Naalakkersuisoq: Nunanit allanit suliartortut nakkutigineqarnerusariaqarput

Nunatsinni nunanit allanit suliartortut ukiuni qulikkaani kingullerni amerligaluttuinnarput. 

Ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsenip (D) oqarneratut nunanit allanit suliartortut nakkutigineqarnerusariaqarput. 

- Nakkutilliinerusariaqarpugut, Nivi Olsen KNR-imut oqarpoq:

- Tassa imaappoq tikittartut suussusersineri, qaammatit qassit sulineri, ilaquttatik nassarlugit tikinnersut, aammalu qaqugukkut angerlaqqittarnersut. Kisitsisit erseqqissumik piginngilagut, taamaammat aalajangersaaniarnermi tusiappugut 

Pele Brobergip (N) nunanit allanit suliartortut amerlanerpaamik ukiuni sisamani nunatsinniisinneqartarnissaat sapaatip akunnerata siuliani siunnersuutigereeraalu, taama nalunaaruteqartoqarpoq. 

- Amerlavallaarput imatut paasillugu, ersarippallaaleqqapput kalaallit suliffissaralui tigooqqarlugit taakkununnga tunniussorneqarmata, Pele Broberg KNR-imut oqarpoq. 

Naalakkersuisut inatsimmik allanngortitsinissaq piareersimaffigalugu Inatsisartuni ataatsimiinnerup nalaani paasissutissiissutigaat.  

- Inatsit atuuttoq 1992-imili suliarineqarnikuugami nutarterneqartariaqarpoq, Nivi Olsen oqarpoq.

Kalaallit sulisartut

Naatsorsueqqissaartarfimmi kisitsisit saqqummiunneqarsimasut naapertorlugit, nunanit allanit nunasisut Naalagaaffeqatigiinnermi nunaninngaanniit naleqqiullugit, ukiuni tallimani kingullerni marloriaatinngorsimapput.  

Danmarks Statistikip saqqummiussinera naapertorlugu, nunani allani innuttaassusillit 2.899-it 2026-mi nunatsinniipput.

- Partiip oqariartuutigisai inuiaqatigiinni pingaaruteqartutut isigivarput, amerliartupiloorneri ukiuni kingullerni. Taassuma aamma suliassaqartilerpaatigut, Nivi Olsen oqarpoq.

Nunanit allanit suliartortut kalaallit  sulifittaarnissaannut periarfissamik annikilliisarnerat Pele Brobergip oqaatigisaata ilagaat.

Nivi Olsenip inuusuttut suliffimmut appakaannissamut periarfissaat allamiunit aporfilerneqannginnissaa pingaaruteqartoq aamma oqaatigaa.

- Nakkutiginerusariaqarpagut, uagut maani nunaqartut aamma inuusuttagut suliffinnut appakaannissaannut aamma aporfiussanngitsut aamma taakkua nakkutigisariaqaratsigit pingaaruteqartorujussuuvoq inatsisinik nutarsaanissaq.

Nunani allamiunut oqartussaaffiup nunatsinnit oqartussaaffigineqalernissaa 

Inuit Ataqatigiit nunani allamiunut suliassaqarfik danskinit ullumikkut akisussaaffeqarfigineqartup nunatsinnit oqartussaaffigineqalernissaa kissaatigigitsik Inatsisartuni oqallinnermi oqaatigaat.

Nivi Olsenip oqarnera naapertorlugu naalakkersuisut suliassaqarfiup nunatsinnit oqartussaaffigineqalernissaa sulissutigaat.

- Pingaartipparput akisussaaffik annerusoq uagut tigussallutigu aamma oqartussaaffigisariaqaripput annermik. Angerlaannissaa kissaataajuaannarpoq taannalu taassuma tungaanut naalakkersuisut sulipput, taanna oqarpoq.

Nunatsinni nunasisartut kangiamiuunerupput soorlu Filippinerinit Thailandimeersullu.

- Kangiamiut maani nunatsinni sulisut amerligaluttuinnarput, taanna kikkut tamarmik takusinnaavaat, Nivi Olsen oqarpoq: 

- Massakkut aalisakkerivimmi amerlasoorujussuanngorput, siornatigut neriniartarfinniinnerunikuullutik.

Inatsisartunili partiit arlallit nunatsinni sulisussanik pisariaqartitsisoqartoq taamaammallu nunani allamiunik sulisoqarnissaq pisariaqarsinnaasoq erseqqissaatigaat.

Nivi Olsenip nunatsinni sulisussat pisariaqartinneruleriartornerat aamma nunani allamiunullu tunngasut ataatsimut misissorneqartariaqartut aamma maluginiarpaa.

- Naalakkersuisuni angisuutut sammisassatut pingaarutilittullu tiguarput aamma oqallinnermi tusaavarput allannguisoqartariaqartoq.