USA-mi generali USA-mut isumaqatiginninniarit pillugit qaqutigoortumik paasissutissiivoq.

General Gregory M. Guillot ,U.S. Northern Commandimi Amerikamiut nunataanik illersuinermik akisussaassuseqartumi naalagaanertaavoq.

Pentagonip Kalaallit Nunaat nunanut allanut ilaasutut isiginagu U.S. Nothern Commandimut ilaasortaasutut siorna juunimili isigilerpaa

Generali naalagaanertaq Amerikami senatorinit marsip 19-ianni tusarniaaffigineqarpoq.

USA-p suna isumaqatiginninniutiginiarneraa, taamatuttaaq sakkutooqarnermut isumaqatigiissut 1951-meersoq naammannersoq tassani tusarniaassutigineqarpoq. 

Naatsumik oqaatigalugu: USA nunatsinni sumiiffinni assigiinngitsuni pingasuni sakkutooqarfiliinissamut isumaqatiginninniuteqaleruttorpoq, piffissamili matumani illersornissamut isumaqatigiissummik isumaqatigiinniartoqanngilaq.

- Nunanut allanut ministereqarfik suleqatigalugu illersornissamik suliaqarfiit maannakkut inissisimaffigisagut annertusisinnaanerivut takuniarlugu sumiiffiit pingasut Danmarkimut Kalaallit Nunaannullu isumaqatiginninniutigerusuppagut, generali oqarpoq.

Sakkutooqarfiit taakku pingasut sumiissinnaanerat erseqqissaatigineqanngilaq. 

Sakkutooqarfiit nutaat 

Senatori Angus King, Nuummut februaari aallartittoq tikeraarpoq. Sakkutooqarnermut isumaqatigiissut 1951-meersoq imaqangaatsiartoq, USA-lu nutarterinissaminut pisariaqartitsinngitsoq, taassuma oqaatigaa. 

Gregory M. Guillotip sakkutooqarnermut isumaqatigiissut imaqangaatsiarneranik senatori isumaqatigaa, taamatuttaaq Amerikamiut Kalaallit Nunaanniinneranik annertusaanissani kissaatigalugu oqaatigalugu.

- Ministereqarfipput allallu suleqatigalugit umiarsualiviit mittarfiillu arlallit alliliiffiginiarsaraagut, tamanna præsidentimut Issittumi pisariaqartitsilissagaluarutta periarfissaqartitsinerussaaq, generali oqarpoq.

Senatorit angutit marluk Angus King (saamerleq) aamma Gary Peters (talerperleq) General Gregory M. Guiollotimut isornartorsiortumik apeqquteqarput. Taakku Amerikamiut sakkutuui Kalaallit Nunaanni suniarnersut aamma sakkutuut qanoq ilillutik kalaallit innuttaasui tatiginnilerseqqinniarneraat akissutissarsiniarsaraat. Assi © : Isak Hüllert / KNR

Generalip tamatuma saniatigut Golden Dome KNR-ip siusinnerusukkut allaaserisaa eqqaavaa. Tassunga atatillugu Ruslandip issittortaanit missilinut pukkitsumit aallartinneqartunut USA-p illersorsinnaanissaanut timmisartunik sorsuutinit orsiivinnillu aallartitsinissamut periarfissaqarnerulernissaa kissaatigineqarpoq.

Generalip amerikamiut sakkutuuuisa immikkut ittumik suliaqartartuinit ullumikkut Kalaallit Nunaanniittoqannginnera aamma ajornartorsiutaanerarpaa.

- Sakkutuut immikkut ittumik suliaqartartut aalajangersimasumik najuunneq ajorput, aamma imarsiortut ilaat pisariaqartitagut aalajangersimasumik najuunneq ajorput, taanna oqarpoq, nangillunilu:

- Tamanna periarfissarilerniarlugu Danmark suleqatigaarput.

Akerliliineq annilaanganerlu

Senatorip, Jeanne Shaheenip Danmark Kalaallit Nunaalluunniit Amerikamiut sakkutooqarnikkut kissaataannut akerliunikusut nalaanneqarkuunersoq akissuterserusuppaa.

General Gregory M. Guillotilu taamaattoqannginneraalluni akissuteqarpoq:

- Naamik, senatori nalaannikuunngilarput. Danskit illersornissamut pisortaat attaveqatigilluartorujussuuara aamma suleqatigiinnermi kissaatigineqartut periarfissallu tamarmik naammassineqartarput.

Amerikamiut illersornissamut ministeriata, Pete Hegsethip USA-p Kalaallit Nunaat Issittumit Amerikap kujataata avannarpasissuata tungaanut isorartussuseqartumik “isumannaallisaanermut immikkoortutut qanittutut” ilaasutut isigigaa marsip 30-anni oqaatigaa. Isumannaallisaanermut immikkoortoq nutaaq Pentagonimit 'Amerikap avannaa annertunerusoq'-mik taagorneqartoq, Pete Hegsethip oqaatigaa.  Assi © : Jim Watson/AFP/Ritzau Scanpix

Senatorilli isumaqatiginninniarnerit generalimut taamaallaat apeqqutiginngilai.

Senatorip, Gary Petersip Nuummut februaarimi aamma tikeraartup innuttaasut arlallit USA-p tiguaanissamik januaarimi siorasaaruteqarnerani annilaangasimanerarpai.

Tatiginninneq innarlerneqaraangami tatiginnittoqaqqilernissaanut suliaqangaatsiartoqartariaqartarpoq. Tatiginninneq taanna qanoq pilerseqqinniarpisiuk?

- Tatiginninneq Kalaallit Nunaannut sakkutooqarnermik ingerlatsinerit kiisalu Danmarkimi suleqatigisagut aqqutigalugit pilersissimasarput ammasumik, ersarissumik periuseqarnikkut aamma nutaanik pitsaanerusunillu suleqatigiiffissarsiornikkut attanniarsaraara. Kingullermik tikeraarnitsinniilli taamaaliorniarsarivugut.

Gary Petersilli akissut tamanna naammaginngilaa. Taassuma kalaallit innuttaasuinit USA-mut tatiginninneq pilerseqqinneqarnissaa piumasaqaatigaa. Tamanna sakkutooqarnermit kalaallinut innuttaasunut toqqaannartumik attaveqarnikkut pissaaq.

General Gregory M. Guillotilu tassunga naatsumik akissuteqarpoq: 'Aap'.