Borgmesterip tulliata Tasiilami takornarialerisut suliffissaaleqinerlu ernummatigigai

Ininik attartortitsisarneq, qimussertitsineq, umiatsiamik angallassineq, qamuteralannik ATV-nillu angallassineq.

Tasiilaq Tours siorna iluatsilluarpoq, piginnittullu Rasmus Poulsenip ulloq naallugu sulisumik atorfinitsitsinissaq pilersaarutigigaluarpaa.

Islandimiilli timmisartuussisoqartarunnaarnera pissutigalugu pilersaarutit taamaatiinnarneqarput.

- Siorna ingerlalluarpugut. Suliffeqarfik ingerlalluarpoq ukiumullu siulianut sanilliullugu marloriaammik kaaviiaartitaqarneruvugut.

- Islandili pillugu nutaarsiassaq saqqummermat pissutsit allanngorluinnarput. Maannakkut suliakippunga. 

Rasmus Poulsen Islandimit takornariarpassuarnik siorna sullissereerluni, sullissinera maanna annikinnerpaaffissaminiippoq.  Assi © : Tasiilaq Tours

Sulisitsisut Tasiilami immikkoortortaqarfiani siulittaasup, Mike Nicolaisenip, illoqarfimmi takornariat tassaakkajunnerarpai Islandimut takornariat, angalanerminnut atatillugu Tunumut angalasartut.

Rasmus Poulsen aamma taama isumaqarpoq.

- Takornariat ilarpassui ulluni arlaqanngitsuni Islandimeeriarlutik maanga ingerlaqqittarput.

- Kulusummut ulluinnarlugu ulluniluunnit marlunni ukiorpassuit matuma siorna  takornariartoqartarpoq. Takornariat tikittarput, qimussertinneqartarput ullormilu tassani timmisartumik amerlanertigut utertarlutik.

Taassuma Islandimut takornariarfiunerpaaffiup nalaani ullut tamaasa siornatigut timmisartuussisoqartarnera ukiorlu naallugu siornatigut timmisartuussisoqartarnera oqaluttuaraa.

Taamaalilluni naleqqussarsinnaassuseqalerlutillu tunisassianik assigiinngitsunik ineriartortitsinissamut periarfissaqarnikuupput.

KNR-ip Islandimut angallannikkut attaveqarnerup Tasiilami qimminik arlalinnik toqoraanermik qanoq kinguneqarsinnaanera qanittukkut oqaluttuaraa. Egon Poulsenip qimmit amerlassusaat 500-nit 300-t missaannut ikilisimanerat oqaluttuaraa: - Kulturitsinni pingaarnerpaat ilaanniissimapput. Qimmit kalaallit inuusinnaatippai, taanna oqarpoq. Assi © : Markus Valentin / KNR

Rasmus Poulsenilli Islandimiit Kulusummut angallannikkut attaviup ukiuunerani matuneqarnera pissutigalugu piffissaq suliaqarfiuallaassanngissoraa.

Taassuma Islandimit takoriartoqannginnera qimmiminut qanoq kinguneqarsinnaanera KNR-imut qanittukkut oqaatigaa.

- Manna ajorsigaluttuinnarpoq. Allamik sammiveqanngilaq.

Borgmesterip tullersortaa ernumasoq

Tasiilameersoq alla, Egon Poulsen Islandimit angallannikkut attaveqarunnaarnerup kinguneranik malugisaqartut ilagaat.

Taanna Kommuneqarfik Sermersuumi Siumut tunuliaqutaralugu borgmesterimut tullersortaanermi saniatigut takornarialerisarpoq.

Egon Poulsen (S) Kommuneqarfik Sermersuumi borgmesterimut tullersortaavoq. Taasusma Islandimut angallannikkut attaviup annaaneqarnera Tasiilami suliffissaaleqinermut atatillugu kingunissai ernumassutigai. Assi © : Markus Valentin / KNR

Taanna allat assigalugit qimmiminik aamma toqoraasariaqarsimavoq.

- Takornariaqarnermik suliaqartut eqqugaanerpaat ilaanniipput. Islandimit timmisartuussisarnerup unitsinneqarnera paasigatsiguli qimmitsinnik toqoraasariaqartugut arlaliuvugut, taanna oqarpoq.

Egon Poulsenip Islandimut angallannikkut attaviup suliffissaaleqinermut qanoq sunniuteqarnissaa ernumassutigaa.

- Takornariaqarnermik suliaqartugut Tasiilameersunik sulisoqarpugut, suliffeqarfinnilu illoqarfitsinni suliffissaqartitsisunut ilaalluta.

- Takornariaqarnermik suliaqartut isertitassaminnik ukiuunerani annaasaqarnissaat aamma sulisuisa suliffissaarunnissaat pingaartumik ernumassutigaakka.