Ajutoorneq utoqqaat illuanni najugaqartup toquneranik kinguneqartoq

Utoqqaat Illuanni puiguttortunut immikkoortortami najugaqartoq ajutoornermi kingorna toqukkut qimaguppoq.

Kommuneqarfik Sermersooq tusagassiuutinut nalunaarummi allappoq.

Najugaqartoq marlunngornerup unnuaani najugaqarfimmi quleriiaanni siullernit nakkarpoq kingornalu Nuummi peqqinnissaqarfimmi toqukkut qimagulluni.

- Tamatta pisoq tupassutigeqaarput, siullertullu ilaqutaasunut qanigisaasunullu asasaminnik annaasaqartunut misiginneqataanerput apuukkusupparput, Suliffeqarnermut Isumaginninnermullu Ingerlatsivimmi pisortaq, Ejner Grønvold oqarpoq.

Utoqqaat illuanni errortuisarfimmi igalaakkut nakkarneq pivoq. Sumiiffinni, puiguttortut ulluinnarni nakkutigineqaratik isersimaffigisinnaasaanni igalaat allallu annerfigisinnaasaat nalinginnaasumik isumannaallisarneqartarput, kommune tusagassiuutinut nalunaarummi allappoq.

Ejner Grønvoldilu oqarpoq:

- Isumannaallisaaffiusinnaasut suut tamaasa isumannaallisaaffigisinnaanngilagut. Tamanna isumaqarpoq, sumiiffinni minitaqarluni najugaqartunit annerfigineqarsinnaanerinut ilimanaateqarsinnaaneri nalilersuisoqartuaannartoq. Errortuisarfimmi igalaap isumannaallisaataa equngasimavoq, ikkusimanerlulluni. Tamanna piaarnerpaamik isumannaarneqarpoq, aamma suleriaasigut qulaajarneqaqqipput.

Kommunip ajutoorneq alianartuunerarpaa, taamaammallu sulisut immikkut ilisimasalimmit ikiorfartorneqarnissaminnik aamma neqeroorfigineqartut kommune tusagassiuutinut nalunaarummi allappoq.