Vivian Motzfeldtip Issittumi nakkutilliineq sukannernerulersikkusukkaa

Vivian Motzfeldt (S) Europami siuttunik arlalinnik ataatsimeeqateqarfigisamini, Europami angalareerluni Nuummut tikeqqammerluinnarpoq.

Tamannalu apriilimi nunanut allanut naalakkersuisunngornermi kingorna Europami angalanerani siulliuvoq. Iligisanummi atassuteqalernissaq pingaaruteqarpoq. Pingaartumik piffissami matumani, pissaanerit iligiillu nutaat pilertorfigisaanni, Vivian Motzfeldt oqarpoq.

Amerikamiut præsidentiata, Donald Trumpip nunatsinnik ataavartumik soqutiginninneratigut USA-llu nunatsinnik pisariaqartitsineranik oqaaseqartarneratigut nunanit tamalaanit aatsaat taama ukkatarinnittoqartigaaq.

- Nunat nunarput illersorlugu oqariartuuteqarsimasut isumalerujussuupput, nunat killeqarfiisa innarlerneqarsinnaannginnerannik tunngaveqarneq nunallu tamalaat inatsisaannik ataqqinninneq taakkuninngalu malitaqarneq ersarissaatigissallugu aatsaat taama pingaaruteqartigaaq, Vivian Motzfeldt oqarpoq.

Umiarsuit killeqanngitsumik angalasinnaasut

Nunarsuarmi pissutsit maanna atuuttut ilaatigut Ukrainemi sorsunneq aamma præsidentip nunanik – matumani nunarput Canadalu ilanngullugit oqaaseqarnera pillugit ernumanermik pilersitsisut, Vivian Motzfeldt isumaqarpoq.

Vivian Motzfeldtip naalakkersuisut nunarsuarmi maannakkut pissutsit ernumassutigaat?

- Pissutsit ernumanarput aamma pingaarnerpaatut issittup qaqugukkulluunniit sakkuaaffiunnginnissaanut isumaqatigiissut taanna nunatta Europami sorsuttoqarneranik sorpassuarnik allanngortitsivoq.

- Ullumikkut inisisimaffigisarput pingaarnerpaamik nunatta pisuussutai (pisuujussutai?) nunarsuup sinnerata pisariaqartitai teknologiip ineriartortinneqarneranut aammalu ataavartumik nukissiuteqarnermut aammalu ajoraluartumik sakkussiornermut pisariaqartitai amerlasoorpassuit nunatta pigai.

- Taamaammat sillimaniarnikkut inissisimanerput, nunatta inissisimanera kisimi pineqanngilaq, aamma nunatta pisuussutai tassani eqqartorneqarput. Taamaammat oqaloqatigiinnerit ingerlanneqartariaqarput, uanilu nunatta pisuussutai aatsitassat eqqartorneqartut taakku aamma pitsaasumik ineriartortinneqassappata ilittalu taakkua periarfissat atussappagit taava oqaloqatigiinnerit ingerlasariaqarput, aammalu tassani ineriartortitsineq pinngippat, taava allat iliginngisatta periarfissaq taanna atussavaat, taanna oqarpoq.

Vivian Motzfeldt aperigaanni nunanik iligisanik suleqatiginnilluarneq sakkussani taamaammat pingaarnerpaavoq.

Suleqatigiinneq illersornissarlu taamaammat piffissami kingullermi oqallisigineqartussani aamma pingaarnerpaaniippoq. Nunatsinnimmi illersuinermut tunngatillugu pitsanngorsagassarpassuupput. Tamanna ilaatigut Tunup avannaarsuani imartaani nakkutiginnilluarsinnaanermut ilaatigut tunngassuteqarpoq, tassanimi nunanit allanit iliginngisanit umiarsuit killeqanngitsumik angalasinnaasut, Vivian Motzfeldtip oqaatigaa.

Aamma avannaani kangisissua iluanik nakkutigineqanngilaq. Taamaalilluni avataanit timmisartut ajornanngitsunnguamik appakaassinnaallutik, taanna oqarpoq, nangillunilu:

- Illersornissami isumaqatigiissut januaarimi naammassisimasarput, malitsigisaanillu aamma aasamut annerusumik suli naammassinniffissarput. Taanna qularnaarinninniartussaavoq sumiiffiit ilaat annertunerusumik nakkutigineqarsimanngitsut nakkutigilerneqarnerannik.

- Soorlu piginnaasat umiarsuaannarmut tunnganngillat satellitsinut aamma tunngassuteqarput, aamma dronenut tunngassuteqarput. Tassa piginnaasat sumiiffinni sukkanerusumik susoqarneranik suussusersisinnaasut aammalu sukkanerusumik oqaloqatigiinnernik ingerlatsiviusinnaasut, taamaalilluta ingerlaannaq susoqarneranik paasinnissinnaanerput qaffallugu.

Ingerlaannarsinnaanngitsoq

Namminersorneq pillugu inatsit misissoraanni nunatta illersorneqarnera danskit suli oqartussaaffigigaat tusarneqartarpoq. Danmarkilli isiginiaannarnissaa naammanngitsoq, naalakkersuisoq isumaqarpoq.

Issittumili nunat sillimaniarnerunissaq pillugu ataatsimoortariaqarput.

- Issittumi imaatigut aamma nunakkut soorunami sillimaniarnikkut upalungaarsimanikkullu nakkutiginninneq qaffasinnerussappat taava nunat iligiit akornanni imartani ersarinnerusumik issittumi upalungaarsimanikkut takussaanerunissaq alloriarfigisariaqaripput. Imaanngitsoq sakkutuut umiarsuarpassui issittumukassasut, kisianni upalungaarsimanikkut pisariaqartitagut naammassineqassappata aamma issittumi upalungaarsimanikkut sillimaniarnikkullu piginnaasat annertusinerussappata taava periarfissiisariaqarpugut issittup annerusumik angalaffigineqarnissaa nakkutigineqarnissaa, taanna oqarpoq.

Tamatuma saniatigut nunatta ataatsimut oqariartuuteqarnissaa aatsaat taama pingaartigisoq, Vivian Motzfeldt isumaqarpoq. Uagummi oqaluuserinnitsitsisussaavugut.

- Kisianni aamma taamak oqareerlunga soorunami avaqqunneqarsinnaanngilaq namminersorneq pillugu inatsimmi suliassat agguataarsimaneqarnerani oqartussaaffiit taakkua suli tamakkiisumik uagut nammineq ingerlatarinnginnatsigit.

- Kisianni taamatut oqareerlunga pingaarnerpaatut naqissusiutigerusutara tassaavoq, pisut pineranni uagut kisitta ukkanneqarpugut, uagut sillimaniarnerput illersorneqarnerput nunallu allanut politikkerput sammineqarpoq, oqartussaaffilli uagutsinninngaanniit 3.500 kilometerimik ungasitsigisoq taanna ullumikkut attassinnaanngilarput. Allatut aaqqiissuteqartariaqarpugut, taanna oqarpoq.