Trump: Kalaallit Nunaat nalagaaffitsinnut ilaalissangatippara
USA-p præsidentiata, Donald Trumpip nunarput naalagaaffimminnut ilaalersitaassangatillugu sisamanngornermi oqaatigigaa, Reuters allappoq.
Præsidentip oqaaseq ilaalersitsineq, nammineq naalagaaffimminut ilanngutititsinermik isumaqartoq atunngilaa, kisianni "ilaalersitsisinnaanermut" eqqarsaateqarnersoq aperineqarpoq.
- Ilimagaara taama pisoqassasoq, Trump oqartoq Reuters allappoq.
Præsidentip illorsuani Det Hvide Husimi Natop generalsekretæriata, Mark Ruttep ataatsimeeqatiginerani taama oqaaseqarpoq.
Trump siusinnerusukkut oqaaseqartarnermini "nunarsuarmi eqqissisimanissamut atatillugu pisariaqartipparput " oqaatiginikuuaa.
Isumaqatigiissuteqartoqassasoq
Taassumalu sineriammi suliaqarnerit innersuussutigalugit USA Kalaallit Nunaat pillugu isumaqatigiissuteqartariaqartoq oqaatigaa.
Nunatsinni inatsisartunut sapaatip akunnerani matumani siusinnerusukkut qinersisoqarnerata kingorna præsidenti nunatsinnut tunngatillugu siullermeertumik taama oqaaseqarpoq.
Qinersisoqarnerani Demokraatit qinigaanerpaapput. Partiip nunatsinni – naalakkersuisuugallartutulli aamma danskit naalakkersuisuisatulli – pisisoqarnissaa itigartitsissutigaat.
- Erseqqissartigu. Kalaallit Nunaat tuniniagaanngilaq. Ullumikkuunngitsoq. Aqaguunngitsoq Qaquguluunniit tuniniagaanavianngilaq, partii qineqqusaarnermi programmimini allappoq.
USA-p nunarput pisiarerusukkaa oqaatigeqattaarnikuuaa.
Taanna januaarimi tusagassiortunik katersortitsinermi Panamakanalimut aamma nunatsinnut atatillugu sakkussanik aningaasaqarnikkulluunniit pinngitsaaliissuteqarniarnersoq toqqaannartumik aperineqarama tamanna itigartitsissutiginngilaa.
