Aappaagumut qaleralittassiissutit nutaat aalajangersarneqartut

2027-mut aalisagartassiissutit Naalakkersuisunit aalajangersarneqarput. Tamanna qaleralinnut ilaatigut atuuppoq. 

Nalakkersuisut tusagassiuutinut nalunaarummi taama allapput. 

Kitaani Tunumiluunniit najugaqarneq aamma apeqqutaavoq.

Kitaani avataasiorluni 2027-mi qaleralinniarnerup TAC-ia 17.309 tonsiunissaa aalajangersarneqarpoq, taamaalillutik pisassiissutit siorna pisassiissutaasunut sanilliullugit 355 tonsinik ikileriarput.

Tunumili siorna pisassiissutinut sanilliullugit pisassiissutit tonsinngorlugit amerleriarput.

Tunumi avataasiorluni 2027-mi qaleralinniarnerup TAC-ia 8.243 tonsiunissaat aalajangersarneqarpoq. Imaappoq siorna aalisagartassiissutinut sanilliullugit 349 tonsinik amerlanerusunik aalisagartassiisoqarpoq.

Aalisakkat allat aalisagartassiissutigineqartut

Qalerallit sinerissap qanittuani pisarineqartartut ukiut kingulliit ingerlaneranni ikiliartupiloorsimapput.

KNR-illu Royal Greenlandip ukioq manna qaleralittassani tamangajaasa pisarisimagai,  ukioq manna maajimi nutaarsiassiissutigaa.

Royal Greenlandimi pisortaaneq Toke Binzer KNR-imut taamani ima oqarpoq:

- Raajat qalerallillu ikiliartorput.  Avataasiorluni aalisarnermi pissutsit allanngujaappasinnerugaluarput, pisassiissutittali ilaat annaavagut, pilersaarutit naapertorlugit taakku aalisartunut nutaanut tunniunneqartussaapput.

Qeqertalik Seafoodip, Polar Seafoodimik piginneqateqarfiusup, Kitaani qaleralittassat 2.468,5 tonsit Tunumilu saarullittassat 5.000 tonsit neqeroorusioreerlutik aggustimi pissarsiarai.

Qaleralittassat saniatigut naalakkersuisut suluppaakkanut, tupissutinut, nataarnanut qeeqqanullu pisassiipput. Kitaani qeeqqanut pisassiissutigineqartut tamarmiusut 2027-mi 227 tonsiupput, taamaalillutik pisassiissutigineqartut siorna pisassiissutigineqartunut sanilliullugit 548 tonsinik ikileriarput.

Aammattaaq najorpilikkanik Kitaani 150 tonsinik aappaagu siullerpaamik pisassiisoqassaaq.