Politiit ullormut nalunaarutaat: Inuit pingasut timmisartukkut hashimik Nuummut eqqussisimasutut pasineqartut

Inuit marluk tamarmik immikkut Nuummut hashimik marlunngornermi eqqusseriarput. Marluullutilli akitsuuserisunik unitsinneqarput pingajuallu suliami aamma pasineqarluni.

Allattoq Emil Weis

oktobarip 28-at 2026 08:22

Nutserisoq Ivalu Thorleifsen

Kalaallit Nunaanni Politiit inuk kokainimik Nuummut eqqusseriarsimasoq pillugu marlunngornermi ullup qeqqata missaani nalunaarfigineqarput.

Angut Nuummi mittarfimmi akitsuuserisunit unitsinneqarsimavoq.

- Kokainiunngitsoq paasivarput. Hashimilli poortanik marlunnik katillugit 548 gramitut oqimaatsigisunik nassaarpugut, Kalaallit Nunaanni Politiini sillimasut pisortaat Lars Even oqarpoq.

Angutip killisiorneqarnermini pinerluuteqarnermi peqataasoq alla timmisartumi ilaasoq aamma oqaatigaa.

- Taanna aamma kingornatigut tigusaraarput. Ilisimasaqannginnerarpoq kisiannili pasineqartumit siullermit oqaatigineqarpoq suliamilu aamma maanna pasineqarluni, Lars Even oqarpoq.

Hashit poortat marluk saniatigut, angut nillujuitsunik nassarpoq, taakkulu imerpalasunik suussusersineqanngitsunik imaqarput. Politiit imerpalasut taakku suuneri misissuleruttorpaat.

Arnaq angutinut marlunnut taakkununnga attuumassuteqanngitsoq timmisartumi tassani aamma ilaasoq, hashimik 300 gramimik eqqussisimasutut aamma pasineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.