Ilulissat aasaanerani inoqarluartarpoq. Akunnittarfiit ulikkaartarput, umiatsiamillu takornariartitsisut umiarsualivimmut uteqattaartarlutik, aamma nunarsuarmi tamarmeersut Ilulissat kangerluannik, qipoqqarnik Qeqertarsuup Tunuanilu pinngortitarsuarmik takunnikkiartorlutik tikerartarput.

Ilulissani nunanit tamalaanit mittarfittaaq takornariaqarnerup siunissaanik suli ineriartortitsinissaa naatsorsuutigineqarpoq. Najukkami takornarialerinermik suliaqartut arlallit suliassaqarnerulernissaminnut piareersalereerput.

I Love Ilulissat Toursimit Suulut Geisler nulialu amerlanerusunik takornariartitsisinnaalerniarlutik Greenland Crusisesimit umiatsianik arlalinnik ilaatigut pisiaqarput.

Taanna takornariartitsinermik suliffeqarfimmik ukiuni sisamani ingerlatsivoq, ukiullu tullia aggersoq pitsaanerpaanissaa naatsorsuutigaa.

- Aappaagumut inniminniisoqareernikuuvoq, taakkulu nalinginnaasumik inniminniisoqartassusaata amerlaqatigaat. Taakku saniatigut allanik aamma inniminniisoqartarpoq. Taamaammat suut tamarmik pissusissamisut ingerlappata takornariaqarnerup nalaa ingerlalluarfiussaaq.

Angalasut amerlaneruleriartortillugit illoqarfik ineriartornermut malinnaasinnaanersoq aamma apeqquserneqarpoq.

Unnuisarfiit aasaanerani ulikkaartartut ukiup sinnerani nipaannerungaatsiartarput. Suulut Geislerip tamanna atorluarneqanngitsutut isigaa.

- Aasaanera ulikkaaqqaavittarpoq, ukiuuneranilu inissaqartorujussuusarluni. Taamaammat ukiup tamaanut siammarterluarnerussavagut, taamaalilluta Ilulissani inissaqartitsineq tamakkiisumik atorluassallutigu, taanna oqarpoq.

Suulut Geislerip I Love Ilulissat Toursimeersup Ilulissani unnuinissamut periarfissat killeqarnerat pissutigalugu takornariartoqarnissaata pinngitsoorneqarsinnaanera ernumassutigaa.

Tamatuma saniatigut takornarianut inissaqartitsinnginneq pissutigalugu aasaanerani takornariarsinnaagaluartut tikinngitsoortarnissaat ernumassutigaa.

Taassuma oqarnera naapertorlugu Ilulissanut takornariaqarnerulersitsisoqarnissaa aaqqiissutissaanngilaq. Takornarialli ukiup ingerlaneranut tamarmut agguataarluarneqarnerussapput.

Nittarsaassineq pitsaanerusoq akillu pitsaanerusut takornariaqarluarnerunerata avataani soqutiginninnerulersitsissasut, taanna isumaqarpoq.

Qamuteralaat ukiuunerani uninngasartut

WhaleToursimit Claus Foss Hansen aamma taama naliliivoq.

Ilulissani takornariaqarnermik suliaqartup akunnittarfinni inissaqartitsinnginneq pillugu oqallinneq ajornartorsiutaasumut allamut maluginngitsoortitsisinnaasoraa: tassa Ilulissani atortorissaarutit misigisassallu pioreersut atorluarneqanngitsoortarput.

Aasaaneranimi unnuiffissanik pissarsiniartoqangaatsiartaraluartoq takornariaqarnermik suliaqarnerup ukiup sinnerani atorneqarneq ajorpoq.

- Takornarianik sullissisinnaassuseqarluarpugut. Takornarialersunik ukiuni kingullerni takkuttunik suliaqartorpassuaqarpugut, taakku ukiuunera tamaat atorneqarneq ajorput, taanna oqarpoq.

Umiatsiat qamuteralaallu takornariartoqannginnera pissutigalugu ilaatigut uninngaannartarput.

- Qamuteralappassuit takornariaqannginnera pissutigalugu ukiuunerani uninngaannartarput.

