KNR-ip paasigaa: Meeqqat pillugit oqaaseqartartoq soraarsitaasimasoq
MIO-p, KNR-ip saaffiginninneranut atatillugu, tallimanngornermi ualikkut akissutaanik Stina Sværdillu nammineq Facebookikkut nalunaaruteqarneranik nutarterneqarpoq.
Meeqqat pillugit oqaaseqartartoq, Stina Sværd, aamma Mio KNR-imit piffissami sivisuumi apersorneqarumanngillat.
Meeqqat pillugit oqaaseqartartoq imigassamut politikki pillugu aggustip 14-ianni kingullermik oqaaseqarpoq.
Taassuma soraarsitaasimanera KNR-imit maanna paasineqarpoq.
KNR-ip naalakkersuisoq akisussaasoq Mariane Paviasen Jensen (IA) taassumalu naalakkersuisoqarfia oqaaseqaqqullugit saaffigisimavaat.
Mariane Paviasen Jensenip suliaq inummut ataatsimut tunngassuteqarmat oqaaseqarfigisinnaannginnerarpaa.
KNR-ip Mio oqaaseqartikkumallugu aamma attaveqarfigaa.
KNR-ip Mio meeqqat pillugit oqaaseqartartoq pillugu attaveqarfigimmagu, suliffeqarfik oqaaseqarumanani akissuteqarpoq.
MIO suliamut tunngatillugu oqaaseqarusunnatik KNR-imut tallimanngornermi ualikkut mailikkut allapput.
KNR suliaq qanimut malinnaaffigaa suliamullu tunngasunik nutaanik paasissutissaqalerpat allaaserisaq nutarterneqarumaarpoq.
Stina Sværd Aviâja Egede Lynge taarserlugu, meeqqat pillugit oqaaseqartartutut nutaatut siorna juunimi toqqarneqarpoq.
Nammineq oqaasertaliisoq
Stina Sværdip nammineerluni Facebookikkut tallimanngornermi ualikkut nalunaaqutaq 13.30 missaanni allappoq:
- Matumuuna aliasungaarlunga nalunaarutigisariaqarpara, Meeqqat Pillugit Oqaaseqartartutut soraarsitaasimagama, atorfik nuannarilluinnagara uummateqarfigisimaqisaralu.
- Uannut pingaaruteqarpoq erseqqissassallugu, peqquserlussimannginnama imaluunniit suliniaqatigiiffiup aningaasaataanik atornerluisimannginnama. Paarlattuanik nukikka atorlugit suliniaqatigiiffiup sulisullu soqutigisaat, minnerunngitsumillu meeqqat pisinnaatitaaffii illersorlugit isumagisimavakka. Peqatigitillugu aningaasanik annertuumik atornerluisoqarsimanera qulaajarniarlugu sulisimavunga, isumaqarama ilumoortoq saqqummertariaqartoq, meeqqanullu akisussaaffipput tamatigut salliutinneqartariaqartoq.
Meeqqat Pillugit Oqaaseqartartuusimanini immikkut illuinnartuusutut oqaatigaa, suleqatigisimasanilu meeqqallumi aamma qujaffigalugit.
- Piffissami suliffigisimasannut qujamasungaarlunga suliassaq qimappara, upperilluinnarlugulu meeqqat pisinnaatitaaffii nipaallu tamatigut qitiutinneqartarumaartut.
