Nuummi innuttaasoq nutaamik inuiattut erinarsuutitaarnissaq pillugu oqallinnermi: -Uanga isumaqartinngilara
Inuiattut erinarsuutitta marluusut ataasiinnanngortinneqarnissaanut Atassutip siunnersuutaa Inatsisartuni pingasunngormat siullermeerneqarpoq. Tamannalu inuiaqatigiinnit aalajangerneqassasoq partiit ippassaq isumaqatigiissutigaat. Nuummi innuttaasut tamanna pillugu KNR-imit apersorneqarput.
Allattoq Gaaba Olsen, Jonna Enoksen Dahl
oktobarip 17-at 2026 10:18
Inuiattut pisortatigoortumik ataatsimik erinarsuuteqarnissarput Atassutip siulittaasuata Aqqalu C. Jerimiassenip anguniagaasa ilagaat.
Inatsisartut upernaakkut ataatsimiinneranni oqallisigineqartussatut siunnersuutigaa, Inatsisartunilu pingasunngornermi siullermeerneqarpoq.
Siunnersuulli ataatsimiitsitaliani suliaqartunit inuiaqatigiinnut taasissutigineqarsinnaanissaa pillugu periarfissaqassanersoq misissorneqassaaq, allannguutissatullu siunnersuutigineqarluni ingerlateqqinneqarpoq.
Atassutip siulittaasua Aqqalu C. Jeremiassen
Innuttaasut isumaqatigiittut
Erinarsuutit marluk Nunarput Utoqqarsuanngoravit imaluunniit Nuna asiilasooq Nuummi innuttaasunut sorleq inuiattut erinarsuutigerusunneraat KNR-imit aperineqarput.
Aqqalunnguaq Olsenip Nunarput utoqqarsuanngoravit tulluarnerutippaa.
- Nunarput Utoqqarsuanngoravit taanna tulluarnerutippara, tassa taanna tamatiguuik ullorsioraangatta atorneqartartoq, taavalu sungiusimallutigu. Soorunami aamma aappaa sungiusimangaluarparput.
Aqqalunnguaq Olsen
Birthe Nathanielsen isumaqataavoq.
- Nunarput Utoqqarsuanngoravit tulluarnerutippara.
Birthe Nathanielsen
Juliane Padillap Nunarput Utoqqarsuanngoravit aamma tulluarnerutippaa.
- Nunarput Utoqqarsuanngoravit, utoqqalereerama ataqqinninnera piinnarlugu. Utoqqartagut siuligut eqqaamallugit. Nunarpummi utoqqarsuanngoreerami, kiisa sermeerutilerpugut.
Juliane Padilla
Makkak Ugpernángitsok Inûsugtok´-p Nunarput Utoqqarsuanngoravit sungiusimanerugamiuk tulluarnerutippaa.
- Nunarput Utoqqarsuanngoravit ataqqivara nammineq qaatuutara. Uanga nammineq, namminiussutsitsinnut tunngatillugu ataqqinartorsuartut isigigakku.
Makkak Ugpernángitsok Inûsugtok´
Inuiattut erinarsuut nutaaq?
Nunarput utoqqarsuanngoravit aamma Nuna asiilasooq tamarmik ullutsinni erinarsuutigineqartarput. Atassummiilli nutaamik inuiattut erinarsuusiortoqassanersoq misissorneqartariaqarsorineqarpoq, tassanilu innuttaasut naapitatta isumaat assigiinngillat.
Aqqalunnguaq Olsenip nutaamik inuiattut erinarsuusiortoqarnissaa akiuminaatsippaa.
- Taanna aappaatigooqartilaarpara, kisianni taanna siulleq eqqaasara Nunarput utoqqarsuanngoravit taanna immaqa ajunngilaq. Nutaaliortoqassappat aamma paasinarsiumaarpoq qanoq qanutuunersoq tulluarnersoq imaluunniit tulluannginnersoq.
Juliane Padillap tamanna aamma akiuminaatsippaa
- Uanga utoqqalivallaaqigama nutaat sianigivallaannginnakkit tulluarpallaanngilanga.
Birthe Nathanielsenip isumalluarfigaa.
- Uanga torrangersuaarpara pissanganaq taamaattoqassappat. Kingulliit taakkua eqqarsaatigalugit nutsiinnangaarpasinnera taanna eqqarsaatigeqqajaaginnaavikkakku ippassarli.
Makkak Ugpernángitsok Inûsugtok´-ip tamanna tulluarsorinngilaa.
- Ullutsinnimi akuleriippassuanngoratta taavamingooq suna siunnersuutiginiarpaat? Uanga isumaqartinngilara, tassami ilaa massakkut siammasittorsuungatta Kalaallit Nunaanni inuiaqatigiit.
Kalaallit Nunaata siunissami pisortatigoortumik inuiattut erinarsuutissaa pillugu Inatsisartuni ippassaq oqallisigineqareersoq, ataatsimiititaliamut ingerlateqqinneqarpoq, novembarillu tallimaanni aappassaanneerneqassaaq.
