugu Pituffik Space Basemut tikeraarpoq.
