USA-p Future Greenlandimi inituallaannginnera aaqqissuisup nuannaarutigaa
Nunatsinni oqartussaasutut Nuummilu innuttaasutut USA-mit sapaatip akunnerani matumani tikeraartoqarnera alapernaaserpallaarneqanngitsoorsinnaanngilaq.
Issittumi inuussutissarsiornermik ineriartornermut kiisalu nunatsinni aningaasaliiffissatsialannut sapaatip akunnera tunngasussaagaluarpoq.
Donald Trumpilli Kalaallit Nunaannut immikkut ittumik aallartitaa, Jeff Landry mittarfimmut sapaatiummat ualikkut tikimmat Future Greenlandimi ukioq manna ataatsimeersuarneq aallartinneqarpoq.
Nunatsinnilu oqartussaasut pissutsit sakkukillisarniarsaralugit sapaatip akunnera aallartippaat.
Jens-Frederik Nielsenip (D) aamma Múte B. Egedep (IA) Jeff Landry aamma Amerikamiut Danmarkimi aallartitaat, Kenneth Howery ataatsimeeqatigereeramikkit USA-mut atassuteqarnermi allanngortoqannginnera pillugu tusagassiortunut ataasinngornermi katersortitsipput.
- Aallaqqaammut oqaatigisagut assigiinngitsut suli atuuttut ataatsimiinnermi oqaatigaagut – tassa kalaallit inuiaqatigiit ataqqineqassapput aamma suleqatigiilluartoqarnissaa ujartorparput, Jens-Frederik Nielsen oqarpoq.
Sulisitsisut pisortaata, Christian Keldsenip pissutsit aamma sakkukillisarniarsarai. Tassami Jeff Landry Future Greenlandimi ataatsimeersuarnermi peqataagaluartorluunniit ataatsimeersuarneq tassunga tunngassuteqassanngilaq.
- Ballongi ninitsinniarsarilaarparput, Christian Keldsen ataatsimeersuarnerup ulluata aappaani - ualikkut KNR-imit naapikkatsigu oqarpoq:
- Tassaniittoq ilisimagipput aamma tassaniinnera takunngitsuusaarsinnaanngikkipput oqaatiginiarsaraarput.
Christian Keldsenilli ataatsimeersuarnermi pisut, nunatsinni inuussutissarsiornermut tunngasut sapinngisamik ukkatarineqarnissaat pingaartippaa.
Taamaammat Jeff Landryp tikeraarnerata Katuami ukioq manna ataatsimeersuartoqarnerani initunerunnginera Sulisitsisut aamma nuannaarutigaat:
- USA-p ilimagineqarsinnaasutulli initunerunnginnera nuannaarutigaara, Christian Keldsen oqarpoq.
USA-mit akornusersuinerit
Tusagassiorfinni - immaqa pingaartumik danskit nunallu tamalaat tusagassiorfiini Future Greenland pillugu malinnaasimagaanni Jeff Landryp tikeraarnera Future Greenlandimi pingaarnertut inissisimasoq immaqa eqqarsartoqarsinnaavoq.
Jeff Landry tusagassiortorpassuarnit Katuamut iseriartornerani akissuteqartinniarlugu malinnaaffigineqarnera ataasiinnannguuvoq. Tamatumali saniatigut ataatsimeersuarneq USA-mit akornusersorneqanngilaq.
- Ataatsimeersuarnerlu nunatta nunanit allanit aningaasaleerusussuseqartunut killiliussanik pitsaasunik qanoq qulakkeerinissaanut tunnganerulluni.
- Nunatta tungaaniit tamanna uagut piumasaqaatigut malillugit kissaatigigipput, kisianni aamma alloriartariaqartugut paasisimanerulerneqarsimasoq isumaqarpunga, Christian Keldsen oqarpoq.
Ataatsimeersuarnermili USA-mit Canadamit, Tuluit Nunaannit Frankrigimiillu aallartitat sisamat akornanni oqallittoqarmat USA aamma qitiulluinnarpoq.
- Aallartitat akornanni oqaloqatigiinnitsinni initunissaa qularutissaanngilaq, tassanimi USA (Kenneth Howery aaqq.) aamma peqataavoq. Aallartitap pissutsit taama inissisimaneranni peqataanera aamma ataqqilluinnarpara, Christian Keldsen oqarpoq.
USA-mulli tunnganngilluinnartunik Christian Keldsenimut aamma nuannersoqarpoq.
Assersuutigalugu kalaallit politikerii tusarnaarluarneqarnerat inussutissarsiortullu aningaasaliisullu politikerit nunamut aqqutissiuilluartutut nalilermatigit.
- Arlallit erseqqissumik oqaasissaqartutut isigaat. Tamanna nuannaraara.
Jeff Landryp oqariartuutaasoq paasinngikkaa
Christian Keldsenip Future Greenlandip ataatsimeersuartitsineranut ukioq manna aaqqissuussinerup qanoq siammasitsiginera pingaartumik nuannaarutigaa.
Najukkamit peqataasunut nunarsuarmit peqataasunut.
- Aallarniisut suliffeqarfeeqqallu aallarteqqammersut piffissap ilaani oqalugiarput, aallartitallu piffissap ilaani oqaluuppagut. Taakkualu akornanniittut aamma sammivagut, Christian Keldsen oqarpoq.
Naak Jeff Landryp pingaarnertut oqariartuutaasoq, Christian Keldsenip isumaani, paasinngikkaluaraa, peqataasut allat paasinnissimanissaat qularutiginngilaa:
- Taanna ataasimiinnermut peqataanngitsup kikkulli tamarmik eqqartugaata Kalaallit Nunaata sorusunnera susinnaaneranillu oqariartuutigineqartoq paasisimanngikkaa paasiinnarpara, Christian Keldsen oqarpoq.
- Isumaqarpungali allat tamarmik ataatsimiinnerup paasissutissanik aallerfiunera paasigaat. Suleqatigiinnissaq kissaatigineqarpoq, tamannali kalaallit piumasaat tunngavigalugit pissaaq.
