Nunatsinni nalunaaquttap aasaanerani siuartinneqartarnera atorunnaarsinneqarusuttoq: Innuttaasut timikkut tarnikkullu malugissagaat
- Nalunaaqutaq aaqqinneqarpat utertinneqarpallu pitsaassaaq.
Nuummi innuttaasut ilaat taama isumaqarpoq, nunatsinni nalunaaquttap nalunaaquttat ingerlaqatigiiffigisimasaannut, UTC-3-mut, utertinneqarsinnaanerata aasaaneranilu siuartinneqartarunnaarnissaata oqallisigineqarneranut, taama isummerluni.
Nunatsinni nalunaaqutaq akunnermik ataatsimik 2023-mi siuartinneqarpoq, tassa UTC-3-mit UTC-2-mut allanngortinneqarluni. Allanngortinneqarmalli innutaasunit oqallisaajuarsinnarpoq, inuunerannut sunniuteqarluinnarmat.
Inatsisartunilu sapaatip akunnerani uani oqallisigineqaqqippoq. Tassani naalakkersuisooqatigiit partiit pingasut, naak naalakkersuisut siulittaasuat Jens-Frederik Nielsen (D) aningaasartuutaalersussanik mianersoqqusigaluartoq, nalunaaquttap akunnera ataatsimik utertinneqarnissaa aasaaneranilu siuartinneqartarunnaarnissaa ammaffigalugu oqaatigaat.
Nuummi innuttaasut arlallit nalunaaquttap tikkuutaasa sumut killinneri, qassinngorneri, kisiisa eqqarsaatiginngilaat, tikkuarfii ullup qaamarnganut unnuallu taartarneranut inuunerannut sunniuteqartarmata.
‘Sunniuteqartorujussuaq’
Helga Zeeb nalunaaquttap tikkuutaasa nikisittarneri pillugit isummani aamma allanngortissimavaa. Siornatigut malugerpiartarsimanngilaa. Maannali isumaa allanngorsimavoq.
- Toqqarpara pissutigalugu pissutsit eqqortut ingerlalerniassammata. Malugersuaarnikuugakku aamma paasinikuugakku. Assortornikuugaluarpara nalunaaquttap nikinganera sunniuteqanngitsoq, kisianni aamma paasinikuuara inuttut inooriaatsitsinnut sunniuteqartorujussuaq aamma tarnikkut.
Seqernup nuisarnera tarrittarneralu inunnut malunnaateqarnerarpaa.
- Qaamasarnera taartarnera inuttut inooriaatsimut sunniuteqarpoq peqqinnanngitsumik. Taamaattumik qujavunga utertinneqalermat eqqortumut.
Louisip nalunaaquttap maannakkut ingerlanera ullut ingerlasarnerannut aamma tulluutinnginnerarpaa.
- Ullaakkut qaammarniaaluusaartarnera pissusissamisoorsorinnginnakku, taavalu aamma unnuliaartarnera pingaartumik aasakkut suli seqinnersugut unnussiulertaratta.
Ullullu soorlu ullaat unnuillu pissusissamisut ingerlannginnerat aamma nassuiaatigaa.
- Ullaakkut ullaassaasussaagaluartoq ullaanngoreertarluta, taamaammat iluaagisarpara.
Louisip timi allannguutinut naleqqussarsimannginnerarpaa.
- 1 tiimiinnaagaluartoq ilaatigut soorlu 2 tiimiusarluni aasakkut, kisianni unnuliaarujussuartarnera suli seqinnertoq unnulertarnera iluarivallaanngilara. Suli timimut sunniutaa naleqqussarfiginikuunnginnatsigu.
'Pissutsinut atukkatsinnut naleqqussartariaqarpugut'
Paviamut apeqqut tamanna, nunani allani piffissat malinnagit, nunatsinni pinngortitami pissutsit malillugit ulluinnarni aaqqissuussisinnaatitaanermut aamma tunngassuteqarpoq.
- Iluarsineqaqqinnissaa nuannaarutigaara, nalunaaqutaq pinngortitamut, seqinermut qaamanermullu malinnaaqqilerniassammat. Tamanna qujamasuutigaara isumaqarpungalu taamaattariaqartoq. Pissutsimmi taakkua naapertorlugit inuuvugut.
Taassuma Kalaallit Nunaat allanut naleqqussartariaqanngissoraa.
- Imaanngilaq nunanut allanut tulluarsartariaqartugut. Siullertulli pissutsinut atukkatsinnut tulluarsartariaqaartariaqarpugut. Taamaattumik tamanna naammagisimaarpara iluarsineqarnissaalu nuannaarutigaara.
Naalakkersuisut akiligassartaanut tunngatillugu mianersoqqusisut
Jens-Frederik Nielsenip piffissap allanngortinneqarnissaa aasaaneranilu nalunaaquttap atorunnaarsinneqarnissaa aningaasatigut kinguneqarumaarnernera, Inatsisartuni oqallinnermi mianersoqqussutigaa.
- Allannguinerit akeqarumaarput, aningaasanilli inuiaqatigiinnut kalaallinut iluaqutaasinnaanngitsunit aningaasalersorneqassapput, taanna oqalugiartarfimmit oqarpoq.
Aammattaaq tamatuma kinguneri atuisartunit sulisartuniillu malugineqarnissaat erseqqissaatigaa.
Taamaakkaluartoq naalakkersuisoqatigiit nalunaaquttap allanngortinneqaqqinnissaanik kissaateqartoqarnera tusaarusuppaat.
- Inuppassuit nalunaaqutaqatigiiffikutta atorneqaleqqinnissaa aasaaneranilu nalunaaquttap atorunnaarsinneqarnissaa kissaatigaat. Tamanna tusaanngitsuusaaginnarsinnaanngilarput, naalakkersuisoqatigiit ataatsimoorlutik avammut taama nalunaaruteqarput.
Siumumit siunnersuut Inatsisinut Ataatsimiititaliamut allannguutissatut siunnersuusiatut marlunngornermi utertinneqarpoq. Allannguutissatut siunnersuusiat naapertorlugit, aasaanerani nalunaaquttap nikisinneqartarnera aappaagu aatsaat atorunnaarsinneqassaaq, nalunaaqutaqatigiiffiulli allanngortinneqarnissaa 2028-mut kinguartinneqassalluni.
Taamaattumik allannguineq suli naammassineqanngilaq. Nuummili innuttaasut seqinermut naapertuuttumik nalunaaqutaqaleqqilernissaat qanilliallappoq.
