Imigassamik atornerluineq inuiaqatigiinnut 420 millionit koruuninik aningaasartuutaavoq - aningaasartuutaasartullu maanna misissoqqissaarneqassapput
Imigassamik atornerluineq Kalaallit Nunaannut akisuvoq.
Inuiaqatigiit aningaasaqarneranni toqqaannartumik aningaasartuutaasut nunap tamarmi aningaasarsiaata 2-mit 2,5 procentiuneri 2015-imi misissuinerup takutippaa, aningaasaqarnermut naalakkersuisoqarfik tusagassiuutinut nalunaarummi taama allappoq.
Tamanna 420 millionit koruunit missaanniippoq.
Aaqqissuusseqqinnermut isumalioqatigiissitap naalakkersuisunit pisortat aningaasaqarnerannik misissuisussatut inassuteqaatinillu saqqummiussisussatut siorna pilersinneqarsimasup, imigassamik atornerluinerup inuiaqatigiinnut qanoq akeqarnera erseqqinnerusumik takusinnaajumallugu naatsorsuutit maanna nutarterniarpai.
Imigassamik atornerluinerup kinguneri ulluinnarni suli malugineqarsinnaapput.
Assersuutigalugu Nuummi imigassartorsimatilluni biilertoq qulliup napasuanut aporluni pingasunngornermi unnukkut ajutoorpoq.
Inuiaqatigiinnut inunnullu nalingi
Inuiaqatigiinnulli toqqaannartumik aningaasartuutit imigassamillu atuinerup ilaqutariinnut, meeqqanut inuiaallu peqqissusaannut sunniuteqarnerata immikkoortinnissaat pingaaruteqarpoq.
Taamaattumik 420 millionit ajoqusiinerup sunniutaanik tamakkiisumik naatsorsuinertut isigineqassanngillat.
Ilaasortat Kalaallit Nunaanni Peqqinnissaqarfimmi professorimit Christina Viskum Lytken Larsenimit isumalioqatigiissitap kingullermik ataatsimiinnerani imigassamik atornerluinerup inuiaqatigiinni kinguneri pillugit ajornartorsiutillu qanoq iliuuseqarfigineqarsinnaanerat pillugu paasissutissinneqarput.
Kommune Kujallermi imigassamik tuniniaanerup sassaallernerullu inerteqqutaalernerani misilittakkat ataatsimiititaliamut aamma saqqummiunneqarput.
Ataatsimiititaliarsuup misissuinerit nutartikkat imigassamik ajornartorsiummik aaqqiissutissarsiornermini tunngavissaqarluarnerulernississavai.
Imigassaannaanngitsoq
Imigassaq ataatsimiititaliarsuup oktobarip 29-anni pingajussaanneerluni ataatsimiinnerani sammisat arlaliusut ilagaat.
Ataatsimiititaliap aamma ilinniartitaanermut tunngasut eqqartorpai qitiusumillu allaffissornerup misissoqqissaarneqarnissaa aalajangerlugu.
Allaffissornerup qanoq ineriartorsimanera qanorlu pisariillisarneqarsinnaallunilu sunniuteqarluarnerulersinnaanera ilaatigut misissorneqarpoq.
Aaqqissuusseqqinnermut isumalioqatigiissitap inuiaqatigiinni ilungersunartut suussusersiniarlugit allannguinissamullu periarfissaasinnaasunik siunnersuusiorniarluni juunimi 2027-mi qiterpaarluni nalunaarusiornissani suliniutigaa.