Claus Foss Hansenip oqarnera naapertorlugu Ilulissani ukiuunerani takornariaqarnissamut neqerooruteqareerpoq. Qimusserneq, qamuteralanneq, arsarnerit sikumilu misigisassat periarfissat ilagiinnarpaat.

Nunatsinnut amerlanerusunik takornariaqartitsiniarneq taamaammat ilungersuunneqartussat annersaraat.

- Juunimi, juulimi aggustimilu kisimi takornariarfiusariaqanngitsugut inunnut ilisimatinniarsiuk. Ukiuunerata nalaani qimussimik, qamuteralannik angalaartoqarsinnaallunilu sikumiinneq arsarnerillu misigineqarsinnaapput, taanna oqarpoq.

Claus Foss Hansenip suleqataata, Vilhemine Nathanielsenip unnuisarfiit namminersortut naammattumik nittarsaanneqartanngissorai. 'Nittarsaanneqarnerat pitsaanerugaluaruni immaqa taama ilungersuatigisoqassanngikkaluarpoq', taanna oqarpoq.

Taassuma taamaammat Ilulissani ukiuunerani periarfissat takornariarusussinnaasunut ilisimaneqarnerulersinneqarnissaannut nuna tamakkerlugu nittarsaassisoqarnerunissaa ujartorpaa.

Tamatuma saniatigut Ilulissani unnuiffissaqannginnerup oqallisigineqangaatsiarnera aamma isornartorsiorpaa.

Taassuma Ilulissat unnuiffissaqarluareersoraa akunnittarfinnilu inissat 60-70 procentit missaanniittut ukioq manna aasaanerani unnuiffigisamini taamaallaat ulikkaaqqasimanerarlugit.

Tamanna ukiut siuliinit appasinnerungaatsiarpoq, namminermi oqarneratut inissat 120 procentit tungaannut ulikkaaqqalluinnarsinnaasarnerat unnuisussanillu itigartitsisariaqartarsimanini aqqusaareerpaa. 

Mittarfik nutaaq kisimi naammanngitsoq

Nunatta takornariarfiunissamut ilippanaateqarluarnera siammasissumik isumaqataaffigineqarpoq. Ilulissani mittarfittaaq kisimiilluni ineriartortitsinissamut naammanngitsoq, Greenland Airportsip pisortarisimasaata, Jens Lauridsenip mianersoqqussutigaa.

- Naatsumik oqaatigalugu naamik. Akunnittarfinni inissat naammanngillat. Nuummi Qaqortumiluunniit, taanna oqarpoq.

Mittarfiit angalasut nunatsinnut tikinnissaat ajornannginnerulersippaat. Akunnittarfinnili inissap takornariaqarnermillu inuussutissarsiortut naammannginnerat pissutigalugu periarfissat annaaneqarsinnaapput.

- Mittarfiimmi angallattoqarsinnaanissaanut taamaallaat periarfissaqartitsipput, unnuiffissat allallu aamma periarfissaassapput, Jens Lauridsen oqarpoq.

- Naatsumik oqaatigalugu naamik. Akunnittarfinni inissat naammanngillat. Nuummi Qaqortumiluunniit, Greenland Airportsip pisortarisimasaa oqarpoq. Assi © : Karolina Josefsen Josenius / KNR

Taassuma Ilulissani, Nuummi Qaqortumilu akunnittarfiliornissamut pilersaaruteqartoqareerpoq. Kisianni takornariaqarneq ineriartussappat allanik aningaasaliisoqarnissaa pisariaqarpoq.

Tamatuma saniatigut suliaqarfiup ilaani aningaasaliineq allani aningaasaliisoqarnermik pisariaqartitsilerneranik ineriartorujoortuartoqarnissaa naatsorsuutigaa.

- Akunnittarfiit amerlanerulerpata imaatigut angallassisut amerlanerulissapput, aqqutillu amerlanerulissapput, taamaalilluni akunnittarfiit amerlanerusut pisariaqartinneqalissapput, taanna oqarpoq.

Taassumallu ineriartornerup nalaani misigisassat immikkuullarissut immikkuullarissutsillu Kalaallit Nunaannut takornariarnissamut kajungerisitsisut annaaneqannginniassammata ineriartornerup oqimaaqatigiissumik pinissaa erseqqissaatigaa.

