Politiit ullormut nalunaarutaat: Ukiukitsoq biilinik qimaaniarsimasutut unnerluutigineqartoq

Nuummi biilimik ippassaq ullaap tungaani malersuisoqarpoq. Biilimik aquttoq illoqarfiup eqqatigut mianersuaalliortumik ilaatigut ingerlasimavoq, inuit biilimit aportinnaveersaartariaqarsimagunik politiinut saaffiginninnissaat kaammattuutigineqarpoq.

Biili 09.20-p missaani unitsinneqarpoq, inuillu katillugit arfineq-pingasut tigusarineqarlutik, Kalaallit Nunaanni Politiini pigaartut pisortaat, Jørgen Madsen oqarpoq.

- Inuit tamarmik 18-it inorlugit ukioqarput, unitsitsisoqarneratalu kingorna tamarmik tigusarineqarlutik. Biilimik aquttoq akuerineqarani biilimik atuisimasutut aqqusinermilu angallannermi inatsimmik unioqqutitsisimasutut unnerluutigineqarpoq, pigaartut pisortaat oqarpoq.

Pigaartorlu tassunga atatillugu inunnut kaammattuuteqarpoq.

- Arlaat aportinnaveersaarniartariaqarsimaguni – imaluunniit arlaatigut navianartorsiortinneqarsimaguni – taava politiit tusarfigerusuppaasi.

Ukiukitsut killisiorneqarnermi kingorna iperagaaqqipput, isumaginnittoqarfillu nalunaarfigineqarpoq, taakkulu arfineq-pingasut angajoqqaavinut isumaginnittunulluunniit tunniunneqarlutik.

Anngiortumik eqqusseriaraluartoq

Politiit biilimik malersuinermi saniatigut ullormut ulapissimallutik pigaartut pisortaata oqaatigaa. Angut inuusuttoq hashimik 200 grammimik anngiortumik eqqusseriaraluartutut Nuummi mittarfimmi tigusarineqarpoq.

- Angut inuusuttoq 15-it 20-llu akornanni ukioqarpoq, taannalu unnerluutigineqarpoq, maannalu iperagaaqqereerluni, Jørgen Madsen oqarpoq.

- Kiisalu akissarsiffiunera pissutigalugu imigassamut attuumassuteqartut aamma ulapputigineqarlutik, taanna oqarpoq.

Politiit angerlarsimaffimmi eqqissiviilliortitsinernut ornigussimasut taassuma oqaatigaa, tassalu pisut arlaanni meeqqanik angerlarsimasoqarsimanngitsoq erseqqissaatigaa.

Kalaallit Nunaanni Politiit oqarasuaammut 70 14 48-mut sianerfigineqarsinnaajuaannarput.