Visit Greenland: Takornariaqarneq ineriartorpoq, ukioq mannalu suli pitsaanerulersinnaalluni
Nuummi mittarfik nutaaq USA-mi Newark Airportimut toqqaannartumik atassuteqalerluni 2025-mi ammarpoq.
Tamatuma saniatigut præsidentip Trumpip tiguaanissamut sioorasaaruteqarnera pissutigalugu nunarput ukiup aallartinnerani ukkatarineqangaatsiarpoq.
Visit Greenlandip takornariaqarnerup qanoq ingerlaneranik misissuinertik – takornariartitsisunit 61-init tunngaveqartoq – maanna saqqummiuppaa, inerniliissutaasorlu ataatsimut pitsaasuuvoq.
- Takornariartitsisut amerlanerussuteqartut 2025 pitsaasumik pitsaalluinnartumilluunniit tamakkiisumik pilersaarusiorfiusutut, takornariarusuttut amerliartorneratut aamma nunanit tamalaanit siammasissumeersunit tikeraarfiusutut nassuiaatigaat.
Misissuinermili takornariaqarneq ineriartortinneqaannassappat pitsanngorsaavigineqartariaqartut arlallit aamma paasineqarput.
Uani angallannermi ilungersuutigineqartut aamma unnuiffissat amigaataaneri pingaartumik sammineqarput.
- Takornariaqarnermik inuussutissarsiorneq neriunaateqartumik ineriartornissamut piareersimasoq ataatsimut takutinneqarpoq, kisianni ineriartortoqaannassappat ataqatigiissaarinerup pitsaanerulersinneqarnissaa attaveqaasersuutillu patajaannerunissaat aamma pisariaqartinneqarpoq, misissuinermi allassimavoq.
Siullermilli kommunini assigiinngitsuni qanoq ingerlasoqarsimanera qimerloorneqarsineqarsinnaavoq.
Kommunini assigiinngitsuni
Qeqertalimmi aamma Sermersuup Kitaani ingerlalluartoqarpoq, Avannaata Kommuniani ulapputtoqarlunilu inissaqartitsinissaq amigaataasoq, Visit Greenland allappoq.
Qeqqata Kommuniani allaaneruvoq.
- Qeqqata Kommuniani naak pinngortitami misigisassarsiornermilu neqeroorutigineqartut soqutigineqarluaraluartut angallannermi ajornartorsiutit angallannermilu allanngortitsisoqartarnera ineriartornissamut akornusiipput.
Tunumi kujataanilu ukiup ingerlanerani takornariaqarneq pitsaasuusoq Visit Greenlandip inerniliissutigaa, sumiiffinnili marlunni ingerlatsinermi akornuteqartoqarlunilu inissaqartitsiniarneq killeqarpoq.
Aappaagu
Visit Greenlandip ukiup tullianut patajaatsumik tunngavissiisoqartoq misissuinermi allappaa.
Tamanna nunanit tamalaanit soqutiginnittoqarnerata alliartorneranik, inniminniisut amerliartornerannik kiisalu oqaluttuarisaanermi aatsaat taama nuisatigisoqarneranik ilaatigut pissuteqarpoq.
- 2026-mi takornariaqarneq sinaakkutitut atugassarititaasut pisaanerulersinneqarsinnaappata pitsaanersungaatsialersinneqarsinnaavoq, Visit Greenland oqarpoq.
Takornariaqarnermi periarfissaritinneqartut ukioq manna tamakkiisumik atorneqassappata allannguisoqartariaqarpoq.
- Sananeqaatini ajornartorsiutaasut ineriartornermut arriillisaataapput, pingaartumik assartuinerup patajaannera inissaqartitsinerlu takornariaqarnerup ineriartornissaanut pingaaruteqarput.
