Franskit præsidentiat, Emmanuel Macron Nuummi sinniisoqarfimmik ammaarusuppoq. Taassuma tamanna Nuummi nuutoqqami sapaatiummat tusagassiortunik katersortitsinerminni nalunaarutigaa.

Nalunaarut tamanna Jeppe Strandsbjergip Illersornissamut ilisimatusarfimmi Issittumi sillimaniarnermut immikkoortortaqarfiani lektorip, Ilisimatusarfimmilu nunanut allanut sillimaniarnermullu politikkimik suliaqarfimmut atassuteqartup tupaallaatigaa.

- Sinniisoqarfimmik pilersitsiniarnertik nalunaarutigereermassuk tupaallaatigigaara. Kisianni aamma tapersersuerusunnerannik ersarissumik aamma takussutissiivoq.

Jeppe Strandsbjergip oqarnera naapertorlugu Macronip Kalaallit Nunaannut tikeraarnera sinniisoqarfimmillu pilersitsinissaq Trumpimut ersarissumik takussutissiivoq.

- Trumpip toraagarisaanik ilorrisimaarutiginninngilluinnarnermik nalunaaruteqarpoq. Macronimut Trumpimut amerikamiut naalakkersuisuinik toqqaannartumik oqaloqatiginnittumut takussutissaavoq.

<em>Jeppe Strandsbjerg Illersornissamut ilisimatusarfimmi Issittumi sillimaniarnermut immikkoortortaqarfiani lektoriuvoq Ilisimatusarfimmilu nunanut allanut sillimaniarnermullu politikkimik suliaqarfimmut atassuteqarluni.</em> Assi © : KNR/Carsten Faurschou

Præsidentip nunarput sapaatiummat tikeraarnera amerikamiut præsidentiata tullersortaata J.D. Vancep marsimi tikeraarneranut sanilliukkaanni franskit præsidentiat tikilluaqqulluarneqarluarpoq.

- Ammasumik tikilluaqquneqarneq isumaqangaatsiarpoq. Tassa inissiinermut tunngavoq. Takussutissinnera isumaqanngitsuunanilu imaqanngitsuunngilaq, Jeppe Strandsbjerg oqarpoq.

Sinniisoqarfilli kalaallinut inuiaqatigiinnut qanoq isumaqassanersoq suli nalunarpoq. Jeppe Strandsbjergip oqarnera naapertorlugu periarfissat – taamatullu anguniakkat – annertupput.

Sinniisoqarfik ilisimatusarnermik suleqatigiinnermik, inuussutissarsiornermi aningaasaliinermik, kulturikkut avitseqatigiinnermik politikkikkullu oqallinnermik ilaatigut ammaasinnaavoq. Kisianni, taama pisoqarnissaanik isumaqanngitsoq, taassuma erseqqissaatigaa.

Trumpimut qinngarnartoq

Naalli præsidentit marluk imminut toqqaannanngitsumik isornartorsiuigaluartut Franskrigip USA-llu isumaqatigiinnginnerat siullermiinngitsoq, Jeppe Strandsbjerg nassuiaavoq. Taamaammat sinniisoqarfimmik pilersitsineq nunatta, Danmarkip, Frankrigip, USA-llu akornanni pissutsinik ajornerulersitsissanngissoraa.

- USA-p tungaaniit isigalugu suleqatigiinneq Kalaallit Nunaata Kinallu akornanni attaveqarnissamit ajornartorsiutaannginnerussaaq, taanna oqarpoq, nangillunilu:

- Nalunaaruteqarneq Trumpimut immaqa qinngarnarpoq, kisianni nunat sisamat akornanni pissutsit oqitsuinnaanngereerput. Aaqqiagiinnginnermut immaqa aallartitsisoqarpoq, kisianni aaqqiagiinngitsoqareerpoq.

Europamiunik qanimut iligisaqarneq

Amerikamiut præsidentiata, Donald Trumpip Kalaallit Nunaannik piserusunnini – aammaarluni – nalunaaruteqarnerata aamma tiguaasinnaanermut itigartitsinnginnerata kingunerisaanik franskit præsidentiat kalaallinut tapersersuinermik takutitsivoq.

Tamanna nunanut allanut naalakkersuisup, Vivian Motzfeldtip Macronimut nunatsinnut maajimi qaaqqusineranik ilaatigut kinguneqarpoq. Qaammatillu ataatsip missaa qaangiuttoq taanna Nuummut tikippoq.

Jeppe Strandsbjergip oqarnera naapertorlugu nunarput Danmarkilu USA-mut atatillugu killilimmik iliuuseqarsinnaapput. Taamaammat allanik ilissarsiortoqarpoq.

- Kalaallit danskillu tungaanniit Europamiunik qaninnerusumik iligisaqarnissaq Trumpillu piginnittoorusunneranik Trumpip allaffeqarfianit aamma Trumpimit toqqaannartumik nalunaarutigineqartunut akerliliisoqarnissaanik kissaateqartoqarpoq, taanna oqarpoq.

Franskit Issittumut soqutiginninnerat

Naalli Frankrigip nunatsinnut tapersiinera tigulluarneqaraluartoq tamanna nammineq pilersaarutaanik nassataqarpoq. Jeppe Strandsbjergip oqarnera naapertorlugu tamanna Frankrigip Issittumi inissaqarnissaminik – tassa sunniuteqarlunilu isumalluutinik pissarsisinnaanissamut qulakkeererusunneranut aamma tunngavoq.

- Frankrigip aatsitassanut pingaaruteqartunik pissarsinissamut qulakkeerinissamut peqataanissamut periarfissaq takusinnaagaa qularnanngilaq, Jeppe Strandsbjerg oqarpoq.

<em>Jens-Frederik Nielsen aamma Emmanuel Macron Nuummi Nuutoqqami tusagassiortunik katersortitsinermi.</em> Assi © : KNR / Markus Valentin

Taassuma toqqaannartumik paarlaasseqatigiinnikkut niuertoqanngitsoq, kisiannili siunissami suleqatigiiffiulersinnaasunik pilersitsiniarnerusutut erseqqissaatigaa.

- Ukialuit qaangiuppata annertuumik aatsitassarsiornissamut pilersaaruteqarnissaq naatsorsuutigigunanngikkaat isumaqarpunga. Kisianni aatsitassanut nukissiuutinullu tunngatillugu politikkikkut oqaloqatigiinnisamut naleqarluartumik aningaasaliinissamut misissuinissamullu periarfissanik pilersitsinissamut tunngalluni, taanna oqarpoq.

Taassuma najuunneq – qaninnerusumik attaveqalernissamut pitsaanerusumillu suleqatigiinnissamut alloriarfiusutut takussutissaasoraa.

- Franskit illersornissaqarfiata sungiusarnissaq aamma Issittumi najuunnissani soqutiginartippaa. Tamatuma saniatigut aatsitassat qaqutigoortut, attaveqaasersornermi aningaasaliinerit arlallit Kalaallit Nunaannilu aningaasaqarnikkut ineriartorneq oqaluuserineqangaatsiarput, taanna oqarpoq.