Pele Broberg Naleqqap siulittaasuatut qinerneqaqqittoq

Pele Broberg tapersersorneqarluni Naleqqami siulittaasutut qinigaaqqippoq.  

Partiip sapaatip akunnerata siuliani ataatsimeersuarnerani taasititsinertaqanngitsumik qinigaasoq, partii tusagassiuutinut nalunaarummi allappoq.  

Inatsisartunut kingullermik qinersisoqanngitsiartoq, Jens Napãtôk' qinigassanngorteqqinniarnani nalunaarpoq.  

- Utoqqalinnginninni sulisartunngorniarama qinigassanngorteqqinniarnanga oqarpunga, Jens Napãtôk’ Facebookikkut 2024-mi allappoq. 

Jens Napãtôrli siorna qinigassanngorteqqippoq, politikkikkullu siulittaasup tulliatut maanna qinigaaqqilluni. 

Aamma Aki-Matilda Høegh-Dam aaqqissuussaanikkut siulittaasup tulliatut qinigaavoq.  

Partiip saqqummiussineratut, taakku pingasuullutik taasititsinertaqanngitsumik qinigaapput ersaattaanneqarlutillu.  

Partiip allannera naapertorlugu, ersaattaattoqaraluartoq Nuummi ataatsimeersuarnermi oqallinnerit ilaatigut sakkortupput: 

- Ataatsimeersuarnermi oqallinnerit uummaaripput, ilaannilu sakkortusarlutik, tusagassiuutinut nalunaarummi allassimavoq:

- Taamaakkaluartoq ataatsimeersuarneq nuannersumik ataatsimoorfiulluni, imminnullu tusarnaarusussuseqarluni ingerlanneqarpoq.

Qinigaasut allat

Naleqqami pingasut siulersuisuunerni qinerneqartut saniatigut, arfineq pingasunik aamma qinigaasoqarpoq.  

- Ataatsimeersuarnermi aalajangiinerit pingaarnerit ilagaat sinerissap tamarmiusup siulersuisuunerni sinniisoqarnerata nukittorsarneqarnissaa. Siulersuisuunerni nunap immikkoortui tallimat - Avannaa, Qeqertarsuup Tunua, Kitaa, Kujataa Kangialu – sinniisoqassapput, Naleraq allappoq:

- Taakkua saniatigut siulersuisunut ilaasortaq ataaseq nalinginnaasumik qinigaassaaq, ataaserlu nunaqarfiit sinniisaannit toqqarneqassalluni.

Partiip nalunaarutaa naapertorlugu, aaqqissuussaanerup nutaap sineriak tamaat, isorliunerusuni nunaqarfinnilu misilittakkat pisariaqartitallu Naleqqap sulinerani aalajangiisarneranilu ersarissumik ilaatinneqartarnissaat qulakkiissavaa.  

Partii inuusuttunut aamma immikkoortortaqarfittaarpoq, taannalu ateqarpoq: Naleqqat, tassanilu Hannah Olsen siuttuuvoq.