Arnat assammik arsarnermi nunanut allanut unammisartut ingerlaqqilerput nunanit tamalaanit ikiorneqarnikkut

Kalaallit arnat assammik arsartartut ukioq nikalluallannartumik ilisimatinneqarput. VM-mut anngunniunnermi peqataanissaq akissaarunneqarpoq.

Tamanna pingaartumik anniarineqarpoq ukiorpassuarni angorusuttaq VM-ip naggataarneqarnerani peqataaneq 2023-mi misigineqarmat.

Maanna ukioqqortussutsini assigiinngitsuni assammik arsartartut unammiartortaleqqipput tassami aasaq U-19-ni arnat unammisartut peqataapput maannalu ukiaanerani U-17-ni unammisartut angalasussanngorlutik.

Arnat inersimasut septemberimi sungiusaqatigeereerlutik maanna Islandiliartussanngorput tassanilu Jakob Larsen sungiusaasuussaaq suli nuna tamakkerlugu sungiusaasussamik toqqaasoqanngimmat.

- Inuusuttuni nunanut allanut unammisartut VM-mut anngunniukkiaraangata aningaasartuutit 80 procentii nunat tamalaat kattuffiata akilertarpai ineriartortitsinermut tapiissutitut taallugit, Jakob Larsen aamma assammik arsartartut kattuffianni TAAK-mi siunnersortiusoq nassuiaavoq.

- Tamanna arnat nunanut allanut unammisarut maanna annassutigaat. Tassami tapiiffigineqarsimanngitsuugutta nunanut allanut unammisartut ataasiinnaat akissaqartissimassagaluarpagut, Jakob Larsen oqarpoq.

Eqqarsartaatsikkut naleqarpoq

Islandimut maanna angalanissaq timersornikkut pissarsiat saniatigut arnat piumassusaannut eqqarsartaatsikkut naleqassaaaq.

- Soorunami unamminerit ilikkagaqarfiussapput. Kisianni arnat Kalaallit Nunaannilu assammik arsarnermi malinnaasut aallarteqqittoqarneranik takusaqarnerat isumalerujussuuvoq, Jakob Larsen oqarpoq.

Arnat nunanut allanut unammisartut Islandimiissapput oktoberip 13-aniit 18-ata tungaanut tassanilu Islandip U-20-ni nunanut allanut unammisartuinut unammissallutik.