USA Nuup qeqqani 3000 kvadratmeterinik initussusilimmik konsuuleqarfittaartoq

USA-p Kalaallit Nunaanni konsuleqarfittaarsua sisamanngornermi atoqqaartinneqarpoq.

Naalagaaffik pissaanilissuaq Nuummi umiarsualiviup eqqaani manna tikillugu illumi inissisimavoq, konsulateqarfilli pingasunik quleriilik 3000 kvadratmeterinillu initussusilik illoqarfiit pingaarnersaata qeqqani sisamanngornermi ammassaaq.

USA umiarsualivimmi Issittumi Sakkutooqarfimmit illumik 2020-miilli attartorpoq, Kalaallit Nunaatali Danmarkillu akornanni pissutsit ilungersunarneranni illuatungaanilu USA-mut, maanna anginermut nuuppoq.

USA-p præsidentiata Donald Trumpip Kalaallit Nunaat tiguarniarlugu arlaleriarluni sioorasaarutigaa.

Taamaattumik ammaqqinnissaanut atatillugu sisamanngornermi akerliussutsimik takutitsinissaq nalunaarutigineqarpoq.

Akerliussutsimik takutitsisut allagartarsuarnik tigummiaqarlutik USA-mut naammaginninnginnertik ersersinniarlugu konsuuleqarfik tunullugu minutsit marluk nikorfassapput.

- Nammineerluta aalajangiisinnaassuseqarnerput siunissarpullu kalaallit innuttaannit aalajangerneqassasoq USA-mut erseqqissarusupparput,  kinguaariillu tullii taamatut pisinnaatitaaffiinik unioqqutitsisoqassanngitsoq, suliniummik aallarniisoq Aqqalukkuluk Fontain KNR-imut oqarpoq.

Siulittaasoq peqataassanngitsoq

Amerikamiut Nuummi konsuuleqarfia 2020-mi ammaqqinneqarmat naalakkersuisunut ilaasortat arlallit peqataapput. Naalakkersuisut siulittaasuat Jens-Frederik Nielsen (D) sisamanngornermi atoqqaartitsinermi peqataassanngilaq.

USA-p Kalaallit Nunaanni immikkut aallartitaa, Jeff Landry, sapaatip-akunnerani matumani siusinnerusukkut nunatsinniippoq.

Kalaallit Nunaata nunap innarligassaannginnerata ataqqineqarnissaa piumasaraa, killissarlu qaangerneqarsinnaannginnerarlugu. Landrylli USA-p killerisaa ataasiinnaanerarpaa tassaasoq "aappaluttoq, qaqortoq tungujortorlu“, USA-p erfalasua innersuussutigalugu.

Taanna Louisianami ulluinnarni guvernøriuvoq.

USA-p Danmarkimi aallartitaa Ken Howery konsuuleqarfiup nutaap sisamanngornermi ammaanersiorneqarnissaanut peqataassaaq.

/ritzau/