Trumpip Kalaallit Nunaannut pilersaarutaanik isertukkanik allagaatit isertuussat qulaajaapput
Kalaallit Nunaannik tiguaanissamut sakkutooqarneq Donald Trumpip pingaarnerpaatinngilaa.
Andrew Gawthorpe taama oqarpoq. Taanna Leiden University-mi Hollandimiittumi sulisuuvoq, tassanilu piffissap ingerlanerani amerikamiut nunanut allanut politikkia nunasiaateqarnermit qanoq ilusilersorneqarsimanersoq ilisimatusarfiginnippoq.
Præsident Trump Kalaallit Nunaannik suli soqutiginninnerminik kingullermik sapaatiummat uteqqiilluni oqaaseqaqqippoq, sakkutooqarnikkullu pissaaneqarnissaq mattunnianngilaa.
Trumpilli pisortaqarfianit allakkat isertuussat New York Times-ip saqqummiussimasai tunngavigalugit USA-p Kalaallit Nunaannut attaveqarnerulerniarluni periusai marlunnut avinneqarsinnaasut, Andrew Gawthorpe isumaqarpoq:
- Aningaasatigut kajumissaarineq siulliullunilu pingaarnerpaajuvoq. Amerikamiut pinngortitami pisuussutinik piiaanerat pissutigalugu Kalaallit Nunaata aningaasaqarnikkut siuariartorsinnaaneranik tunngavilersuissapput. Taava Alaskami Kalaallit Nunaannilu inuit kulturikkut assigiissutaat sammilissavaat.
Ukrainemit Nunatsinnut
Aatsitassanik qaqutigoortunik piiaanissaq pillugu USA Ukrainelu sapaatip-akunnerata siuliani isumaqatigiissuteqarput. Nunanit allanit aningaasaliisoqarnerulersinniarlugu sinneqartoorutinik naligiimmik agguaassisarnissaq nunanit taakkunannga isumaqatigiissutigineqarpoq.
Aamma Kalaallit Nunaata USA-llu akornanni tunngaviusumik isumaqatigiissummik pilersitsisoqarsinnaaneranik Andrew Gawthorpe naliliivoq. Aatsitassat qaqutigoortut ilaatigut illersornissamut atortussatigut atorneqarnissaat amerikamiut soqutigisaraat, pissaanilissuarnit allanit atorneqarnissaannut taarsiullugu.
Taamaalillutik aningaasaliisartut namminersortut tamatumunnga attuumassuteqarput, USA-mmi Kalaallit Nunaatalu akornanni aningaasaqarnikkut ineriartortitseqataassagamik.
- USA-mi naalakkersuisut maannakkut naalagaaffittut aningaasaliiffigisaqanngillat. Tamannali namminersortunut tunniunneqarpoq, niuernermili malittarisassat malillugit, tassa naalagaaffimmit aningaasatigut tapiissuteqarfiginninnikkut, taanna oqarpoq.
Toqqaannanngitsumik pissaaneq atorlugu
Præsident Trumpip nukissiornermut siunnersortigisimasaa Drew Horn Kalaallit Nunaanneeqqittoq, KNR-ip qanittukkut saqqummiuppaa. Taanna naapertorlugu USA-mi namminersortut Kalaallit Nunaanni inuussutissarsiornermut, aatsitassarsiornermut, nukissiornermut aalisarnermullu, 10 milliardit dollarsinik, tassa 66 milliardinik koruunit missaanniittunik, aningaasaliinissamut piareersimapput.
Drew Horn isertortumik pilersaaruteqarnani aningaasaliinikkullu inuit isiginnittaasiannik allanngortitsiniarsarinani nammineq oqaluttuarpoq. Amerikamiulli aningaasaliisartut malinnaavigeqqissaarneqartariaqartut, Andrew Gawthorpe naliliivoq.
Suliffeqarfiit namminersortut aningaasaliisinnaanerannik ajornannginnerulersitsisunik naalagaaffiit demokratiskiusut marluk isumaqatigiissuteqarnerat tunngaviusumik pasinapilunngikkunaraluarpoq?
- Aningaasaliineq soorunami inatsisitigut akuerisaavoq, kisiannili sunniiniarluni tatisineroriatarsinnaanera eqqarsaatigalugu allaalluinnarpoq, Andrew Gawthorpe oqaluttuarpoq.
Naak aningaasaliisut namminersortut namminneq soqutigisatik aallaavigalugit iliuuseqaraluartut, tamanna Donald Trumpip USA-mut pilersaarutaanut annerusunut ilaanera mattunneqarsinnaanngitsoq, ilisimatusartoq oqaluttuarpoq - ilisimmaarinnilluni ilisimmaarinnaniluunniit iliuusaagaluarpalluunniit.
- Trumpip pisortaqarfiata pilersaarutaa iluatsissappat, aatsitassanik qaqutigoortunik namminersortut aningaasaliisariaqarput ineriartortitsisariaqassallutillu. Aningaasat Kalaallit Nunaata tiguarnissaanut kalaallinullu akiliinissamut atorneqarsinnaapput. Tamakku tamarmik toqqaannanngitsumik pissaaneqarnerulernissamut pingaaruteqarput.
USA nunasiaatilittut "ajunngitsoq"
New York Times-imi allaaserisaq naapertorlugu amerikamiut inuit attaveqaqatigiittarfii atorlugit Kalaallit Nunaannut sammiveqartumik paasititsiniaassapput. Tamatuma saniatigut pisortaqarfiup oqaaseqartartui Alaskami inunnut assigiissutinik eqqartuiumaarput.
- Alaskap aningaasaqarneranik ineriartortitsisimaneq sammissagunarpaat, tassanimi pinngortitap pisuussutaanik sinneqartoorutit ukiumoortumik akileraarutitigut innuttaasunut agguaanneqartarmata, Andrew Gawthorpe oqarpoq.
Alaskamili inuit USA pillugu ajornartorsiuteqartarput. Oqartussaassuseqaratik peqataatinneqartarsimanngillat, nunaqavissullu naqisimaneqartutut misigisimasarput. Tamanna ilaatigut nunanit allanit sulisussanik tikisitsisoqarnikkut pisimavoq, tamannalu pissutigalugu inuit marlunnut immikkoortinneqarsimapput. Aatsitassarsiornermik Issittumillu immikkut ilisimasallit marluk taamatut februaarimi KNR-imut oqaluttuarput.
USA Alaskami 'nunasiaateqartutut ajunngitsutut“ saqquminiarsarissasoq Andrew Gawthorpe oqarpoq, Danmarkilu nikanarsarniarlugu taamaaliortoqassanerarpaa.
- Danmarkip aningaasaqarnikkut aningaasaliivallaarsimannginnera pisuussutinillu atorluaasimannginnera pissutigalugu Kalaallit Nunaannik aqutsinerluttuunerassavaat.
Kukkussutinik aaqqiiniarsarisut
Sapaatip-akunnerata siuliani tallimanngornermi GreenMet-imi pisortaq Drew Horn KNR-imit apersorneqarpoq.
Aningaasaliisartut allat peqatigalugit Alaskami aatsitassanik suliarinnittarfimmik taanna ammaaleruttorpoq. Killavaat Alannguannilu aatsitassarsiorfimmik Tanbreezimik suleqateqarpoq.
- Siornatigut kukkussutigineqartut aaqqinniarsaritillugit Kalaallit Nunaanni pitsanngorsaanernik ingerlatitseqqissinnaavugut - tamanna innuttaasut kissaatigippassuk, Drew Horn oqarpoq.
