Narsarsuup mittarfiata matunera nikallungaatigineqarluni ullumikkut kaffilliutigineqartoq

Ulloq tikiuppoq. 

Timmisartut Narsarsuup mittarfianut ullumi naggataasumik missapput. 

Ullormut atatillugu Narsarsuarmi, Igalikumi Qassiarsummilu innuttaasunut tamanut mittarfimmilu sulisunut mittarfiup illorsuaani kaffillertoqassaaq. 

Hotel Narsarsuaq, aamma matusussaq, qullersanit Air Greenlandimit Greenland Airportsimeersunillu oqalugiartitsisoqarnerani kaffillerluni, tiitortitsillunilu kaagillissaaq.

Mittarfik 1941-mi pilersinneqarpoq. 

Naalakkersuisut mittarfiup matuneqarnissaa Qaqortumilu, Narsarsuup kujataani 60 kilometerinik ungasitsigisumi, nutaamik mittarfiliortoqarnissaa maanna aalajangerpaat.

Amerikamiut sakkutooqarfeqaleqqinniartut

USA-p nunatsinni sakkutooqarfinnik ingasunik nutaanik pilersitserusunnerat qanittumi saqqummiunneqarpoq - sakkutooqarfissallu mittarfiliorfissagissaaarlutillu umiarsualiviliorfissagissaartuussapput, umiarsuarnut anginernut tulaffigisinnaasaannik.

Danmarkimi USA-milu tusagassiuutit arlallit Narsarsuaq Amerikarmiunit sakkutooqarfilioqqinnissamut piukkunneqartutut saqqummiuppaat tamannalu Amerikamiut illersornissaqarfiata oqaaseqartartuanit  The New York Timesimut uppernarsarneqarpoq.

Danmarks Radiop Amerikamiut Kujataani nunaqarfimmi, Amerikamiut siornatigut sakkutooqarfittut 1941-mit 1958-ip tungaanut atorsimasaanni kingornali nunatsinnut Danmarkimullu tunniunneqartumi attaveqaasersuutinut qimaannakkanut soqutiginninnerat ullumikkut oqaluttuaraat.

Mittarfik, akunnittarfik talittarfillu sakkutut imarsiortuisa officeriata misissorniarlugit alakkarsimagai DR allappoq.

'Susoqarnissaanut atatillugu ilisimasaqanngilluinnarpugut'

Nunaqarfik maanna nunaqarfitoqqatut qimaannakkatut taagorneqartoq qanoq pineqassanersoq suli naluneqarallarpoq.

Kommunip atuarfik meeqqerivillu matussavai.

Peqqissaavik akunnittarfiup inissiarsuanut atassuteqarmat tassanngalu kissartumik innaallagiamillu pilersorneqarmat aamma matussaaq.

- Timmisartoq kingulleq akunnialuit qaangiuppata qangattassaaq, susoqarnissaalu takujumaarparput, Storch Lund Narsarsuarmi ukiuni 52-ini najugaqartoq, unnuisarfimmik, angallassinermik suliffeqarfimmik cafémillu ingerlataqarsimasoq oqarpoq.

Taassuma ilaquttanilu najugaqaannarniarniarlutik aalajangersimavaat, susoqarnissaanulli atatillugu ilisimasaqanngilluinnarput, taanna oqarpoq, nangillunilu:

- Namminersorlutik Oqartussanit imaluunniit kommunimiit qanoq kiffartuussisoqarnissaanut atatillugu tusagaqanngilagut, ulluinnaammi orsussamik atuinermik, eqqagassalerinermik, niuertarfinnik minnerunngitsumillu nakorsiartarfimmik ingerlatsiffiussapput, aqaguli ulloq nutaaq aallartittoq takujumaarparput.

Innuttaasorpassuit Narsarsuarmiit nuussimapput.

Innuttaasut siorna 130-nit 140-nut amerlassuseqartut, Storch Lundip oqaatigaa.

Inuit maanna 30-t missaanniipput.

- Ulloq uagutsinnut alianarpoq, taanna oqarpoq.

Eqimattat sulisut ikittut Narsarsuarmiiginnassapput, taakkulu qulimiguulinnut mittarfittut atuinissamut Angallannermut aqutsisoqarfimmit akuersissuteqarnissaata tungaanut Narsarsuullu mittarfiata napasuliaani inoqatitsissallutik.

Akuersissutip juunimi piareernissaa naatsorsuutigineqartoq, mittarfimmi pisortap, Finn Thomsenip oqaatigaa.