Raw Arctic Greenland Tourism Awards 2025-mik nersornaaserneqartoq

"Raw Arctic ApS-ip suleqataasalu piffissap sivikitsup ingerlanerani suliffeqarfik pilersissimavaat Kalaallit Nunaanni siunissami takornariartitsinermut aqqutissiuussisoq. Piujuartitsineq, piorsarsimassuseq misigisallu piviusut pingaartinnerisigut akisussaassuseqarluni takornariartitsisarnermut tunngavissaqarluartumik pilersitsipput.“

Ukioq manna Greenland Tourism Awards 2025-mik nersornaasigaasoq, Raw Arctic, Air Greenland-ip ilisaritillugu tusagassiuutinut nalunaarummi taamatut allaaseraat.

Pilersitseqatigiit pingasut Isak Brandt Hansen, Rasmus Brandt aamma Casper Frank Møller qaammatit 15-it ingerlanerinnaanni suliffeqarfimmik siuttuusumik takornariartitsinermilu akisussaassuseqarnermut piviusorsiornermullu najoqqutassianik nutaanik pilersitsisut, Air Greenland oqarpoq.

Oqaatsit Raw Arctic-imut nuannaalersitsisut.

- Isumaqarpugut tamanna angingaartoq. Innersuunneqarnerput tulluusimaarutigisimaqaarput, aammali suliffeqarfinnit allanit toqqarneqarsimanerput. Tamanna inunnit upperineqarnitta takutippaa, tamannalu tulluusimaarutigeqaarput, Isak Brandt Hansen KNR-imut oqarpoq.

Sulerulunneq iluatsitsinermut aqqutaasoq

Naak Raw Arctic nutaajugaluarluni killiffiannut aqqut takisimavoq.

- Iluatsitsilluarnissamut piareersarluarsimaneq pissutaasoq, Isak Brandt Hansen oqarpoq.

- Ineriartortitsiniarnitsinni piareersarluartariaqarsimaqaagut. Aallartinnissatalu tungaanut sulisimaqaagut. Misissueqqissaarnikuuvugut, aallartikkattalu sulerulussimaqaagut. Suleqatigiilluarnikooqaagut, ikioqatigiinnissaq suleqatigiinnissarlu pikkoriffigisimavarput.

Raw Arctic misigisassanik assigiinngitsunik neqerooruteqarpoq, soorlu aalisarnermik, arfernik alapernaarsuinermik, piniarnermik, arsarnernik takusaqarnermik, inoqajuitsumi tammaarsimaarnermik aamma nammineq pilersaarutit aallaavigalugit angallassinernik.

Misigisalli nuannersut naammanngillat.

Nersornaaserneqassagaanni suliffeqarfittut tunisassianik akisussaassuseqarpalaartunik ineriartortitsinissaq, isumannaatsuuneq, pitsaassuseq, avatangiisit, nutaaliorneq inuiaqatigiinnilu akisussaassuseqarneq qitiutillugit, pingaaruteqarpoq.

Raw Arctic-imilu taamaaliortarput.

- Sapinngisamik nunaqavissut kisimik atorfinitsittarpagut, aamma inuit ineriartorfissaqarluartut misigisaqartitsisinnaasullu atorfinitsittarpagut. Avitseqateqarusullutik oqaluttuarsinnaasut, oqaatsitsinnik ilisimasallit aammalu kalaallit piorsarsimassusaannik pinngortitaannillu ilisimasallit, Isak Brandt Hansen oqarpoq nangillunilu:

- Suleqatigut aamma Raw Arcticip avammut kiinaata ilarimmagit.

Takornarialerinermi ineriartorneq siunnerfilerniaraat

Nersornaat ukiumoortumik tunniunneqartartoq Visit Greenlandip Air Greenlandillu suleqatigiinneratigut pilersinneqarpoq.

Nunaqavissut, takornariat suleqatillu kalaallit takornariartitsisartut suliffeqarfiutaannik nersornaaserneqartussatut innersuussisinnaapput, tamatumalu kingorna immikkut ilisimasallit nersornaasigaasussaq toqqartarpaat.

Nersornaatip saniatigut Air Greenlandimut pisissutissaq 10.000 koruuninik nalilik eqqumiitsuliortullu Kim Kleist Eriksenip ilusilersugaa nersornaasigaasup pissarsiarisarpai.

Nersornaasiinerlu suliamut naammassineqareersumut nersuinerinnaanani, Kalaallit Nunaanni takornariartitsinerup siunissaata ingerlavissaanik innersuusseqataanissamut aamma periarfissaavoq.

– Neriuppunga piujuartitsilluta ineriartortuarumaartugut aamma inuiaqatigiinnut tapersersuilluta. Aningaasat kalaallinit tigummiinnarneqarnissaat qulakkeerniarlugu, tassa ingerlavissarput, ineriartornerup ingerlanerani piumasaqaatinik naammassinneqataanissaq, Isak Brandt Hansen oqarpoq.