Trumpip siunnersortigisimasaa Kalaallit Nunaanni 66 milliardit koruuninik aningaasaliiniarpoq
- Aningaasaliisartullu aatsitassarsiornermut, nukissiornermut, aalisarnermut allanullu aningaasaliiniarpugut. Piaartumik 10 milliardit dollarit, tassa 66 milliardit koruunit missaat, aningaasaliissutiginiarpavut.
Drew Horn KNR-imit apersorneqarami taama oqarpoq. Donald Trumpip præsidentiunerani kingullermi USA-mi nukissiornermut ministereqarfimmi nunanut allanut tunngasunut allaffimmi pisortaavoq.
Ullumikkut suliffeqarfimmi GreenMet-imi, ilaatigut Kalaallit Nunaanni aatsitassarsiornermut aningaasaliisartuusumi, pisortaavoq.
Drew Hornip Det Hvide Husimi sulinermi nalaani Kalaallit Nunaat angallavigaa naalakkersuisunilu politikerit – ilaatigut aatsitassanut naalakkersuisoq Naaja Nathanielsen (IA), illuatungiliuttut aammalu namminersortut aatsitassarsiornermut nukissiornermullu aningaasaliissutit pillugit oqaloqatigalugit.
Drew Horn Det Hvide Husimi suliunnaareeraluarluni Kalaallit Nunaannik soqutiginnikkunnaarsimanngilaq. Ulluni makkunani Amerikami inuussutissarsiornermi siuttut assigiinngitsut ilagalugit pisortatut nunami angalaqqippoq.
Ilaatigut Killavaat Alannguat, Amerikamiut aatsitassarsioqatigiiffiata Tanbreezip 2020-mi piiaanissamut akuersissummik pissarsiffigisaa, takusarniarlugu Narsamiippoq.
Ukiut pingasut qaangiuppata piiaaffinnik pilersitsisoqassaaq
Drew Horn aningaasaliisartunik kikkunnik suleqatigisisaqartarnerluni aperineqarami aningaasaliisartut soorlu Libra Group Londonimeersoq aamma Cerberus Capital New Yorkimeersoq suleqatigisarnerarpai. Suleqatilli aamma ilagaat teknologiimik suliaqartut soorlu Tesla.
Aatsitassat qaqutigoortut ingerlatseqatigiiffinnit soqutigineqarput, aammali Nuup eqqaani qeqqussanik tunisassiornermut Sisimiullu eqqaani erngup nukinganik nukissiorfimmut aningaasaliiniarput. Taanna datacenterinut innaallagissiornissamut atorneqarsinnaassasoq GreenMet-ip neriuutigaa.
Amerikamiut aningaasaliineratigut aatsitassarsiorfimmik ammaanissaq qaqugu pissanersoq Drew Horn aperineqarami, ukiup ataatsip pingasulluunniit ingerlaneranni aallartissinnaasoq akivoq.
- Issittumi suut tamarmik ajornakusoortarput. Nunarsuaq tamakkerlugu aatsitassarsiorfimmik pilersitsineq agguaqatigiissillugu ukiut 20-t ingerlasarpoq. Kisianni tunisassiornissamut piareersimasunik suleqateqareerpugut, aatsitassarsiorfiillu annerusut ineriartortinneqartariaqartut qaammatit 18-it qaangiuppata misiliummik tunisassiulersinnaapput. Tamatuma kingorna suliniutit annerusut ukiualuit ingerlareerpata aatsaat niuernermut attuumassuteqalersinnaapput, taanna oqarpoq.
Trumpimut attaveqarneq
Ullunili makkunani inuit tamarmiunngitsoq USA-mik nuannarinnipput. USA-p præsidentiata Donald Trumpip Kalaallit Nunaata USA-mit tiguarneqarnissaanik kissaateqarnera pissutigalugu inuit aqqusinerni akerliussutsimik takutitsipput.
Præsident Trumpip Kalaallit Nunaat sooq tiguarusunneraa eqqarsaatigineqarsimavoq. Trumpip aqutsinera pillugu ilisimasatit pissutigalugit tamanna qanoq isumaqarfigaajuk?
- Præsident Trump sinnerlugu oqalussinnaanngilanga. Isumaqarpunga oqariartuutit amerlasuut ajornakusoortunngorsagaallutillu paatsiveerusimaarnartunngortinneqartut. Oqaatsip ’tiguaanissa’-p atornissaa piviusorsiornerunngitsoq isumaqarpunga. Niuernermut tunngasut pineqarnerpaagunarput.
Trumpip oqaasii pissutigalugit akerliussutsimik takutitsinerup oqaluttuarisaanerani aatsaat taama annertutigisumik akerliussutsimik takutitseqqammerpugut. Sulinerit akerliunermit qanoq sunnerneqarpa?
- Amerikami suliffeqarfittut namminersortutut neqeroorutigisinnaasatsinnik eqqortumik oqaatiginnittariaqarnitsinnik ersarissaavoq. Namminiilivikkusuttoqarnera aningaasaliisartukkalu ataqqivarput.
- Nalunngilara tusagassiuutitigut taama allaaserinnittoqartartoq (Trump Kalaallit Nunaannik tiguaaniartoq, aaqq.), kisianni oqaloqatigiinnermik pimoorussisumik imaluunniit tiguaaniarluni pilersaaruteqarnermik tusarsimanngilanga.
Nunalli pissutsit atugai tunngavigalugit nunaqavissullu suleqatigalugit aningaasaliisartut kalaallit suliffeqarfiutaannut aningaasaliiumalluinnartut, Drew Horn oqaluttuarpoq.
- Kalaallit Nunaanni Danmarkimilu pisortat oqaloqatigigaangakkit suna isumaqatigiinngissutigineripput aperigaangata ima akisarpakka: “Isumaqatigiinngissuteqarpallaanngilagut.”
Isertortunik pilersaaruteqarneq itigartikkaa
Australiamiut aatsitassarsioqatigiiffiat kujataani aatsitassarsiorfiliorniartoq Kinamiunit aningaasaliiffigineqarami Kinamiutut pasillerneqarsimavoq. Det Hvide Husimut Donald Trumpillu naalakkersuisuinut attaveqartutut ingerlatseqatigiiffiup namminersortup killissai sumiippat?
- USA-mi naalakkersuisuni suliunnaareerpunga. Suliffeqarfinni namminersorluinnarlunga aqutsisuuvunga, namminerlu soqutigisakka aallaavigalugit aalajangiisarlunga. USA-mut, Kalaallit Nunaannut aningaasaleeqataasartunullu soqutigisat taakku iluaqutaapput.
Soorunami aamma Det Hvide Hus attaveqarfigisarparput. Suliffeqarfimmi namminersortumi aqutsisutut nunap aalajangiisartuinik suleqateqarnissaq pisariaqarpoq. Sumiluunniit niueraluaraanni tamanna atuuppoq, Drew Horn oqarpoq.
USA sinnerlugu pissaanermik atuisutut innuttaasullu isumaannik sunniiniartutut isornartorsiuillutik oqartut qanoq akissavigit?
- Aningaasaliisartuullutalu niuernermi siuttuuvugut pisariaqartitsiffiusuni ineriartortitsinissamik soqutigisaqartut.
- Tunuliaqutarali pissutigalugu inuiaqatigiinnut sunniiniarsarisutut isertortumik pilersaaruteqartutut taasiumaarlutik qulartut paasisinnaavakka. Illuatungaata uppernarsarnissaanut periarfissaqalissallunga neriuutigiinnarpara - tassa aningaasaqarnikkut siuariartornissamik soqutigisaqartugut, taanna oqarpoq.
