Timmisartup Qaqortumut meqqaarnera
Qaqortumi mittarfik pisortatigoortumik sisamanngornermi ammassaaq. Timmisartorli siulleq mereerpoq.
Misileraallunimi marlunngornermi unnukkut mittoqarpoq, timmisartumillu mittarfimmut mittoqaqqaarluni.
Greenland Airports facebookimini taama allappoq, mittoqarneranit assit videoliallu siammarterpaat.
- Mittarfiup atornissaanut misiliineq pisariaqarpoq, mittarfiup atorneqarnissaata akuerineqarnissaanut ilaammat, Greenland Airports allappoq.
Mittarfiup ammarneqarnera malunnartinniarlugu Qaqortumi katersortarfimmi ilaatigut kaffillertoqassaaq, mittarfimmilu tikittarfiup illorsuartaanut soqutiginnittunut matut ammatinneqassapput.
- Nuannaarutigaarput Qaqortumi mittarfiup ammaanersiorneranut soqutiginnittorpassuaqarmat, nalunngilarpullu amerlasuut peqataarusuttut. Ammaanersiornerup kingorna tikittarfiup illorsuartaanut matut ammarumaarput, tikittarfiup illorsuartaanut isertoqarsinnaanngorumaarluni, Greenland Airports facebookimini allappoq.
Mittarfimmik ammaaneq KNR-imit ulloq naallugu malinnaaffigineqassaaq, malinnaatitsineq radiokkut aallakaatitassiap Nunatta Nipaata ullaakkut arfineq-marlunit aallartissavaa KNR-TV-illu allakaatittagaata Unnu'mannap malinnaatitsineq naggasissallugu.
