Tunu periarfissagissaangaatsiarpoq ineriartortitsisoqartariaqarporli

Aalisarnermut, Piniarnermut Nunalerinermullu Ataatsimiititaliaq paasisassarsiorluni angalanermini, Tunumi illoqarfinni nunaqarfinnillu innuttaasut tusarnaarpaat. 

- Siunertarinikuuarput angalanissarput isorliunerusunut, ataatsimiiitaliaq paasisassarsiorluni angalanissaa, ataatsimiititaliami siulittaasoq Lars Poulsen (S) oqarpoq.

Sumiiffiup aalisarnermut piniarnermullu periarfissagissaangaatsiarnera ataatsimiititaliap takoreerpaa, inerirtortitsisoqarnissaali pisariaqartoq, Lars Poulsen isumaqarpoq.

Tassani Tunumi innuttaasut aningaasaqarnikkut tapersersorneqarnissamut, atortunullu anginerusunut bankimiit ajornannginnerusumik atorniarnissamut pisariaqartitsisut ataatsimiititaliap siulittaasuat isumaqarpoq. Taamaaliornikkut innuttaasunut atortorissaarutiminnik taarseeriaannaanngitsunut iluaqutaasinnaassammat, taanna oqarpoq.

- Taassuma malitsigivaa oqariartuutigalugu, tassalu ESU (Erhvervsstøtteudvikling, aaqq.) tamakkiisumik atuutilerneqarnissaanut periarfeqalernissaa, suliaralugu aallartissagaat, Lars Poulsen oqarpoq nangillunilu; 

- Minnerunngitsumik atortut tungaatigut, piniartuunermiik aalisartuunermut ikaarsaarnermik atortut, assersuutigilakka ningittakkat, bundgarnit kiisalu motoorit. Taakkuninnga taarsigassarsiffiginissaannut periarfissaqarumallutik, tassani annertunerpaamik oqariartuuteqarput, Lars Poulsen oqarpoq.

Pisassiissutit ikippallaartut

Nannunut arfernullu pisassiissutit amerlanerusut innuttaasuniit kissaatigineqaqqittut ataatsimiititaliap siulittaasua oqarpoq. Qilalukkanik qaqortaannarnilluunniit amerlanerusunik pisassinneqarsinnaagunik, innuttaasunut malunnaatilimmik iluaqutaasinnaasut, Lars Poulsen isumaqarpoq. 

- Qilalukkanik pisassiissutaasartut annikigalugit oqariartuutigisaqattaarmassuk, ilaasa allaat inuussutissiutigisinnaajunnaarlugit oqariartuutigalugu, taanna oqarpoq nangillunilu;

- Taamatuttaq aamma nannuttassiissutaasartut ukiorpassuarni nikinneq ajortut, nannut pillugit nalunaarut saqqummereernerata kingorna ersarittorujorujorujussuuvoq nannuttassiissutit amerlineqarnissaat kissaatigigaat, nanoqassuseq aarlerinanngimmat, taanna oqarpoq. 

Suliniutit taakku qanoq akisutigissanersut imaluunniit aallartisarneqarnissaat qanoq sivisutigissanersoq, ataatsimiititaliami siulittaasup qulakkeersinnaanngilai.

- Piffissaalluartillugu nalunaarusiamik tunniussaqarpugut, neriuutigisorujussuuarput aningaasanik inatsimmi isumaqatigiinniarnerni kiisalu ilusinikkiartuaartitsinissami taakku tamaasa ilanngullugit ikkussuunneqarumaartut. Tassami massakkuugami pisariaqartitsineq, Lars Poulsen oqarpoq.