Qimussertartut qimmiminnik takornariat ikilinerisa kingunerisaanik ikilisaasariaqalersinnaasartut

Jens-Ole Nûko qimmiminik Tasiilap qaqqarsuisa aappaluttut akornanni nerisitsivoq.

Taanna nulianilu 2023-mi qimmeqalerput. Qimmillu ulluinnarsiutigaat. 

- Pinngitsoorsinnaajunnaarnikuuakka. Ulloq maannamut nuannaralugit ingerlappakka. 

- Taavalu aamma ilaqutariittut qimusserujoortarpugut. Taavalu aamma ilaannikkut aallartarpunga sumukarfeqarnanga aalajangersimasumik. 

Jens-Ole Nûko takornarianik qimusserluni sullissisarnermini misigisimasani eqqarsaatigileraangamigit, oqaluttuaq immikkut ittoq eqqaasarpaa: - Puisinniarniarluta aalajangeratta, nannumik naammattuueriataarnikuugatta.Takornarialerinikkut immikkut ittunik misigisassaqarnartaqaaq naatsorsuutiginngisamik naammattuueriasaartoqarsinnaalluni. Tamanna uanga puigunaatsorsiarinikuuara, taanna oqarpoq. Assi © : Markus Valentin / KNR

Qimmit Jens-Ole Nûkomut kiffaanngissuseqarnermut ilisarnaataapput.

- Kiffaanngissuseq atulaarlugu, qimmillu kisimiilaarluni. Tassa nuannequtaa aamma taanna. Taanna aamma sungiusaaginnarani qimusserujoorluni.

Qimuttunik qimmiuteqarsinnaanissamut aningaasat amerlanerit Islandimit takornarialerinerminngaanneerput.

Icelandair ukiuunerani Kulusummukartarunnaarmat, Jens-Ole Nûko qimmiminik ikilisaasariaqarsimavoq. 

- Tassa uggornarpoq taamaalinera. Kisianni neriuppunga turistilerisut uniffigiinnarnagu alloriaqqissasut. Arlaannik ujartuillutik. 

Qimmit toqunneqartut

Jens-Ole Nûkop qimmini ikilisarusunngikkaluarpai. Allatulli iliorsinnaasimanngilaq. 

- Turistileriffigisartagara nalorninartorsiorfimmiikkami taavalu qimmit nerukkaatissaannik ukiumoortumik biistiiliinikuunanga. Periarfissaqarpiarnata.

- Allatut ajornartumik ilanngartilaarnikuuakka artukkinnginnerussagatta qimmikkalu.

- Qimmit qimmeqarfimmiilluni erlinnarnermut. Neriuuteqarpunga Islandi ammaannassasoq.

Jens-Ole Nûko Islandimit ukiuunerani timmisartuussisoqartarunnaarneranik, qimmiminik ikilisaasariaqarsimavoq. Kisimiinngilarlu. Assi © : Markus Valentin / KNR

Jens-Ole Nûko qimminik ikilisaasariaqarsimasuni kisimiinngilaq.

- Qimmerpassuaqarpugut, kisianni ukiorpassuit qimmeqarnikut ilai qimmeerukkamik. Taavalu takornarialerisut ilai qimmeerullutik. 

Rasmus Poulsen, Tasiilaq Toursimik inuussutissarsiuteqartoq qimmiminik aamma ikilisaasariaqarsimalluni oqaluttuarpoq.

Silap pissusiata allanngornera qimmeqarnissamullu aningaasassaqarnerup ajornakusoornera tamatumunnga pissutaaneruvoq, ukiup ingerlanerani qimussinik angalasarneq sivikimmat. Taanna 20-t sinnilaarlugit qimmeqarsimagaluarluni 12-13-inik maanna qimmeqarpoq. 

Islandimit ukiuunerani timmisartuussisarunnaarnerata kingunerisaanik takornariat tikeraartartullu aningaasaleeqataasartut ikilissappata, tamanna qimmit ikilinerannik kinguneqassaaq.

- Nuanninngisaannarpoq. Aamma utoqqalillutilluunnit napparsimalersimagaangata. Tassami qimuttuupput, taamaattorli kinaassuseqarput aamma qimuttoriuarnikuugatsigit suleqatigalugillu ataffigisarpagut, Rasmus Poulsen oqarpoq. 

- Qimminik ikilisaasariaqarneq toqutsisariaqarneq nuanninngisaannarpoq. 

Qimmit siunissaat

Naak Tunumi qimmit ikiliartoraluartut, Jens-Ole Nûkop siunissaq isumalluarfigaa.

- Tassa oqarusunngilanga ernumagalugu, kisianni neriuut pigiuaannassavara. Qimmeqarfimmiippugut aamma nungunngisaannassapput qaqugumut. 

Nukappiaqqat marluk KNR-ip apersuinerani takkupput. Taakkua Jens-Ole Nûkomut nuannaartorinninnerat takuneqarsinnaavoq, nukappiaqqallu Jens-Ole maliutigalugu suliaqarnerani ikiorpaat.

Inuusuttullumi Jens-Ole neriuuteqalersippaat.

- Qimmeqartut ikiliartorput ukuli inuusukaat aamma qimmitaartortut aamma neriuuteqarnarput. Taamaammat qimmeqarnerput maani Tunumi ernumaginngilara. 

Tunumi qimussimik sukkaniunneq ileqqutoqaanngilaq. Jens-Ole Nûkoli 2024-mili peqataasarpoq peqataasarninilu ingerlatiinnarniarpaa. Tunumi qimussimik aappaagu sukkaniuttoqarnissaa neriuutigaa.  Assi © : Markus Valentin / KNR