Nunanut allanut, inuussutissarsiornermut, aatsitassanullu naalakkersuisup, Múte B. Egedep (IA) nunanut allanut politikkikkut 2024-2025-mi nalunaajaat sisamanngormat saqqummiuppaa.

Politikerit tassunga atatillugu Inatsisartuni oqallinnissamut katersuupput.

Partiillu arlallit sakkussiornerput, Amerikamiut præsidentiata, Donald Trumpip nunamik tiguaanissamik sioorasaaruteqarnerata kingorna pingaartumik pisoq oqaaseqarfigaat.

Illoqarfimmi sakkutuut amerlanerusut takussaanerulernerat pingaartumik oqallisigineqarpoq.

Danskit illersornissamut isumaqatigiissutaanni illersornissamut isumaqatigiissutip immikkoortuata aappaata isumaqatigiissutgineqarnerata kingorna oqallittoqangaatsialerpoq.

Tamanna Issittumi Sakkutooqarfiup Nuummi nutaamik qullersaqarfeqalernissaanik kiisalu sakkutuut umiarsuaanut nutaamik talittarfiliortoqarnissaanik pissuteqarpoq.’

Naleqqalli sakkutooq inoqarfiusunit allamut, sinerissami sakkutooqafiusimasunut nuutsikkusuppai.

Partiit nunanut allanut tunngasunut oqaaseqartartuisa oqaaseqarneranni arlallit Naleqqap politikkia qaninnerulersimavaat.

Nuuk saassunneqaqqaassasoq

Nuummi sakkutooqarnera sorsuttoqaleraluarpat illoqarfiit pingaarnersaata siullertut saassunneqartuunissaanik pingaartumik pissuteqarpoq.

Tamanna nunanut allanut naalakkersuisuusimasup, Vivian Motzfeldtip (attaviitsoq) oqallinnermi oqaatigaa.

- Innuttaasut maaniittut qanorluunniit arlerinartorsiussapput. Illersornissaqarfimmit maaniittoqarnera attaveqaasersuutinik ajoqusertoqaraluarpat pitsaanerpaallunilu sukkasuumik qisuariaateqarfiusinnaavoq, taanna oqarpoq.

- Qanoq siooranartoqarsimatiginera annikillisarneqarsinnaanngilaq.

Vivian Motzfeldtip (attaviitsoq) Issittumi Sakkutooqarfiup Nuummiinnerata illersornissamut isumaqatigiissummi immikkoortup aappaani isumaqatigiissutigineqartutut annertusineqarnissaanut aalajangernermut isumaqataanini Inatsisartuni sisamanngornermi oqallittoqarnerata nalaani aalajangiusimavaa. Assi © : KNR / Markus Valentin

Issittumi Sakkutooqarfimmi pisortap, Generalmajor Søren Andersenip Aki-Matilda Høegh-Damip (N) oqarneratulli Naleqqap suliniutini nutaani innuttaasunik 'inunnik illersuuteqarneraanera' isumaqatiginngilaa.

- Tamanna isumaqatiginngilara, taanna oqarpoq, itisiliillunilu:

- Ruslandip sakkutooqarnikkut anguniagai qiviarutsigit taakku makkuupput: naalakkersuisut illorsui, napparsimmaviit, atuarfeqarfiit, umiarsualiviit mittarfiillu. Taakku tamarmik innuttaasunut sunniuteqarsinnaapput – aamma sakkutooqarnikkut soorunami atortulersuutit.

Justus Hansen Demokraatit sinnerlugit sisamanngormat kingullermik aamma assingusumik oqarpoq.

- Toqqissisimannginneq paasisinnaanngilara. Aalajangiisarfinni sakkutooqartuaannarpoq. Maani Nuummi Inatsisartoqarlutalu naalakkersuisoqaratta pingaartumik sakkutooqassaaq.

Nuummi sakkutuut amerlanerulissanngitsut

Issittumi Sakkutooqarfik Nuummiit nuunneqassanrsoq Siumup oqaaseqarfiginngilaa.

Siunissamili sakkussiornissat nunatsinni sumiiffinni allani inoqarfiunnginnerusuni pissasut isumaqarput.

-  Nuummi sakkutooqarnikkut suiaqarnerusoqalissanngitsoq Siumumit isumaqarpugut, siunissamilu sakkutooqarnikkut suliniutit Kangerlussuarmut Narsarsuarmullu inissinneqartariaqarsoraagut, Erik Jensen (S) Inatsisartuni sisamanngormat oqarpoq.

- Nuummi innuttaasut kisimik eqqarsaatigissanngilagut, nunarpulli tamaat illersorneqassaaq. Sooq Nuummi innuttaasut kisimik illersorneqarniarnersut apeqquserparput.

Atassutip siulittaasuata, Aqqalu C. Jerimiassenip sakkutooqarnikkut najuunnerit Nuummiinnatik Kangerlussuarmi Narsarsuarmilu pinerulernissaat isumassaqarnersut misissorusuppaa. Assi © : KNR / Henriette Simonsen

Aqqalu C. Jerimiassenip sakkutooqarfiup najuunnerata assersuutigalugu Kangerlussuarmut Narsarsuarmullu nuunneqarsinnaanera isumassaqarnerunersoq, naalagaaffeqatigiinni oqallisigalugu aallartinneqartariaqarsoraa.

- Nuummi innuttaasut toqqissisimannginnerusutut misigilerpata tusartaarlutalu iliuuseqassaagut.

Sinerissamut tusarnaassaagut

USA-p Kalaallit Nunaatalu akornanni Washington D.C-mi maanna isumaqatiginninniartoqaleruttorpoq.

Amerikamiut sakkutuuisa nunatsinni sumiiffinni assigiinngitsuni pingasuni najuunnerulernissamut periarfissat soqutigigaat kingorna saqqummiunneqarpoq.

Sumiiffiilli maluinnaat atilerneqarput: Kangerlussuaq Narsarsuarlu.

Pipaluk Lynge (IA) Nunanut allanut Sillimaniarnermullu Ataatsimiititaliami siulittaasuuvoq. Taassuma Amerikamiut sakkutuuisa nunaqarfiit minnerusut ammassaneraat suli ilisimaneqanngitsoq oqallinnerup nalaani oqaatigaa.

Nalorninerli pissutigalugu politikerit sinerissami najugaqartunut tusarnaarnerussapput.

- Amerikamiut sakkutuuinut sakkutooqarfinnillu kissaateqarnermut atatillugu najugaqavissunut tusarnaassaagut, Pipaluk Lynge oqarpoq.

- Nunarput isorartoorujussuuvoq. Taamaammat innuttaasut sineriammiittut oqaloqatigilluarlugillu peqataatinneqassapput.

Demokraatit sakkutooqarnikkut najuuttoqarnerata sinerissamut siammasinnerulersinneqarsinnaanerata misissorneqarnissaa aamma ammaffigaat.

- Innuttaasut ilaat Nuumiinnaanngitsoq sakkutooqarpat toqqissisimanerussasut nammineerlunga nalunngilara, Justus Hansen oqarpoq.