Naalakkersuisoq: Kiffartuussinermut isumaqatigiissummut malittarisassat aporfiupput

Attaveqaasersuutinut Naalakkersuisup kiffartuussinissamut isumaqatigiissutinut malittarisassat Tasiilamut aaqqiissuteqarnissamut aporfiunerarpai. Taassuma naalakkersuisoqarfiatalu malittarisassat allat maanna misissulerpaat.

Allattoq Markus Valentin

novembarip 11-at 2026 07:23

Nutserisoq Connie Fontain

KNR-ip Tasiilamit ilanngutassiat arlallit piffissami kingullermi saqqummiuppaat.

Taakkunani Tasiilami Islandimut angallannikkut ukiuunerani attaveerunnerup inuiaqatigiinnut kingunerisai oqaluttuarineqarput.

Kingunerluutit ilaat tassaapput: Suliffissanik annaasaqarneq, takornariaqarnermi aningaasatigut ilungersuaneq, pilersuinerup ajornakusoornera.

Iddimanngiiu Jensen Bianco (IA) Namminersorlutik Oqartussat allaffeqarfianniippoq. Taanna Tasiilameersuunermi saniatigut attaveqaasersuutinut isorliunerusunullu naalakkersuisuuvoq.

Aamma atuaruk Tasiilaq: Inuiaqatigiit inuussutissarsiorfitsik Islandimit annaagaangassuk

- Icelandairip tassani timmisartuussisarunnaarnera nukinginnartorujussuusoq nalunngilara.

- Taamaattumik pissutsit paasilluarsinnaavakka. Sapinngisatsinnik aaqqiissutissarsiorpugut, taanna oqarpoq.

Tamannali ajornaatsuinnaanngitsoq, taanna oqarpoq.

Tasiilaq pillugu nangeqattaartuliaq

Allaaserisaq una Tasiilami inuuneq pillugu KNR-ip allaaserisaasa ilagaat.

Tusagassiortugut Tasiilami inunnik assigiinngitsorpassuarnik sapaatip-akunnerata ataatsip ingerlanerani oqaloqateqarput.

Ilungersunartut inuiaqatigiinnilu ullutsinni pisimasut nuannersut allaaserisami matumani sammineqassapput.

Malittarisassat aaqqiissuteqarnissamut aporfiusut

Aningaasanik inatsisip ilaasunik angallassinissaq pillugu tunngaviini kiffartuussinissamut isumaqatigiissummi immikkoortuni sisamani qaqugukkut kiffartuussinissamut isumaqatigiissusiortoqarsinnaanera allassimavoq.

Tassanili immikkoortoq ataasiinnaq arlallilluunniit naammassineqassanersut allassimanngilaq.

Aningaasanut inatsimmittaaq Air Greenland, Disko Line, Norlandair aamma Arctic Umiaq Line kisimik kiffartuussinissamut isumaqatigiissuteqarfigineqarsinnaasut allassimavoq.

- Sullissisartunik allanik kiffartuussinissamut isumaqatigiissusiornissamut inatsisitigut tunngavissaqartoqanngilaq, naalakkersuisoq paasissutissiivoq.

- Sullissisartunut allanut isumaqatigiissusiortoqassappat inatsisitigut tunngavissamik pisariaqartumik pilersitsisoqartariaqassaaq.

Aamma atuaruk Tasiilarmiut nipaat: Atisanik, naatitanik arnanullu tunngasunik nioqqutissanik amigaateqartut

Iddimanngiiu Jensen Biancop oqarnera naapertorlugu tunngaviit ajornartorsiuteqartitsipput.

Taanna naalakkersuisoq siulini assigalugu nammineq naalakkersuisoqarfinilu kiffartuussinissamik isumaqatigiissusiorsinnaanatik isumaqarpoq.

Tamanna piumasaqaatip siulliup naammassineqannginneranik pissuteqarpoq: Tassa Kulusuup Nuullu akornanni Air Greenland aqqutigalugu timmisartuussineqareerpoq.

- Angallannermi periarfissaqanngitsuni, imaluunniit akit pissutigalugit amerlasuut angalasinnaanngippata kiffartuussinissamut isumaqatigiissusiorsinnaasugut malittarisassani allassimavoq.

Naalakkersuisutut sinaakkutinik saneqqussillutik oqarsinnaanngilatit: 'Niuernermik tunngaveqartumik angallassisoqareeraluartoq, kisianni iliuuseqarnissatsinnik pisariaqartitsisoqarpoq'.

