Putinip siunnersortaata Frederiksen isornartorsioraa: Kalaallit Nunaat annaasariaqarpaa.

Ministeriunerup Mette Frederiksenip(S) Kalaallit Nunaat annaasariaqarpaa. Ruslandip præsidentiata Vladimir Putinip, aningaasarsiorneq pillugu nunanullu allanut tunngasunut siunnersortaa Kirill Dmitriev inoqatinut attaveqarfikkut X-ikkut taama allappoq.

Videoliaq, ministeriunerup Mette Frederiksenip Finlandip Norgellu naalakkersuinikkut siuttuisa Ruslandip præsidentianik Putinimik oqarasuaatikkut ataatsimeeqateqarsimanerannik isornartorsiuinera pillugu Danmarkimi nutaarsiassaqartitsiviit allaaserisaqarnerannut tunngasoq, tassunga atatillugu aamma ikkunneqarpoq.

- Mette Frederiksenip Kalaallit Nunaat annaasariaqarpaa. Sorsukkumatuut ajorsartariaqarput. Oqaloqatigiinneq ajugaajumaarpoq, Kirill Dmitriev, Ukrainemi sorsunnerup soraarnissaanut atatillugu isumaqatigiinniaqataasimasoq, allappoq.

Norgep ministeriunera Jonas Gahr Støre peqatigalugu Vladimir Putin oqarasuaatikkut oqaloqatigisimallugu, Finlandip præsidentiata Alexander Stubbip marlunngornermi ullaakkut nalunaarutigaa.

Norgep Finlandillu iligisaasa ilaat Putinimik oqarasuaatikkut ataatsimeeqateqarneq isornartorsiorpaat. 

Mette Frederiksen isornartorsiuisunut ilaavoq.

- Norgemiut Finlandimiullu iliuuserisaat qularuteqarfigilluinnarpakka. Uagut tamanna pillugu suleqatigineqarnatalu ilisimatinneqanngilagut.

- Kisimi iliuuseqarani Europa ataatsimoornerusariaqarpoq, ministeriuneq Nunat Avannarliit Siunnersuisoqatigiivisa Finlandimi ataatsimiinnerisa nalaanni TV 2-mut oqarpoq.

Europamiut oqariartuutaat suujunnaarsinneqarsinnaasoq

Sverigep ministeriunerata Ulf Kristerssonip Putinik ataatsimeeqateqarneq aamma isornartorsiorpaa.

- Taama ataatsimeeqateqartoqarnera Europamiunik avissaartuutsitsilersinnaavoq, aarlerinartoqarsinnaavoq, taanna Sverigemi nutaarsiassaqartitsivinnut oqarpoq.

Norgep ministeriunera Jonas Gahr Støre isornartorsiuinerit kingorna akuerinngilai.

- Allat sinnerlugit oqaaseqanngilagut, uagulli nammineq sinnerluta oqaaseqarluta. Suleqativut iligisavullu torersumik ilisimatinneqaqqaarput, ataatsimiinnermilu oqaluuserineqartut pillugit imaqarniliorpugut, Gahr Støre Norgemi aviisimut VG-mut marlunngornermi oqarpoq.

Putinimik oqarasuuatikkut ataatsimeeqateqartoqarsimanera nunani avannarlerni nunani sanilerisanit isornartorsiorneqartoq Ukrainep præsidentiata Volodymyr Zelenskyjp akerlianik nuannaarutigaa.

Norgep Finlandillu diplomati aqqutigalugu suliniuteqarnerat qujamasuutigalugu, taassuma inoqatinut attaveqartarfikkut X-ikkut allaaseraa.

RITZAU