Sara Olsvig: Nunarsuarmi allanngoriartorfiusumi naalagaaffiit sorliit suleqatiginiarnerigut nalilersorluartariaqarparput
Kitaani USA Natomi iligisaminnik tiguaannginnissaminik neriorsuerusunngilaq. Kangiani Rusland Europami nunamik tiguaaniarsarivoq.
Nunarsuarmi sorsunnersuup aappaata kingorna pissutsit maanna allanngoriartorput.
USA-mi Donald Trumpip iliuuserisinnaasaasa Natomi iligiinut annerusumik kingunerluuteqarsinnaaneri ernummatigineqarpoq.
Nunarsuaq pissaanilissuarnit marlunnit USA-mit Ruslandimiillu siulersorneqarunnaariartorpoq.
Tassalu nunat sorliit iligiinnersut maanna nalorninarnerulermat, nunat inissisimaffimminnik maanna ersarissaaniarput. Tamannalumi aamma nunatsinni takuneqarsinnaavoq.
Naggueqatigiit Inuit inuttut pisinnaatitaaffiinik siuarsaaffiup ICC-p siulittaasua, Sara Olsvig, taama nassuiaavoq.
- Franskit, tyskit assersuutigalugulu siunissami immaqa aamma tuluit takussavagut nunatsinnut toqqaannarnerusumik attuumassuteqarlutillu naalakkersuisullu isumaqatigiinninniuteqarsinnaanerat annertusiartussasoq.
Sara Olsvig KNR-ip radiokkut tusarnaagassiaani Ulluni Makkunanimi taama naliliivoq.
Sorsuttoqalissagaluarpat inissisimanerput erseqqittuusariaqartoq
Aamma nunatta sumi inissisimanini erseqqissarusuppaa.
Ajornerpaamillu pisoqassagaluarpat, nunanik sorlernik iligisaqarnerup erseqqilluinnarnissaa pingaaruteqartoq taassuma erseqqissaatigaa. Taamaammat eruopamiut suleqatit nunatsinnut tikeraarneri paasinarnerarpaa.
- Suli annertunerusumik akersuuttoqalissagaluarpat, neriuutigineqanngiivissumillu Issittumi sorsuttoqassagaluarpat, Kalaallit Nunaata sumi inissisimanera erseqqittuusariaqarami.
Nunatta Ruslandimut Kinamulluunniit iligiiaat inissisimanerannut tunngatillugu qanillattornaviannginnami nunanut killerniittunut tikilluaqqusinera paasiuminartoq, Sara Olsvig naliliivoq.
Franskit tyskillu nunatta inuisa isumaannik ataqqinnippalullutik saaffiginninneri USA-p ataqqinninngippaluttumik nalilerneqartumik saaffiginninneranut illuatungiliinerusut, ICC-p siulittaasua naliliivoq
- Natomi suleqatigiinneq eqqarsaatigalugu nunatta taama suleqateqarnera paasinarluinnarpoq, ICC-p siulittaasua oqarpoq.
Imali nangippoq:
- Illuatungeqarporli aamma eqqumaffigisassamik.
Frankrigimik suleqateqarneq pingaarpoq eqqumaffigisassaqarlunili
Nunanilu annerni tikeraaqqammertoq Frankrig assersuutigaa.
Frankrigip Natomi pingaarutilittut inissisimasup suleqatiginissaa pingaaruteqartoq, USA-millu illuatungiliinerminni inuit pisinnaatitaaffiinik demokratiimillu pingaartitsinerminik takutitsisoq, Sara Olsvig oqarpoq.
Frankrigili aamma nunasiaateqarsimasutut inissisimavoq, tamannalu politikkiannut ulloq manna tikillugu sunniuteqarpoq.
Tamannalu ICC-ip Naalagaaffiit Peqatigiinni sulinermini nunat inoqqaavisa pisinnaatitaaffiisa isumaqatigiinniarnerni sammineqartarnerini malugisarpaa.
- Tassani malunnarpoq, franskit suli taakkuusut nunat inoqqaavisa ataatsimoorussamik, tassa inuiattut akuerisaanerannik akuersaanngitsutut inissisimasuusut.
Tassalu nunanut allanut suleqatigerusutatsinnut qanoq oqariartuuteqarusunnersugut nalilersorluarneqartariaqarpoq.
- Uagut nammineq piumasatta soqutigisattalu kalluarneqannginnissaat, imaluunniit pingaartinneqaratik inissisimalinnginnissaat pillugu iliuuseqarniarpugut.
Nunalli allat soqutiginninnerat aamma piumasaqaateqarsinnaatitsivoq.
- Immaqalu una periarfissaq Kalaallit Nunaanninngaanniit ima atorlugu franskinut erseqqissumik oqarluni, ukua pisinnaatitaaffiit aamma nunat inoqqaavisa pisinnaatitaaffii inuiattullu akuerisaanerit tunngaviatigut akuersaarluinnarlugit pissusilersortariaqarpusi. Aammalu ilissi nammineerlusi atuutsittariaqarpasi, Sara Olsvig oqarpoq.
ICC-ip USA-mit Ruslandimiillu ilaasortaaffigineqartoq suliani attakkai
Nunarsuarmi pissutsit ilungersunarneri aamma ICC-mi ilaatigut USA-mit Ruslandimiillu ilaasortaaffigineqartumi malugineqarsinnaasut, taanna aamma oqarpoq.
Naggueqatigiittulli ukiuni 50-nngulersuni suleqatigiinnerup aamma nunarsuarmioqatigiit akornanni pissutsit ilungersunaraluaqisut attannissaa, ICC-p ilungersutigigaa Sara Olsvigip erseqqissaatigaa.