Taassuma Ilulissani, Nuummi Qaqortumilu takornariaqarnikkut ineriartortoqarnissaa kisiat pineqarnani nunap sinneranut aamma siammarterneqarnissaanut tunngatippaa.

Ukiuunerani takornariaqarneq aningaasaliissutit amerlanerulernissaannut pingaaruteqartoq

Air Greenlandip pisortaanerata, Jacob Nitter Sørensenip mittarfiit nutaat takornariaqarnerup tamanut ineriartortitsissappata ukiuunerani takornariaqarneq pingaaruteqarnerarpaa.

Aasaaneranimi qaammatini pingasuinnarni aningaasarsiortoqarsinnaaguni akunnittarfinnut nutaanut aningaasaliisussarsiornissaq ajornakusuussaaq.

- Ilulissani takornariaqarnerpaaffik sivikitsuaraavoq. Ukiumut qaammatit pingasut tunisaqarfioriarlutik qaammatit qulingiluat tunisaqarfiunngippata aningaasarsiorluartoqarsinnaanngilaq, taanna oqarpoq. 

Taamaammat ukiuunerani takornariaqarnissaanut soqutiginarsaasoqartarpoq. Takornariaqarsinnaassuseqarneq pioreersoq atorluarneqaannarani akunnittarfinnut allanullu neqeroorutinut aningaasaliinissamut aamma soqutiginarnerulersitsissaaq.

- Ukiuunerani takornariaqartitsinissamut nukivut tamaasa atussavagut, tassanimi takornarianut inissaqartitsivugut, Jacob Nitter Sørensen oqarpoq.

- Mittarfiit ineriartortitsisoqarnissaanut aningaasaliisoqarnissaanullu tunngassuteqarput. Tunngaviusoq maanna piviusunngorpoq, ineriartortoqalernissaalu maanna takujartulissagipput isumaqarpunga, Jacob Nitter Sørensen oqarpoq. Assi © : KNR

Taassuma mittarfiup nutaap takornariaqarnermut nunallu aningaasaqarneranut iluaqutaangaatsiarnissaa naatsorsuutiga. Aningaasaliinerilli ullormiit ullormut takkunneq ajorput.

Aningaasaliisartut timmisartukkut attaveqaatit nutaat qanoq qisuariarfigineqassanersut takoqqaarlugit  akunnittarfinnut takornariartitsinermullu neqeroorutinut aatsaat aningaasaliiumalissapput.

- Aningaasaliisartut qanoq pisoqassanersoq takoqqaassavaat. Niueqatigiinnerup tungaatigut qanoq qisuariartoqarpa? Isumalluarfiusinnaaneralu takusinnaaleraanni pilersaarusiorneq aallartissinnaavoq aningaasaliisoqarlunilu, taanna oqarpoq.

Taassumalli akunnittarfiit neriniartarfiillu mittarfiup ulloq atuleqqaarfianit piareersimanissaat naatsorsuutigineqarsinnaasorinngilaa.

- Ineriartorneq aningaasaliinerillu pissappata mittarfik pisariaqarluinnarpoq. Pisariaqarluinnartoq taanna maanna piareerpoq. Isumaqarpunga taava pisussat piumaartut, taanna oqartoq.

Aningaasaqarnermut Siunnersuisoqatigiit nalunaarusiaat naapertorlugu, Kalaallit Nunaata nuna tamakkerlugu tunisassiaasa 5 procentiisa missaat takornariartitsinikkut isertinneqartarput, isertitallu ukiuni kingullerni amerliartupiloorput. Inuussutissarsiorfiulli maanna periarfissarititaasut eqqarsaatigalugit killissani tikippaa.

Taamaattumik takornariartitsineq siuariartussappat akunnittarfiit amerlanerit, misigisassasiorfissat amerlanerit aasallu sivikitsup avataani tikeraartut amerlanerit pisariaqartinneqarput.

Ilulissani takornariartitsisartut arlallit pilersaarutinut taakkununnga piareersimapput. ’Piumanninnerup anguniakkanut malinnaasinnaanera maanna apeqqutaavoq - aningaasaliisullu ukiup ingerlanerani takornariaqarnermut aningaasaliiumassanersut.