- Tamat oqartussaaqataanerannut ataqqinnilluinnarpunga. Inatsisartut naalakkersuisut sulissutigisaannik inatsisinik akuersissuteqartarput. Taamaammat uanga inatsisip sinaakkutai malillugit suliaqassaanga - taamaanngippat naalakkersuisutut uppisinneqassaanga, Iddimanngiiu Jensen Bianco akivoq.

- Taamaammat kiffartuussinissamut nutaanik isumaqatigiissusiornissamut aningaaliissutitigut inatsisitigullu tunngavissaqarnissaa sulissutigaara.

Kiffartuussinermi isumaqatigiissutaasimasut

Icelandair Kulusummi, Nerlerit Inaanni Tasiilamilu timmisartuussinermi kiffartuussinermik 2002-mi isumaqatigiissuteqarpoq.

Timmisartuussisarneq niuernikkut atugassarititaasut 2013-imi aallaavigilerpaat. Tamanna taamani naalakkersuisup, Jens B. Frederiksenip (D) suliniuteqarnerani pisoq, KNR-imit allaaserineqarpoq.

Kommuneqarfik Sermersuup pitsaanerusumik ataqatigiissilerneqarnissaa siunertaavoq. Taamaammat Kangerlussuarmi Kulusummilu timmisartuussisarneq Air Greenlandimut tunniunneqarpoq.

Aalajangiineq Tunumi akerlilerneqartoq KNR-ip taamanili oqaluttuaraa. Tassanilu takornariaqarnermut kingunissat ernumassutigineqarput.

Allisiguk

Aaqqiissutissat

Naalakkersuisut aningaasanut inatsimmi tunngaviit pissutigalugit kiffartuussinissamut nutaamut isumaqatigiissusiorsinnaannginnami tamanna misissorneqartariaqartoq oqaatigaa.

- Taamaattumik malittarisassat allat misissorniarneqartariaqarput. Aningaasanut inatsit isumaqatiginninniarnerit aqqutigalugit suliarineqarsinnaavoq, kisianni tassunga suli killinngilagut. Immaqa aappaagu misilissinnaavarput.

Kiffartuussinissamut isumaqatigiissummi tunngaviit sisamat Naalakkersuisut Kulusuup Islandillu akornanni angallannermut attaviit pisortanit taperserneqarnissaat sulissutigisinnaagaat mattutinngikkaat atorfilittanit kingorna erseqqissarneqarput.

Kulusuk pillugu Air Greenlandimut Nerlerit Inaallu pillugu Norlanairimut kiffartuussinissamut isumaqatigiissutit 2030-mi aamma 2027-mi juunimi atorunnaassapput.

- Taamaattumik tamanna (aappaagumut aaqq.) kiffartuussinissamut isumaqatigiissuteqarnissamut atatillugu sulissutigissavarput.

- Kisianni Kulusummut Ittoqqortoormiinullu tunngatillugu qanoq allannguuteqartoqarnissaa pillugu sukumiinerusumik oqaaseqarfigiuminaatsippara.

Aamma atuaruk Air Greenland: Kulusummut timmisartuussinerit amerlanerussapput – arlalinnilli piumasaqaateqarfiusumik

Iddimanngiiu Jensen Biancop taassumalu naalakkersuisutut siuliata aaqqiissutissarsiortoqarnissaa arlaleriarlutik oqaatigaat. Tamannali qanoq isumaqarnera aalajangersimasumik oqaatigineq ajorpaat.

Aaqqiissutissat qanoq ittut misissorpisigit?

- Siammasissorujussuarmik misissuivugut. Icelandairip, Air Greenland Tunumilu suleqatigisartakkat suleqatiginerannut tunngasut.

Aamma atuarukQimussertartut qimmiminnik takornariat ikilinerisa kingunerisaanik ikilisaasariaqalersinnaasartut

Iddimanngiiu Jensen Biancop Icelandair ingerlaavartumik oqaloqatigineqartoq oqaatigaa.

- Tasiilamiittut Icelandairimut itigartitsissuteqarfigisimagigut paasinerlussimagunarpaat. Itigartitsinngilagut. Oqaloqatigiinnerput ingerlaavarpoq. Taamaammat iluatsilluarnissaa neriuutigaarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.